मिमी॒ते ऽया॑तयाम्नियायातयाम्नियै॒वैनं॑ मिमीते॒ तस्मा॒न्नाना॑वीर्या अ॒ङ्गुल॑यः॒ सर्वा᳚स्वङ्गु॒ष्ठमुप॒ नि गृ॑ह्णाति॒ तस्मा᳚थ् स॒माव॑द्वीर्यो॒ऽन्याभि॑-र॒ङ्गुलि॑भि॒स्तस्मा॒थ् सर्वा॒ अनु॒ सं च॑रति॒ यथ् स॒ह सर्वा॑भि॒र्मिमी॑त॒ सꣳश्लि॑ष्टा अ॒ङ्गुल॑यो जायेर॒-न्नेक॑यैकयो॒थ् सर्गं॑ मिमीते॒ तस्मा॒द् विभ॑क्ता जायन्ते॒ पञ्च॒ कृत्वो॒ यजु॑षा मिमीते॒ पञ्चा᳚क्षरा प॒ङ्क्तिः पाङ्क्तो॑ य॒ज्ञो य॒ज्ञ्मे॒वाव॑ रुन्धे॒ पञ्च॒ कृत्व॑स्तू॒ष्णीं- [ ]
पदपाठः (Word-by-word)
मि॒मी॒ते॒ । अया॑तयाम्नियायातयाम्नि॒येत्यया॑तयाम्निया-अ॒या॒त॒या॒म्नि॒या॒ । ए॒व । ए॒न॒म् । मि॒मी॒ते॒ । तस्मा᳚त् । नाना॑वीर्या॒ इति॒ नाना᳚ - वी॒र्याः॒ । अ॒ङ्गुल॑यः । सर्वा॑सु । अ॒ङ्गु॒ष्ठम् । उप॑ । नीति॑ । गृ॒ह्णा॒ति॒ । तस्मा᳚त् । स॒माव॑द्वीर्य॒ इति॑ स॒माव॑त् - वी॒र्यः॒ । अ॒न्याभिः॑ । अ॒ङ्गुलि॑भि॒रित्य॒ङ्गुलि॑ - भिः॒ । तस्मा᳚त् । सर्वाः᳚ । अनु॑ । समिति॑ । च॒र॒ति॒ । यत् । स॒ह । सर्वा॑भिः । मिमी॑त । सꣳश्लि॑ष्टा॒ इति॒ सं - श्लि॒ष्टाः॒ । अ॒ङ्गुल॑यः । जा॒ये॒र॒न्न् । एक॑यैक॒येत्येक॑या-ए॒क॒या॒ । उ॒थ्सर्ग॒मित्यु॑त् - सर्ग᳚म् । मि॒मी॒ते॒ । तस्मा᳚त् । विभ॑क्ता॒ इति॒ वि - भ॒क्ताः॒ । जा॒य॒न्ते॒ । पञ्च॑ । कृत्वः॑ । यजु॑षा । मि॒मी॒ते॒ । पञ्चा᳚क्ष॒रेति॒ पञ्च॑ - अ॒क्ष॒रा॒ । प॒ङ्क्तिः । पाङ्क्तः॑ । य॒ज्ञ्ः । य॒ज्ञ्म् । ए॒व । अवेति॑ । रु॒न्धे॒ । पञ्च॑ । कृत्वः॑ । तू॒ष्णीम् ।