तेन॒ पुꣳस्व॑ती॒स्तेन॒ सेन्द्रा॒स्तेन॑ मिथु॒ना अ॒ग्निर्दे॒वानां᳚ दू॒त आसी॑दु॒शना॑ का॒व्योऽसु॑राणां॒ तौ प्र॒जाप॑तिं प्र॒श्नमै॑ताꣳ॒॒ स प्र॒जाप॑तिर॒ग्निं दू॒तं ॅवृ॑णीमह॒ इत्य॒भि प॒र्याव॑र्तत॒ ततो॑ दे॒वा अभ॑व॒न् पराऽसु॑रा॒ यस्यै॒वं ॅवि॒दुषो॒ऽग्निं दू॒तं ॅवृ॑णीमह॒ इत्य॒न्वाह॒ भव॑त्या॒त्मना॒ परा᳚ऽस्य॒ भ्रातृ॑व्यो भवत्यद्ध्व॒रव॑ती॒मन्वा॑ह॒ भ्रातृ॑व्यमे॒वैतया᳚ - [ ]
पदपाठः (Word-by-word)
तेन॑ । पुꣳस्व॑तीः । तेन॑ । सेन्द्रा॒ इति॒ स - इ॒न्द्राः॒ । तेन॑ । मि॒थु॒नाः । अ॒ग्निः । दे॒वाना᳚म् । दू॒तः । आसी᳚त् । उ॒शना᳚ । का॒व्यः । असु॑राणाम् । तौ । प्र॒जाप॑ति॒मिति॑ प्र॒जा - प॒ति॒म् । प्र॒श्नम् । ऐ॒ता॒म् । सः । प्र॒जाप॑ति॒रिति॑ प्र॒जा - प॒तिः॒ । अ॒ग्निम् । दू॒तम् । वृ॒णी॒म॒हे॒ । इति॑ । अ॒भीति॑ । प॒र्याव॑र्त॒तेति॑ परि - आव॑र्तत । ततः॑ । दे॒वाः । अभ॑वन्न् । परेति॑ । असु॑राः । यस्य॑ । ए॒वम् । वि॒दुषः॑ । अ॒ग्निम् । दू॒तम् । वृ॒णी॒म॒हे॒ । इति॑ । अ॒न्वाहेत्य॑नु - आह॑ । भव॑ति । आ॒त्मना᳚ । परेति॑ । अ॒स्य॒ । भ्रातृ॑व्यः । भ॒व॒ति॒ । अ॒द्ध्व॒रव॑ती॒मित्य॑द्ध्व॒र-व॒ती॒म् । अन्वति॑ । आ॒ह॒ । भ्रातृ॑व्यम् । ए॒व । ए॒तया᳚ ।