मे॒वैतामा शा᳚स्ते॒ समि॑द्धो अग्ने मे दीदिहि समे॒द्धा ते॑ अग्ने दीद्यास॒मित्या॑ह यथाय॒जु-रे॒वैतद्वसु॑मान्. य॒ज्ञो वसी॑यान् भूयास॒-मित्या॑हा॒-ऽऽशिष॑मे॒वेतामा शा᳚स्ते ब॒हु वै गार्.ह॑पत्य॒स्यान्ते॑ मि॒श्रमि॑व चर्यत आग्निपावमा॒नीभ्यां॒ गार्.ह॑पत्य॒मुप॑ तिष्ठते पु॒नात्ये॒वाग्निं पु॑नी॒त आ॒त्मानं॒ द्वाभ्यां॒ प्रति॑ष्ठित्या॒ अग्ने॑ गृहपत॒ इत्या॑ह - [ ]
पदपाठः (Word-by-word)
ए॒व । ए॒ताम् । एति॑ । शा॒स्ते॒ । समि॑द्ध॒ इति॒ सं - इ॒द्धः॒ । अ॒ग्ने॒ । मे॒ । दी॒दि॒हि॒ । स॒मे॒द्धेति॑ सं - ए॒द्धा । ते॒ । अ॒ग्ने॒ । दी॒द्या॒स॒म् । इति॑ । आ॒ह॒ । य॒था॒य॒जुरिति॑ यथा - य॒जुः । ए॒व । ए॒तत् । वसु॑मा॒निति॒ वसु॑ - मा॒न् । य॒ज्ञ्ः । वसी॑यान् । भू॒या॒स॒म् । इति॑ । आ॒ह॒ । आ॒शिष॒मित्या᳚-शिष᳚म् । ए॒व । ए॒ताम् । एति॑ । शा॒स्ते॒ । ब॒हु । वै । गार्.ह॑पत्य॒स्येति॒ गार्.ह॑ - प॒त्य॒स्य॒ । अन्ते᳚ । मि॒श्रम् । इ॒व॒ । च॒र्य॒ते॒ । आ॒ग्नि॒पा॒व॒मा॒नीभ्या॒मित्या᳚ग्नि - पा॒व॒मा॒नीभ्या᳚म् । गार्.ह॑पत्य॒मिति॒ गार्.ह॑ - प॒त्य॒म् । उपेति॑ । ति॒ष्ठ॒ते॒ । पु॒नाति॑ । ए॒व । अ॒ग्निम् । पु॒नी॒ते । आ॒त्मान᳚म् । द्वाभ्या᳚म् । प्रति॑ष्ठित्या॒ इति॒ प्रति॑ - स्थि॒त्यै॒ । अग्ने᳚ । गृ॒ह॒प॒त॒ इति॑ गृह - प॒ते॒ । इति॑ । आ॒ह॒ ।