प॒रे॒यु॒वाꣳस॑म् प्र॒वतो॑ म॒हीरनु॑ ब॒हुभ्यः॒ पन्था॑मनपस्पशा॒नम् । वै॒व॒स्व॒तꣳ स॒ङ्गम॑न॒म् जना॑नाम् ॅय॒मꣳ राजा॑नꣳ ह॒विषा॑ दुवस्यत ॥ इ॒दम् त्वा॒ वस्त्र॑म् प्रथ॒मं न्वाग॒न्नपै॒तदू॑ह॒ यदि॒हाबि॑भः पु॒रा । इ॒ष्टा॒पू॒र्तमनु॒ संप॑श्य॒ दक्षि॑णा॒म् ॅयथा॑ ते द॒त्तम् ब॑हु॒धा वि ब॑न्धुषु ॥ इ॒मौ यु॑नज्मि ते व॒ह्नी असु॑नीथाय वो॒ढवे᳚ । याभ्या᳚म् ॅय॒मस्य॒ साद॑नꣳ सु॒कृता॒म् चापि॑ गच्छतात् ॥ पू॒षा त्वे॒तश्च्या॑वयतु॒ प्रवि॒द्वा-नन॑ष्टपशु॒र्-भुव॑नस्य गो॒पाः । स त्वै॒तेभ्यः॒ परि॑ददात् पि॒तृभ्यो॒ऽग्निर्दे॒वेभ्यः॑ सुवि॒दत्रे᳚भ्यः ॥ पू॒षेमा आशा॒ अनु॑वेद॒ सर्वाः॒ सो अ॒स्माꣳ अभ॑यतमेन नेषत् । स्व॒स्ति॒दा अघृ॑णिः॒ सर्व॑वी॒रो-ऽप्र॑युच्छन्पु॒र ए॑तु॒ प्रवि॒द्वान् ।

आयु॑र्-वि॒श्वायुः॒ परि॑पासति त्वा पू॒षा त्वा॑ पातु॒ प्रप॑थे पु॒रस्ता᳚त् । यत्रास॑ते सु॒कृतो॒ यत्र॒ ते य॒युस्तत्र॑ त्वा दे॒वः स॑वि॒ता द॑धातु ॥ भुव॑नस्य पत इ॒दꣳ ह॒विः ॥ अ॒ग्नये॑ रयि॒मते॒ स्वाहा᳚ ॥ पुरु॑षस्य सयाव॒र्यपेद॒घानि॑ मृज्महे । यथा॑ नो॒ अत्र॒ नाप॑रः पु॒रा ज॒रस॒ आय॑ति ॥ पुरु॑षस्य सयावरि॒ वि ते᳚ प्रा॒णम॑सि स्रसम् । शरी॑रेण म॒हीमिहि॑ स्व॒धयेहि॑ पि॒तॄनुप॑ प्र॒जया॒ऽस्मानि॒हाव॑ह ॥ मैव॑म् माꣳ॒॒स्ता प्रि॑ये॒ऽहम् दे॒वी स॒ती पि॑तृलो॒कम् ॅयदैषि॑ । वि॒श्ववा॑रा॒ नभ॑सा॒ सम्ॅव्य॑यन्त्यु॒भौ नो॑ लो॒कौ पय॑सा॒ऽभ्याव॑वृथ्स्व ।

