आ॒त्मान॒मा ऽप्री॑णीत॒ यदे॒ता आ॒प्रियो॒ भव॑न्ति य॒ज्ञो वै प्र॒जाप॑ति-र्य॒ज्ञ्मे॒वैताभि॑र्मुख॒त आ प्री॑णा॒त्य-प॑रिमितछन्दसो भव॒न्त्यप॑रिमितः प्र॒जाप॑तिः प्र॒जाप॑ते॒राप्त्या॑ ऊनातिरि॒क्ता मि॑थु॒नाः प्रजा᳚त्यै लोम॒शं ॅवै नामै॒तच्छन्दः॑ प्र॒जाप॑तेः प॒शवो॑ लोम॒शाः प॒शूने॒वाऽव॑ रुन्धे॒ सर्वा॑णि॒ वा ए॒ता रू॒पाणि॒ सर्वा॑णि रू॒पाण्य॒ग्नौ चित्ये᳚ क्रियन्ते॒ तस्मा॑दे॒ता अ॒ग्नेश्चित्य॑स्य - [ ]
पदपाठः (Word-by-word)
आ॒त्मान᳚म् । एति॑ । अ॒प्री॒णी॒त॒ । यत् । ए॒ताः । आ॒प्रिय॒ इत्या᳚-प्रियः॑ । भव॑न्ति । य॒ज्ञ्ः । वै । प्र॒जाप॑ति॒रिति॑ प्र॒जा - प॒तिः॒ । य॒ज्ञ्म् । ए॒व । ए॒ताभिः॑ । मु॒ख॒तः । एति॑ । प्री॒णा॒ति॒ । अप॑रिमितछन्दस॒ इत्यप॑रिमित - छ॒न्द॒सः॒ । भ॒व॒न्ति॒ । अप॑रिमित॒ इत्यप॑रि - मि॒तः॒ । प्र॒जाप॑ति॒रिति॑ प्र॒जा - प॒तिः॒ । प्र॒जाप॑ते॒रिति॑ प्र॒जा - प॒तेः॒ । आप्त्यै᳚ । ऊ॒ना॒ति॒रि॒क्ता इत्यू॑न - अ॒ति॒रि॒क्ताः । मि॒थु॒नाः । प्रजा᳚त्या॒ इति॒ प्र - जा॒त्यै॒ । लो॒म॒शम् । वै । नाम॑ । ए॒तत् । छन्दः॑ । प्र॒जाप॑ते॒रिति॑ प्र॒जा - प॒तेः॒ । प॒शवः॑ । लो॒म॒शाः । प॒शून् । ए॒व । अवेति॑ । रु॒न्धे॒ । सर्वा॑णि । वै । ए॒ताः । रू॒पाणि॑ । सर्वा॑णि । रू॒पाणि॑ । अ॒ग्नौ । चित्ये᳚ । क्रि॒य॒न्ते॒ । तस्मा᳚त् । ए॒ताः । अ॒ग्नेः । चित्य॑स्य ।