वा अ॑र्द्धमा॒सस्य॒ रात्र॑योऽर्द्धमास॒शः सं॑ॅवथ्स॒र आ᳚प्यते॒ तासां॒ त्रीणि॑ च श॒तानि॑ ष॒ष्टिश्चा॒क्षरा॑णि॒ ताव॑तीः संॅवथ्स॒रस्य॒ रात्र॑योऽक्षर॒श ए॒व सं॑ॅवथ्स॒रमा᳚प्नोति नृ॒मेध॑श्च॒ परु॑च्छेपश्च ब्रह्म॒वाद्य॑मवदेताम॒स्मिन् दारा॑वा॒र्द्रे᳚ऽग्निं ज॑नयाव यत॒रो नौ॒ ब्रह्मी॑या॒निति॑ नृ॒मेधो॒ऽभ्य॑वद॒थ् स धू॒मम॑जनय॒त् परु॑च्छेपो॒ ऽभ्य॑वद॒थ् सो᳚ऽग्निम॑जनय॒दृष॒ इत्य॑ब्रवी॒द्- [ ]
पदपाठः (Word-by-word)
वै । अ॒र्द्ध॒मा॒सस्येत्य॑र्द्ध - मा॒सस्य॑ । रात्र॑यः । अ॒र्द्ध॒मा॒स॒श इत्य॑र्द्धमास - शः । सं॒ॅव॒थ्स॒र इति॑ सं - व॒थ्स॒रः । आ॒प्य॒ते॒ । तासा᳚म् । त्रीणि॑ । च॒ । श॒तानि॑ । ष॒ष्टिः । च॒ । अ॒क्षरा॑णि । ताव॑तीः । सं॒ॅव॒थ्स॒रस्येति॑ सं - व॒थ्स॒रस्य॑ । रात्र॑यः । अ॒क्ष॒र॒श इत्य॑क्षर-शः । ए॒व । सं॒ॅव॒थ्स॒रमिति॑ सं - व॒थ्स॒रम् । आ॒प्नो॒ति॒ । नृ॒मेध॒ इति॑ नृ - मेधः॑ । च॒ । परु॑च्छेपः । च॒ । ब्र॒ह्म॒वाद्य॒मिति॑ ब्रह्म - वाद्य᳚म् । अ॒व॒दे॒ता॒म् । अ॒स्मिन्न् । दारौ᳚ । आ॒र्द्रे । अ॒ग्निम् । ज॒न॒या॒व॒ । य॒त॒रः । नौ॒ । ब्रह्मी॑यान् । इति॑ । नृ॒मेध॒ इति॑ नृ - मेधः॑ । अ॒भीति॑ । अ॒व॒द॒त् । सः । धू॒मम् । अ॒ज॒न॒य॒त् । परु॑च्छेपः । अ॒भीति॑ । अ॒व॒द॒त् । सः । अ॒ग्निम् । अ॒ज॒न॒य॒त् । ऋषे᳚ । इति॑ । अ॒ब्र॒वी॒त् ।