आरो॑ह॒तायु॑र्-ज॒रस॑म् गृणा॒ना अ॑नुपू॒र्वम् ॅयत॑माना॒ यति॒ष्ट । इ॒ह त्वष्टा॑ सु॒जनि॑मा सु॒रत्नो॑ दी॒र्घमायुः॑ करतु जी॒वसे॑ वः ॥ यथाऽहा᳚न्यनुपू॒र्वम् भव॑न्ति॒ यथ॒र्तव॑ ऋ॒तुभि॒र्-यन्ति॑ क्लृ॒प्ताः । यथा॒ न पूर्व॒मप॑रो॒ जहा᳚त्ये॒वा धा॑त॒रायूꣳ॑षि कल्पयैषाम् ॥ न हि॑ ते अग्ने त॒नुवै᳚ क्रू॒रम् च॒कार॒ मर्त्यः॑ । क॒पिर्-ब॑भस्ति॒ तेज॑न॒म् पुन॑र्ज॒रायु॒ गौरि॑व । अप॑ नः॒ शोशु॑चद॒घमग्ने॑ शुशु॒द्ध्या र॒यिम् । अप॑ नः॒ शोशु॑चद॒घम् मृ॒त्यवे॒ स्वाहा᳚ ॥ अ॒न॒ड्वाह॑-म॒न्वार॑भामहे स्व॒स्तये᳚ । स न॒ इन्द्र॑ इव दे॒वेभ्यो॒ वह्निः॑ स॒पांर॑णो भव ।

इ॒मे जी॒वा वि॑मृ॒तैराव॑वर्-ति॒न्नभू᳚द्-भ॒द्रा दे॒वहू॑तिम् नो अ॒द्य । प्राञ्जो॑ऽगामा नृ॒तये॒ हसा॑य॒ द्राघी॑य॒ आयुः॑ प्रत॒राम् दधा॑नाः ॥ मृ॒त्योः प॒दम् ॅयोपय॑न्तो॒ यदैम॒ द्राघी॑य॒ आयुः॑ प्रत॒राम् दधा॑नाः । आ॒प्याय॑मानाः प्र॒जया॒ धने॑न शु॒द्धाः पू॒ता भ॑वथ यज्ञियासः ॥ इ॒मम् जी॒वेभ्यः॑ परि॒धिम् द॑धामि॒ मा नो नु॑ गा॒दप॑रो॒ अर्द्ध॑मे॒तम् । श॒तम् जी॑वन्तु श॒रदः॑ पुरू॒चीस्ति॒रो मृ॒त्युम् द॑द्महे॒ पर्व॑तेन ॥ इ॒मा नारी॑रविध॒वाः सु॒पत्नी॒राञ्ज॑नेन स॒र्पिषा॒ संमृ॑शन्ताम् । अ॒न॒श्रवो॑ अनमी॒वाः सु॒शेवा॒ आरो॑हन्तु॒ जन॑यो॒ योनि॒मग्रे᳚ ॥ यदाञ्ज॑नम् त्रैककु॒दम् जा॒तꣳ हि॒मव॑त॒स्परि॑ । तेना॒मृत॑स्य॒ मूले॒नारा॑तीर्-जम्भयामसि ( ) ॥ यथा॒ त्व-मु॑द्भि॒नथ्-स्यो॑षधे पृथि॒व्या अधि॑ । ए॒वमि॒म उद्भि॑न्दन्तु की॒र्त्या यश॑सा ब्रह्मवर्च॒सेन॑ ॥ अ॒जो᳚ऽस्यजा॒स्मद॒घा द्वेषाꣳ॑सि य॒वो॑ऽसि य॒वया॒स्मद॒घा द्वेषाꣳ॑सि ।