तर॑ति॒ तूर्णि॑र्. हव्य॒वाडित्या॑ह॒ सर्वꣳ॒॒ह्ये॑ष तर॒त्यास्पात्रं॑ जु॒हूर्दे॒वाना॒मित्या॑ह जु॒हूर्ह्ये॑ष दे॒वानां᳚ चम॒सो दे॑व॒पान॒ इत्या॑ह चम॒सो ह्ये॑ष दे॑व॒पानो॒ऽराꣳ इ॑वाग्ने ने॒मिर्दे॒वाꣳस्त्वं प॑रि॒भूर॒सीत्या॑ह दे॒वान् ह्ये॑ष प॑रि॒भूर्यद्-ब्रू॒यादा व॑ह दे॒वान् दे॑वय॒ते यज॑माना॒येति॒ भ्रातृ॑व्यमस्मै- [ ]
पदपाठः (Word-by-word)
तर॑ति । तूर्णिः॑ । ह॒व्य॒वाडिति॑ हव्य - वाट् । इति॑ । आ॒ह॒ । सर्व᳚म् । हि । ए॒षः । तर॑ति । आस्पात्र᳚म् । जु॒हूः । दे॒वाना᳚म् । इति॑ । आ॒ह॒ । जु॒हूः । हि । ए॒षः । दे॒वाना᳚म् । च॒म॒सः । दे॒व॒पान॒ इति॑ देव - पानः॑ । इति॑ । आ॒ह॒ । च॒म॒सः । हि । ए॒षः । दे॒व॒पान॒ इति॑ देव - पानः॑ । अ॒रान् । इ॒व॒ । अ॒ग्ने॒ । ने॒मिः । दे॒वान् । त्वम् । प॒रि॒भूरिति॑ परि-भूः । अ॒सि॒ । इति॑ । आ॒ह॒ । दे॒वान् । हि । ए॒षः । प॒रि॒भूरिति॑ परि - भूः । यत् । ब्रू॒यात् । एति॑ । व॒ह॒ । दे॒वान् । दे॒व॒य॒त इति॑ देव - य॒ते । यज॑मानाय । इति॑ । भ्रातृ॑व्यम् । अ॒स्मै॒ ।