त्यृ॒तुभिः॑ संॅवथ्स॒रं ॅविश्वा॒ आ भा॑हि प्र॒दिशः॑ पृथि॒व्या इत्या॑ह॒ तस्मा॑द॒ग्निः सर्वा॒ दिशोऽनु॒ विभा॑ति॒ प्रत्यौ॑हताम॒श्विना॑ मृ॒त्युम॑स्मा॒दित्या॑ह मृ॒त्युमे॒वाऽस्मा॒दप॑ नुद॒त्युद्व॒यं तम॑स॒स्परीत्या॑ह पा॒प्मा वै तमः॑ पा॒प्मान॑मे॒वास्मा॒दप॑ ह॒न्त्यग॑न्म॒ ज्योति॑रुत्त॒म-मित्या॑हा॒ऽसौ वा आ॑दि॒त्यो ( ) ज्योति॑रुत्त॒म-मा॑दि॒त्यस्यै॒व सायु॑ज्यं गच्छति॒ न सं॑ॅवथ्स॒रस्ति॑ष्ठति॒ नास्य॒ श्रीस्ति॑ष्ठति॒ यस्यै॒ताः क्रि॒यन्ते॒ ज्योति॑ष्मती-मुत्त॒मामन्वा॑ह॒ ज्योति॑रे॒वास्मा॑ उ॒परि॑ष्टाद् दधाति सुव॒र्गस्य॑ लो॒कस्यानु॑ख्यात्यै ॥
पदपाठः (Word-by-word)
ऋ॒तुभि॒रित्यृ॒तु - भिः॒ । सं॒ॅव॒थ्स॒रमिति॑ सं - व॒थ्स॒रम् । विश्वाः᳚ । एति॑ । भा॒हि॒ । प्र॒दिश॒ इति॑ प्र - दिशः॑ । पृ॒थि॒व्याः । इति॑ । आ॒ह॒ । तस्मा᳚त् । अ॒ग्निः । सर्वाः᳚ । दिशः॑ । अनु॑ । वीति॑ । भा॒ति॒ । प्रतीति॑ । औ॒ह॒ता॒म् । अ॒श्विना᳚ । मृ॒त्युम् । अ॒स्मा॒त् । इति॑ । आ॒ह॒ । मृ॒त्युम् । ए॒व । अ॒स्मा॒त् । अपेति॑ । नु॒द॒ति॒ । उदिति॑ । व॒यम् । तम॑सः । परीति॑ । इति॑ । आ॒ह॒ । पा॒प्मा । वै । तमः॑ । पा॒प्मान᳚म् । ए॒व । अ॒स्मा॒त् । अपेति॑ । ह॒न्ति॒ । अग॑न्म । ज्योतिः॑ । उ॒त्त॒ममित्यु॑त् - त॒मम् । इति॑ । आ॒ह॒ । अ॒सौ । वै । आ॒दि॒त्यः ( ) । ज्योतिः॑ । उ॒त्त॒ममित्यु॑त्-त॒मम् । आ॒दि॒त्यस्य॑ । ए॒व । सायु॑ज्यम् । ग॒च्छ॒ति॒ । न । सं॒ॅव॒थ्स॒र इति॑ सं - व॒थ्स॒रः । ति॒ष्ठ॒ति॒ । न । अ॒स्य॒ । श्रीः । ति॒ष्ठ॒ति॒ । यस्य॑ । ए॒ताः । क्रि॒यन्ते᳚ । ज्योति॑ष्मतीम् । उ॒त्त॒मामित्यु॑त् - त॒माम् । अन्विति॑ । आ॒ह॒ । ज्योतिः॑ । ए॒व । अ॒स्मै॒ । उ॒परि॑ष्टात् । द॒धा॒ति॒ । सु॒व॒र्गस्येति॑ सुवः - गस्य॑ । लो॒कस्य॑ । अनु॑ख्यात्या॒ इत्यनु॑ - ख्या॒त्यै॒ ॥