इ॒यम् नारी॑ पतिलो॒कम् ॅवृ॑णा॒ना निप॑द्यत॒ उप॑ त्वा मर्त्य॒ प्रेत᳚म् । विश्व॑म् पुरा॒णमनु॑ पा॒लय॑न्ती॒ तस्यै᳚ प्र॒जाम् द्रवि॑णम् चे॒ह धे॑हि ॥ उदी᳚र्ष्व नार्य॒भि जी॑वलो॒कमि॒तासु॑मे॒तमुप॑शेष॒ एहि॑ । ह॒स्त॒ग्रा॒भस्य॑ दिधि॒षोस्त्वमे॒तत् पत्यु॑र्जनि॒त्वम॒भि संब॑भूव ॥ सु॒वर्णꣳ॒॒ हस्ता॑दा॒ददा॑ना मृ॒तस्य॑ श्रि॒यै ब्रह्म॑णे॒ तेज॑से॒ बला॑य । अत्रै॒व त्वमि॒ह व॒यꣳ सु॒शेवा॒ विश्वाः॒ स्पृधो॑ अ॒भिमा॑तीर्जयेम ॥ धनु॒र्॒. हस्ता॑दा॒ददा॑ना मृ॒तस्य॑ श्रि॒यै क्ष॒त्रायौज॑से॒ बला॑य । अत्रै॒व त्वमि॒ह व॒यꣳ सु॒शेवा॒ विश्वाः॒ स्पृधो॑ अ॒भिमा॑तीर्जयेम । मणिꣳ॒॒ हस्ता॑दा॒ददा॑ना मृ॒तस्य॑ श्रि॒यै वि॒शे पुष्ट्यै॒ बला॑य । अत्रै॒व त्वमि॒ह व॒यꣳ सु॒शेवा॒ विश्वाः॒ स्पृधो॑ अ॒भिमा॑तीर्जयेम ।

इ॒मम॑ग्ने चम॒सम् मा विजी᳚ह्वरः प्रि॒यो दे॒वाना॑मु॒त सो॒म्याना᳚म् । ए॒ष यश्च॑म॒सो दे॑व॒पान॒स्तस्मि॑न् दे॒वा अ॒मृता॑ मादयन्ताम् ॥ अ॒ग्नेर्वर्म॒ परि॒ गोभि॑र्व्ययस्व॒ संप्रोर्णु॑ष्व॒ मेद॑सा॒ पीव॑सा च । नेत्त्वा॑ धृ॒ष्णुर्. हर॑सा॒ जर्.हृ॑षाणो॒ दध॑द्-विध॒क्ष्यन्-पर्य॒ङ्खया॑तै ॥ मैन॑मग्ने॒ विद॑हो॒ माऽभिशो॑चो॒ माऽस्य॒ त्वच॑म् चिक्षिपो॒ मा शरी॑रम् । य॒दा शृ॒तम् क॒रवो॑ जातवे॒दोऽथे॑मेन॒म् प्रहि॑णुतात् पि॒तृभ्यः॑ ॥ शृ॒तम् ॅय॒दा क॒रसि॑ जातवे॒दोऽथे॑मेन॒म् परि॑दत्तात् पि॒तृभ्यः॑ । य॒दा गच्छा॒त्यसु॑नीतिमे॒तामथा॑ दे॒वाना᳚म् ॅवश॒नीर्भ॑वाति ॥ सूर्य॑म् ते॒ चक्षु॑र्-गच्छतु॒ वात॑मा॒त्मा द्याम् च॒ गच्छ॑ पृथि॒वीम् च॒ धर्म॑णा । अ॒पो वा॑ गच्छ॒ यदि॒ तत्र॑ ते हि॒तमोष॑धीषु॒ प्रति॑तिष्ठा॒ शरी॑रैः ( ) ॥ अ॒जो भा॒गस्तप॑सा॒ तम् त॑पस्व॒ तम् ते॑ शो॒चिस्त॑पतु॒ तम् ते॑ अ॒र्चिः । यास्ते॑ शि॒वास्त॒नुवो॑ जातवेद॒स्ताभि॑र्-वहे॒मꣳ सु॒कृता॒म् ॅयत्र॑ लो॒काः ॥ अ॒यम् ॅवै त्वम॒स्मादधि॒ त्वमे॒तद॒यम् ॅवै तद॑स्य॒ योनि॑रसि । वै॒श्वा॒न॒रः पु॒त्रः पि॒त्रे लो॑क॒कृ-ज्जा॑तवेदो॒ वहे॑मꣳ सु॒कृता॒म् ॅयत्र॑ लो॒काः ।