यद्-द्वे इ॑व ब्रू॒याद् भ्रातृ॑व्यमस्मै जनयेद् घृ॒तव॑तीमद्ध्वर्यो॒ स्रुच॒माऽस्य॒स्वेत्या॑ह॒ यज॑मान मे॒वैतेन॑ वर्द्धयति देवा॒युव॒मित्या॑ह दे॒वान्. ह्ये॑षाऽव॑ति वि॒श्ववा॑रा॒मित्या॑ह॒ विश्वꣳ॒॒ ह्ये॑षाऽव॒तीडा॑महै दे॒वाꣳ ई॒डेन्या᳚न्नम॒स्याम॑ नम॒स्यान्॑ यजा॑म य॒ज्ञिया॒नित्या॑हमनु॒ष्या॑ वा ई॒डेन्याः᳚ पि॒तरो॑ नम॒स्या॑ दे॒वा य॒ज्ञिया॑ दे॒वता॑ ए॒व ( ) तद्-य॑थाभा॒गं ॅय॑जति ॥
पदपाठः (Word-by-word)
यत् । द्वे इति॑ । इ॒व॒ । ब्रू॒यात् । भ्रातृ॑व्यम् । अ॒स्मै॒ । ज॒न॒ये॒त् । घृ॒तव॑ती॒मिति॑ घृ॒त - व॒ती॒म् । अ॒द्ध्व॒र्यो॒ इति॑ । स्रुच᳚म् । एति॑ । अ॒स्य॒स्व॒ । इति॑ । आ॒ह॒ । यज॑मानम् । ए॒व । ए॒तेन॑ । व॒द्र्ध॒य॒ति॒ । दे॒वा॒युव॒मिति॑ देव - युव᳚म् । इति॑ । आ॒ह॒ । दे॒वान् । हि । ए॒षा । अव॑ति । वि॒श्ववा॑रा॒मिति॑ वि॒श्व-वा॒रा॒म् । इति॑ । आ॒ह॒ । विश्व᳚म् । हि । ए॒षा । अव॑ति । ईडा॑महै । दे॒वान् । ई॒डेन्यान्॑ । न॒म॒स्याम॑ । न॒म॒स्यान्॑ । यजा॑म । य॒ज्ञियान्॑ । इति॑ । आ॒ह॒ । म॒नु॒ष्याः᳚ । वै । ई॒डेन्याः᳚ । पि॒तरः॑ । न॒म॒स्याः᳚ । दे॒वाः । य॒ज्ञियाः᳚ । दे॒वताः᳚ । ए॒व ( ) । तत् । य॒था॒भा॒गमिति॑ यथा - भा॒गम् । य॒ज॒ति॒ ॥