काष्ठां᳚ गच्छत॒ वाजे॑वाजेऽवत वाजिनो नो॒ धने॑षु विप्रा अमृता ऋतज्ञाः ॥ अ॒स्य मद्ध्वः॑ पिबत मा॒दय॑द्ध्वं तृ॒प्ता या॑त प॒थिभि॑र् देव॒यानैः᳚ ॥ ते नो॒ अर्व॑न्तो हवन॒श्रुतो॒ हवं॒ ॅविश्वे॑ शृण्वन्तु वा॒जिनः॑ ॥ मि॒तद्र॑वः सहस्र॒सा मे॒धसा॑ता सनि॒ष्यवः॑ । म॒हो ये रत्नꣳ॑ समि॒थेषु॑ जभ्रि॒रे शन्नो॑ भवन्तु वा॒जिनो॒ हवे॑षु ॥दे॒वता॑ता मि॒तद्र॑वः स्व॒र्काः । जं॒भय॒न्तोऽहिं॒ ॅवृकꣳ॒॒ रक्षाꣳ॑सि॒ सने᳚म्य॒स्मद्यु॑यव॒ - [ ]
पदपाठः (Word-by-word)
काष्ठा᳚म् । ग॒च्छ॒त॒ । वाजे॑वाज॒ इति॒ वाजे᳚-वा॒जे॒ । अ॒व॒त॒ । वा॒जि॒नः॒ । नः॒ । धने॑षु । वि॒प्राः॒ । अ॒मृ॒ताः॒ । ऋ॒त॒ज्ञा॒ इत्यृ॑त - ज्ञाः॒ ॥ अ॒स्य । मद्ध्वः॑ । पि॒ब॒त॒ । मा॒दय॑द्ध्वम् । तृ॒प्ताः । या॒त॒ । प॒थिभि॒रिति॑ प॒थि - भिः॒ । दे॒व॒यान॒रिति॑ देव - यानैः᳚ ॥ ते । नः॒ । अर्व॑न्तः । ह॒व॒न॒श्रुत॒ इति॑ हवन - श्रुतः॑ । हव᳚म् । विश्वे᳚ । शृ॒ण्व॒न्तु॒ । वा॒जिनः॑ ॥ मि॒तद्र॑व॒ इति॑ मि॒त - द्र॒वः॒ । स॒ह॒स्र॒सा इति॑ सहस्र-साः । मे॒धसा॒तेति॑ मे॒ध-सा॒ता॒ । स॒नि॒ष्यवः॑ ॥ म॒हः । ये । रत्न᳚म् । स॒मि॒थेष्विति॑ सं - इ॒थेषु॑ । ज॒भ्रि॒रे । शम् । नः॒ । भ॒व॒न्तु॒ । वा॒जिनः॑ । हवे॑षु ॥ दे॒वता॒तेति॑ दे॒व - ता॒ता॒ । मि॒तद्र॑व॒ इति॑ मि॒त - द्र॒वः॒ । स्व॒र्का इति॑ सू - अ॒र्काः ॥ ज॒भंय॑न्तः । अहि᳚म् । वृक᳚म् । रक्षाꣳ॑सि । सने॑मि । अ॒स्मत् । यु॒य॒व॒न्न् ।