वद॑ति॒ दक्षि॑णा॒ऽसीत्या॑ह॒ दक्षि॑णा॒ ह्ये॑षा य॒ज्ञिया॒ऽसीत्या॑ह य॒ज्ञिया॑मे॒वैनां᳚ करोति क्ष॒त्रिया॒सीत्या॑ह क्ष॒त्रिया॒ ह्ये॑षा ऽदि॑तिरस्युभ॒यत॑श्शी॒र्ष्णीत्या॑ह॒ यदे॒वाऽऽ*दि॒त्यः प्रा॑य॒णीयो॑ य॒ज्ञाना॑मादि॒त्य उ॑दय॒नीय॒-स्तस्मा॑दे॒वमा॑ह॒ यदब॑द्धा॒ स्यादय॑ता स्या॒द्यत् प॑दिब॒द्धा-ऽनु॒स्तर॑णी स्यात् प्र॒मायु॑को॒ यज॑मानः स्या॒ - [ ]
पदपाठः (Word-by-word)
वद॑ति । दक्षि॑णा । अ॒सि॒ । इति॑ । आ॒ह॒ । दक्षि॑णा । हि । ए॒षा । य॒ज्ञिया᳚ । अ॒सि॒ । इति॑ । आ॒ह॒ । य॒ज्ञिया᳚म् । ए॒व । ए॒ना॒म् । क॒रो॒ति॒ । क्ष॒त्रिया᳚ । अ॒सि॒ । इति॑ । आ॒ह॒ । क्ष॒त्रिया᳚ । हि । ए॒षा । अदि॑तिः । अ॒सि॒ । उ॒भ॒यत॑श्शी॒र्ष्णीत्यु॑भ॒यतः॑ - शी॒र्ष्णी॒ । इति॑ । आ॒ह॒ । यत् । ए॒व । आ॒दि॒त्यः । प्रा॒य॒णीय॒ इति॑ प्र - अ॒य॒णीयः॑ । य॒ज्ञाना᳚म् । आ॒दि॒त्यः । उ॒द॒य॒नीय॒ इत्यु॑त् - अ॒य॒नीयः॑ । तस्मा᳚त् । ए॒वम् । आ॒ह॒ । यत् । अब॑द्धा । स्यात् । अय॑ता । स्या॒त् । यत् । प॒दि॒ब॒द्धेति॑ पदि - ब॒द्धा । अ॒नु॒स्तर॒णीत्य॑नु - स्तर॑णी । स्या॒त् । प्र॒मायु॑क॒ इति॑ प्र - मायु॑कः । यज॑मानः । स्या॒त् ।