ॅवदन्ति॒ यद्-घृ॒तेन॑ पात्नीव॒तꣳ श्री॒णाति॒ वज्रे॑णै॒वैनं॒ ॅवशे॑ कृ॒त्वा गृ॑ह्णा-त्युपया॒मगृ॑हीतो॒ऽसीत्या॑हे॒यं ॅवा उ॑पया॒मस्तस्मा॑दि॒मां प्र॒जा अनु॒ प्र जा॑यन्ते॒ बृह॒स्पति॑सुतस्य त॒ इत्या॑ह॒ ब्रह्म॒ वै दे॒वानां॒ बृह॒स्पति॒र्ब्रह्म॑णै॒वास्मै᳚ प्र॒जाः प्र ज॑नयतीन्दो॒ इत्या॑ह॒ रेतो॒ वा इन्दू॒ रेत॑ ए॒व तद्-द॑धातीन्द्रियाव॒ इ- [ ]
पदपाठः (Word-by-word)
व॒द॒न्ति॒ । यत् । घृ॒तेन॑ । पा॒त्नी॒व॒तमिति॑ पात्नी - व॒तम् । श्री॒णाति॑ । वज्रे॑ण । ए॒व । ए॒न॒म् । वशे᳚ । कृ॒त्वा । गृ॒ह्णा॒ति॒ । उ॒प॒या॒मगृ॑हीत॒ इत्यु॑पया॒म - गृ॒ही॒तः॒ । अ॒सि॒ । इति॑ । आ॒ह॒ । इ॒यम् । वै । उ॒प॒या॒म इत्यु॑प - या॒मः । तस्मा᳚त् । इ॒माम् । प्र॒जा इति॑ प्र - जाः । अनु॑ । प्रेति॑ । जा॒य॒न्ते॒ । बृह॒स्पति॑सुत॒स्येति॒ बृह॒स्पति॑-सु॒त॒स्य॒ । ते॒ । इति॑ । आ॒ह॒ । ब्रह्म॑ । वै । दे॒वाना᳚म् । बृह॒स्पतिः॑ । ब्रह्म॑णा । ए॒व । अ॒स्मै॒ । प्र॒जा इति॑ प्र - जाः । प्रेति॑ । ज॒न॒य॒ति॒ । इ॒न्दो॒ इति॑ । इति॑ । आ॒ह॒ । रेतः॑ । वै । इन्दुः॑ । रेतः॑ । ए॒व । तत् । द॒धा॒ति॒ । इ॒न्द्रि॒या॒व॒ इती᳚न्द्रिय - वः॒ । इति॑ ।