प्र य॑न्धि ॥ प्र॒दा॒तारꣳ॑ हवामह॒ इन्द्र॒मा ह॒विषा॑ व॒यं । उ॒भा हि हस्ता॒ वसु॑ना पृ॒णस्वा ऽऽ प्र य॑च्छ॒ दक्षि॑णा॒दोत स॒व्यात् ॥ प्र॒दा॒ता व॒ज्री वृ॑ष॒भस्तु॑रा॒षाट्छु॒ष्मी राजा॑ वृत्र॒हा सो॑म॒पावा᳚ । अ॒स्मिन्. य॒ज्ञे ब॒र्॒.हिष्या नि॒षद्याथा॑ भव॒ यज॑मानाय॒ शं ॅयोः ॥ इन्द्रः॑ सु॒त्रामा॒ स्ववाꣳ॒॒ अवो॑भिः सुमृडी॒को भ॑वतु वि॒श्ववे॑दाः । बाध॑तां॒ द्वेषो॒ अभ॑यं कृणोतु सु॒वीर्य॑स्य॒ - [ ]
पदपाठः (Word-by-word)
प्रेति॑ । य॒न्धि॒ ॥ प्र॒दा॒तार॒मिति॑ प्र - दा॒तार᳚म् । ह॒वा॒म॒हे॒ । इन्द्र᳚म् । एति॑ । ह॒विषा᳚ । व॒यम् ॥ उ॒भा । हि । हस्ता᳚ । वसु॑ना । पृ॒णस्व॑ । आ । प्रेति॑ । य॒च्छ॒ । दक्षि॑णात् । एति॑ । उ॒त । स॒व्यात् ॥ प्र॒दा॒तेति॑ प्र - दा॒ता । व॒ज्री । वृ॒ष॒भः । तु॒रा॒षाट् । शु॒ष्मी । राजा᳚ । वृ॒त्र॒हेति॑ वृत्र - हा । सो॒म॒पावेति॑ सोम - पावा᳚ ॥ अ॒स्मिन्न् । य॒ज्ञे । ब॒र्॒.हिषि॑ । एति॑ । नि॒षद्येति॑ नि - सद्य॑ । अथ॑ । भ॒व॒ । यज॑मानाय । शम् । योः ॥ इन्द्रः॑ । सु॒त्रामेति॑ सु - त्रामा᳚ । स्ववा॒निति॒ स्व-वा॒न् । अवो॑भि॒रित्यवः॑ - भिः॒ । सु॒मृ॒डी॒क इति॑ सु - मृ॒डी॒कः । भ॒व॒तु॒ । वि॒श्ववे॑दा॒ इति॑ वि॒श्व-वे॒दाः॒ ॥ बाध॑ताम् । द्वेषः॑ । अभ॑यम् । कृ॒णो॒तु॒ । सु॒वीर्य॒स्येति॑ सु - वीर्य॑स्य ।