वाचयति॒ ब्रह्म॑णै॒व क्ष॒त्रꣳ सꣳ श्य॑ति क्ष॒त्रेण॒ ब्रह्म॒ तस्मा᳚द् ब्राह्म॒णो रा॑ज॒न्य॑वा॒नत्य॒न्यं ब्रा᳚ह्म॒णं तस्मा᳚द्-राज॒न्यो᳚ ब्राह्म॒णवा॒नत्य॒न्यꣳ रा॑ज॒न्यं॑ मृ॒त्युर्वा ए॒ष यद॒ग्निर॒मृतꣳ॒॒ हिर॑ण्यꣳ रु॒क्ममन्त॑रं॒ प्रति॑मुञ्चते॒ ऽमृत॑मे॒व मृ॒त्योर॒न्तर्द्ध॑त्त॒ एक॑विꣳशतिनिर्बाधो भव॒त्येक॑विꣳशति॒र्वै दे॑वलो॒का द्वाद॑श॒ मासाः॒ पञ्च॒र्तव॒स्त्रय॑ इ॒मे लो॒का अ॒सावा॑दि॒त्य - [ ]
पदपाठः (Word-by-word)
वा॒च॒य॒ति॒ । ब्रह्म॑णा । ए॒व । क्ष॒त्रम् । समिति॑ । श्य॒ति॒ । क्ष॒त्रेण॑ । ब्रह्म॑ । तस्मा᳚त् । ब्रा॒ह्म॒णः । रा॒ज॒न्य॑वा॒निति॑ राज॒न्य॑ - वा॒न् । अतीति॑ । अ॒न्यम् । ब्रा॒ह्म॒णम् । तस्मा᳚त् । रा॒ज॒न्यः॑ । ब्रा॒ह्म॒णवा॒निति॑ ब्राह्म॒ण - वा॒न् । अतीति॑ । अ॒न्यम् । रा॒ज॒न्य᳚म् । मृ॒त्युः । वै । ए॒षः । यत् । अ॒ग्निः । अ॒मृत᳚म् । हिर॑ण्यम् । रु॒क्मम् । अन्त॑रम् । प्रतीति॑ । मु॒ञ्च॒ते॒ । अ॒मृत᳚म् । ए॒व । मृ॒त्योः । अ॒न्तः । ध॒त्ते॒ । एक॑विꣳशतिनिर्बाध॒ इत्येक॑विꣳशति - नि॒र्बा॒धः॒ । भ॒व॒ति॒ । एक॑विꣳशति॒रित्येक॑-विꣳ॒॒श॒तिः॒ । वै । दे॒व॒लो॒का इति॑ देव-लो॒काः । द्वाद॑श । मासाः᳚ । पञ्च॑ । ऋ॒तवः॑ । त्रयः॑ । इ॒मे । लो॒काः । अ॒सौ । आ॒दि॒त्यः ।