यथ् स॒माव॑द्वि॒द्व क॒था त्वम॒ग्निमजी॑जनो॒ नाहमिति॑ सामिधे॒नीना॑मे॒वाहं ॅवर्णं॑ ॅवे॒देत्य॑ब्रवी॒द्यद् घृ॒तव॑त् प॒दम॑नू॒च्यते॒ स आ॑सां॒ ॅवर्ण॒स्तं त्वा॑ स॒मिद्भि॑रङ्गिर॒ इत्या॑ह सामिधे॒नीष्वे॒व तज्ज्योति॑ र्जनयति॒ स्त्रिय॒स्तेन॒ यदृचः॒ स्त्रिय॒स्तेन॒ यद्-गा॑य॒त्रियः॒ स्त्रिय॒स्तेन॒ यथ् सा॑मिधे॒न्यो॑ वृष॑ण्वती॒-मन्वा॑ह॒ - [ ]
पदपाठः (Word-by-word)
यत् । स॒माव॑त् । वि॒द्व । क॒था । त्वम् । अ॒ग्निम् । अजी॑जनः । न । अ॒हम् । इति॑ । सा॒मि॒धे॒नीना॒मिति॑ सां - इ॒धे॒नीना᳚म् । ए॒व । अ॒हम् । वर्ण᳚म् । वे॒द॒ । इति॑ । अ॒ब्र॒वी॒त् । यत् । घृ॒तव॒दिति॑ घृ॒त-व॒त् । प॒दम् । अ॒नू॒च्यत॒ इत्य॑नु - उ॒च्यते᳚ । सः । आ॒सा॒म् । वर्णः॑ । तम् । त्वा॒ । स॒मिद्भि॒रिति॑ स॒मित् - भिः॒ । अ॒ङ्गि॒रः॒ । इति॑ । आ॒ह॒ । सा॒मि॒धे॒नीष्विति॑ सां - इ॒धे॒नीषु॑ । ए॒व । तत् । ज्योतिः॑ । ज॒न॒य॒ति॒ । स्त्रियः॑ । तेन॑ । यत् । ऋचः॑ । स्त्रियः॑ । तेन॑ । यत् । गा॒य॒त्रियः॑ । स्त्रियः॑ । तेन॑ । यत् । सा॒मि॒धे॒न्य॑ इति॑ सां - इ॒धे॒न्यः॑ । वृष॑ण्वती॒मिति॒ वृषण्॑ - व॒ती॒म् । अन्विति॑ । आ॒ह॒ ।