ते ए॑नम॒भि सम॑नह्येतां॒ तं ॅयक्ष्म॑ आर्च्छ॒द्-राजा॑नं॒ ॅयक्ष्म॑ आर॒दिति॒ तद्-रा॑जय॒क्ष्मस्य॒ जन्म॒ यत् पापी॑या॒नभ॑व॒त् तत् पा॑पय॒क्ष्मस्य॒ यज्जा॒याभ्या॒मवि॑न्द॒त् तज्जा॒येन्य॑स्य॒ य ए॒वमे॒तेषां॒ ॅयक्ष्मा॑णां॒ जन्म॒ वेद॒ नैन॑मे॒ते यक्ष्मा॑विन्दन्ति॒ स ए॒ते ए॒व न॑म॒स्यन्नुपा॑धाव॒त् ते अ॑ब्रूतां॒ ॅवरं॑ ॅवृणावहा आ॒वं दे॒वानां᳚ भाग॒धे अ॑सावा॒ - [ ]
पदपाठः (Word-by-word)
ते इति॑ । ए॒न॒म् । अ॒भि । समिति॑ । अ॒न॒ह्ये॒ता॒म् । तम् । यक्ष्मः॑ । आ॒र्च्छ॒त् । राजा॑नम् । यक्ष्मः॑ । आ॒र॒त् । इति॑ । तत् । रा॒ज॒य॒क्ष्मस्येति॑ राज - य॒क्ष्मस्य॑ । जन्म॑ । यत् । पापी॑यान् । अभ॑वत् । तत् । पा॒प॒य॒क्ष्मस्येति॑ पाप - य॒क्ष्मस्य॑ । यत् । जा॒याभ्या᳚म् । अवि॑न्दत् । तत् । जा॒येन्य॑स्य । यः । ए॒वम् । ए॒तेषा᳚म् । यक्ष्मा॑णाम् । जन्म॑ । वेद॑ । न । ए॒न॒म् । ए॒ते । यक्ष्माः᳚ । वि॒न्द॒न्ति॒ । सः । ए॒ते इति॑ । ए॒व । न॒म॒स्यन्न् । उपेति॑ । अ॒धा॒व॒त् । ते इति॑ । अ॒ब्रू॒ता॒म् । वर᳚म् । वृ॒णा॒व॒है॒ । आ॒वम् । दे॒वाना᳚म् । भा॒ग॒धे इति॑ भाग - धे । अ॒सा॒व॒ ।