सा वा इ॒यꣳ सर्वै॒व वेदि॒रिय॑ति शक्ष्या॒मीति॒ त्वा अ॑व॒माय॑ यजन्ते त्रिꣳ॒॒शत् प॒दानि॑ प॒श्चात् ति॒रश्ची॑ भवति॒ षट्त्रिꣳ॑श॒त् प्राची॒ चतु॑र्विꣳशतिः पु॒रस्ता᳚त् ति॒रश्ची॒ दश॑दश॒ संप॑द्यन्ते॒ दशा᳚क्षरा वि॒राडन्नं॑ ॅवि॒राड् वि॒राजै॒वान्नाद्य॒मव॑ रुन्ध॒ उद्ध॑न्ति॒ यदे॒वास्या॑ अमे॒द्ध्यं तदप॑ ह॒न्त्युद्ध॑न्ति॒ तस्मा॒दोष॑धयः॒ परा॑ भवन्ति ( ) ब॒र्॒.हिः स्तृ॑णाति॒ तस्मा॒दोष॑धयः॒ पुन॒रा भ॑व॒न्त्युत्त॑रं ब॒र्॒.हिष॑ उत्तरब॒र्॒.हिः स्तृ॑णाति प्र॒जा वै ब॒र्॒.हिर्यज॑मान उत्तर ब॒र्॒.हि र्यज॑मान-मे॒वा-य॑जमाना॒दुत्त॑रं करोति॒ तस्मा॒द्-यज॑मा॒नो ऽय॑जमाना॒दुत्त॑रः ॥
पदपाठः (Word-by-word)
सा । वै । इ॒यम् । सर्वा᳚ । ए॒व । वेदिः॑ । इय॑ति । श॒क्ष्या॒मि॒ । इति॑ । तु । वै । अ॒व॒मायेत्य॑व - माय॑ । य॒ज॒न्ते॒ । त्रिꣳ॒॒शत् । प॒दानि॑ । प॒श्चात् । ति॒रश्ची᳚ । भ॒व॒ति॒ । षट्त्रिꣳ॑श॒दिति॒ षट् - त्रिꣳ॒॒श॒त् । प्राची᳚ । चतु॑र्विꣳशति॒रिति॒ चतुः॑ - विꣳ॒॒श॒तिः॒ । पु॒रस्ता᳚त् । ति॒रश्ची᳚ । दश॑द॒शेति॒ दश॑-द॒श॒ । समिति॑ । प॒द्य॒न्ते॒ । दशा᳚क्ष॒रेति॒ दश॑ - अ॒क्ष॒रा॒ । वि॒राडिति॑ वि - राट् । अन्न᳚म् । वि॒राडिति॑ वि - राट् । वि॒राजेति॑ वि - राजा᳚ । ए॒व । अ॒न्नाद्य॒मित्य॑न्न - अद्य᳚म् । अवेति॑ । रु॒न्धे॒ । उदिति॑ । ह॒न्ति॒ । यत् । ए॒व । अ॒स्याः॒ । अ॒मे॒द्ध्यम् । तत् । अपेति॑ । ह॒न्ति॒ । उदिति॑ । ह॒न्ति॒ । तस्मा᳚त् । ओष॑धयः । परेति॑ । भ॒व॒न्ति॒ ( ) । ब॒र्॒.हिः । स्तृ॒णा॒ति॒ । तस्मा᳚त् । ओष॑धयः । पुनः॑ । एति॑ । भ॒व॒न्ति॒ । उत्त॑र॒मित्युत् - त॒र॒म् । ब॒र्॒.हिषः॑ । उ॒त्त॒र॒ब॒र्॒.हिरित्यु॑त्तर - ब॒र्॒.हिः । स्तृ॒णा॒ति॒ । प्र॒जा इति॑ प्र - जाः । वै । ब॒र्॒.हिः । यज॑मानः । उ॒त्त॒र॒ब॒र॒.हिरित्यु॑त्तर - ब॒र॒.हिः । यज॑मानम् । ए॒व । अय॑जमानात् । उत्त॑र॒मित्युत् - त॒र॒म् । क॒रो॒ति॒ । तस्मा᳚त् । यज॑मानः । अय॑जमानात् । उत्त॑र॒ इत्युत् - त॒रः॒ ॥