संॅवथ्स॒रादपि॑ रोहा॒दित्य॑ब्रवी॒त् तस्मा᳚त् पु॒रा सं॑ॅवथ्स॒रात् पृ॑थि॒व्यै खा॒तमपि॑ रोहति॒ वारे॑वृतꣳ॒॒ ह्य॑स्यै॒ तृती॑यं ब्रह्मह॒त्यायै॒ प्रत्य॑गृह्णा॒त् तथ् स्वकृ॑त॒मिरि॑णमभव॒त् तस्मा॒दाहि॑ताग्निः श्र॒द्धादे॑वः॒ स्वकृ॑त॒ इरि॑णे॒ नाव॑ स्येद्-ब्रह्मह॒त्यायै॒ ह्ये॑ष वर्णः॒ स वन॒स्पती॒नुपा॑सीदद॒स्यै ब्र॑ह्मह॒त्यायै॒ तृती॑यं॒ प्रति॑ गृह्णी॒तेति॒ ते᳚ऽब्रुव॒न् वरं॑ ॅवृणामहै वृ॒क्णात् - [ ]
पदपाठः (Word-by-word)
सं॒ॅव॒थ्स॒रादिति॑ सं - व॒थ्स॒रात् । अपीति॑ । रो॒हा॒त् । इति॑ । अ॒ब्र॒वी॒त् । तस्मा᳚त् । पु॒रा । सं॒ॅव॒थ्स॒रादिति॑ सं - व॒थ्स॒रात् । पृ॒थि॒व्यै । खा॒तम् । अपीति॑ । रो॒ह॒ति॒ । वारे॑वृत॒मिति॒ वारे᳚ - वृ॒त॒म् । हि । अ॒स्यै॒ । तृती॑यम् । ब्र॒ह्म॒ह॒त्याया॒ इति॑ ब्रह्म - ह॒त्यायै᳚ । प्रतीति॑ । अ॒गृ॒ह्णा॒त् । तत् । स्वकृ॑त॒मिति॒ स्व - कृ॒त॒म् । इरि॑णम् । अ॒भ॒व॒त् । तस्मा᳚त् । आहि॑ताग्नि॒रित्याहि॑त - अ॒ग्निः॒ । श्र॒द्धादे॑व॒ इति॑ श्र॒द्धा - दे॒वः॒ । स्वकृ॑त॒ इति॒ स्व - कृ॒ते॒ । इरि॑णे । न । अवेति॑ । स्ये॒त् । ब्र॒ह्म॒ह॒त्याया॒ इति॑ ब्रह्म - ह॒त्यायै᳚ । हि । ए॒षः । वर्णः॑ । सः । वन॒स्पतीन्॑ । उपेति॑ । अ॒सी॒द॒त् । अ॒स्यै । ब्र॒ह्म॒ह॒त्याया॒ इति॑ ब्रह्म - ह॒त्यायै᳚ । तृती॑यम् । प्रतीति॑ । गृ॒ह्णी॒त॒ । इति॑ । ते । अ॒ब्रु॒व॒न्न् । वर᳚म् । वृ॒णा॒म॒है॒ । वृ॒क्णात् ।