ए॒तास्ते᳚ स्व॒धा अ॒मृताः᳚ करोमि॒ यास्ते॑ धा॒नाः प॑रि॒किरा॒म्यत्र॑ । तास्ते॑ य॒मः पि॒तृभिः॑ सम्ॅविदा॒नोऽत्र॑ धे॒नूः का॑म॒दुघाः᳚ करोतु ॥ त्वामर्जु॒नौष॑धीना॒म् पयो᳚ ब्र॒ह्माण॒ इद्वि॑दुः । तासा᳚म् त्वा॒ मद्ध्या॒दाद॑दे च॒रुभ्यो॒ अपि॑धातवे ॥ दू॒र्वाणाꣳ॑ स्त॒म्बमाह॑रै॒ताम् प्रि॒यत॑मा॒म् मम॑ । इ॒माम् दिश॑म् मनु॒ष्या॑णा॒म् भूयि॒ष्ठाऽनु॒ वि रो॑हतु ॥ काशा॑नाꣳ स्त॒म्बमाह॑र॒ रक्ष॑सा॒मप॑हत्यै । य ए॒तस्यै॑ दि॒शः प॒राभ॑वन्नघा॒यवो॒ यथा॒ ते नाभ॑वा॒न् पुनः॑ ॥ द॒र्भाणाꣳ॑ स्त॒म्बमाह॑र पितृ॒णामोष॑धीम् प्रि॒याम् । अन्वस्यै॒ मूल॑म् जीवा॒दनु॒ काण्ड॒मथो॒ फल᳚म् ।

"लो॒कम् पृ॑ण॒{43}" "ता अ॑स्य॒ सूद॑दोहसः{44}" ॥ शम् ॅवातः॒ शꣳहि ते॒ घृणिः॒ शमु॑ ते स॒न्त्वोष॑धीः । कल्प॑न्ताम् ते॒ दिशः॒ सर्वाः᳚ ॥ इ॒दमे॒व मेतोऽप॑रा॒मार्ति॑माराम॒ काञ्च॒न । तथा॒ तद॒श्विभ्या᳚म् कृ॒तम् मि॒त्रेण॒ वरु॑णेन च ॥ व॒र॒णो वा॑रयादि॒दम् दे॒वो वन॒स्पतिः॑ । आर्त्यै॒ निर्.ऋ॑त्यै॒ द्वेषा᳚च्च॒ वन॒स्पतिः॑ ॥ विधृ॑तिरसि॒ विधा॑रया॒स्मद॒घा द्वेषाꣳ॑सि श॒मि श॒मया॒स्मद॒घा द्वेषाꣳ॑सि य॒व य॒वया॒स्मद॒घा द्वेषाꣳ॑सि ॥ पृ॒थि॒वीम् ग॑च्छा॒न्तरि॑क्षम् गच्छ॒ दिव॑म् गच्छ॒ दिशो॑ गच्छ॒ सुव॑र्गच्छ॒ सुव॑र्गच्छ॒ दिशो॑ गच्छ॒ दिव॑म् गच्छा॒न्तरि॑क्षम् गच्छ पृथि॒वीम् ग॑च्छा॒पो वा॑ गच्छ॒ यदि॒ तत्र॑ ते हि॒तमोष॑धीषु॒ प्रति॑तिष्ठा॒ शरी॑रैः ॥ "अश्म॑न्वती रेवती॒र्{43}" "यद्वै दे॒वस्य॑ सवि॒तुः प॒वित्र॒म्{44}" "ॅया रा॒ष्ट्रात्प॒न्ना{45}" "दुद्व॒यम् तम॑स॒स्परि॑{46}" धा॒ता पु॑नातु{47}"( ) ।