ऽच्छ॑ याति॒ तस्मा॑दनोवा॒ह्यꣳ॑ स॒मे जीव॑नं॒ ॅयत्र॒ खलु॒ वा ए॒तꣳ शी॒र्ष्णा हर॑न्ति॒ तस्मा᳚च्छीर्.षहा॒र्यं॑ गि॒रौ जीव॑नम॒भि त्यं दे॒वꣳ स॑वि॒तार॒मित्यति॑-च्छन्दस॒र्चा मि॑मी॒ते ऽति॑च्छन्दा॒ वै सर्वा॑णि॒ छन्दाꣳ॑सि॒ सर्वे॑भिरे॒वैनं॒ छन्दो॑भिर्मिमीते॒ वर्ष्म॒ वा ए॒षा छन्द॑सां॒ ॅयदति॑च्छन्दा॒ यदति॑च्छन्दस॒र्चा मिमी॑ते॒ वर्ष्मै॒वैनꣳ॑ समा॒नानां᳚ करो॒त्येक॑यैकयो॒थ् सर्गं॑- [ ]
पदपाठः (Word-by-word)
अच्छ॑ । या॒ति॒ । तस्मा᳚त् । अ॒नो॒वा॒ह्य॑मित्य॑नः - वा॒ह्य᳚म् । स॒मे । जीव॑नम् । यत्र॑ । खलु॑ । वै । ए॒तम् । शी॒र्ष्णा । हर॑न्ति । तस्मा᳚त् । शी॒र्॒.ष॒हा॒र्य॑मिति॑ शीर्.ष-हा॒र्य᳚म् । गि॒रौ । जीव॑नम् । अ॒भीति॑ । त्यम् । दे॒वम् । स॒वि॒तार᳚म् । इति॑ । अति॑च्छन्द॒सेत्यति॑ - छ॒न्द॒सा॒ । ऋ॒चा । मि॒मी॒त॒ । अति॑च्छन्दा॒ इत्यति॑ - छ॒न्दाः॒ । वै । सर्वा॑णि । छन्दाꣳ॑सि । सर्वे॑भिः । ए॒व । ए॒न॒म् । छन्दो॑भि॒रिति॒ छन्दः॑-भिः॒ । मि॒मी॒ते॒ । वर्ष्म॑ । वै । ए॒षा । छन्द॑साम् । यत् । अति॑च्छन्दा॒ इत्यति॑ - छ॒न्दाः॒ । यत् । अति॑च्छन्द॒सेत्यति॑-छ॒न्द॒सा॒ । ऋ॒चा । मिमी॑ते । वर्ष्म॑ । ए॒व । ए॒न॒म् । स॒मा॒नाना᳚म् । क॒रो॒ति॒ । एक॑यैक॒येत्येक॑या - ए॒क॒या॒ । उ॒थ्सर्ग॒मित्यु॑त् - सर्ग᳚म् ।