वै॒श्वा॒न॒रे ह॒विरि॒दम् जु॑होमि साह॒स्र-मुथ्सꣳ॑ श॒तधा॑रमे॒तम् । तस्मि॑न्ने॒ष पि॒तर॑म् पिताम॒हम् प्रपि॑तामहम् बिभर॒त् पिन्व॑माने ॥ द्र॒फ्सश्च॑स्कन्द पृथि॒वीमनु॒ द्यामि॒मञ्च॒ योनि॒मनु॒ यश्च॒ पूर्वः॑ । तृ॒तीय॒म् ॅयोनि॒मनु॑ स॒ञ्चर॑न्तम् द्र॒फ्सम् जु॑हो॒म्यनु॑ स॒प्त होत्राः᳚ ॥ इ॒मꣳ स॑मु॒द्रꣳ श॒तधा॑र॒मुथ्स॑म् ॅव्य॒च्यमा॑न॒म् भुव॑नस्य॒ मद्ध्ये᳚ । घृ॒तम् दुहा॑ना॒मदि॑ति॒म् जना॒याग्ने॒ मा हिꣳ॑सीः पर॒मे व्यो॑मन्न् ॥ अपे॑त॒ वीत॒ वि च॑ सर्प॒तातो॒ येऽत्र॒ स्थ पु॑रा॒णा ये च॒ नूत॑नाः । अहो॑भिर॒द्भि-र॒क्तुभि॒र्-व्य॑क्तम् ॅय॒मो द॑दा-त्वव॒सान॑मस्मै ॥ स॒वि॒तैतानि॒ शरी॑राणि पृथि॒व्यै मा॒तुरु॒पस्थ॒ आद॑धे । तेभि॑र्-युज्यन्ता-मघ्नि॒याः ।

शु॒नम् ॅवा॒हाः शु॒नम् ना॒राः शु॒नम् कृ॑षतु॒ लाङ्ग॑लम् । शु॒नम् ॅव॑र॒त्रा ब॑द्ध्यन्ताꣳ शु॒न-मष्ट्रा॒-मुदि॑ङ्गय॒ शुना॑सीरा शु॒नम॒स्मासु॑ धत्तम् ॥ शुना॑सीरावि॒माम् ॅवाच॒म् ॅयद्-दि॒वि च॑क्र॒थुः पयः॑ । तेने॒मा-मुप॑सिञ्चतम् ॥ सीते॒ वन्दा॑महे त्वा॒ऽर्वाची॑ सुभगे भव । यथा॑ नः सु॒भगा स॑सि॒ यथा॑ नः सु॒फला स॑सि ॥ स॒वि॒तैतानि॒ शरी॑राणि पृथि॒व्यै मा॒तुरु॒पस्थ॒ आद॑धे । तेभि॑रदिते॒ शम् भ॑व ॥ विमु॑च्यद्ध्व-मघ्नि॒या दे॑व॒याना॒ अता॑रिष्म॒ तम॑सस्पा॒रम॒स्य । ज्योति॑रापाम॒ सुव॑रगन्म ( ) ।

प्र वाता॒ वान्ति॑ प॒तय॑न्ति वि॒द्युत॒ उदोष॑धीर्जिहते॒ पिन्व॑ते॒ सुवः॑ । इरा॒ विश्व॑स्मै॒ भुव॑नाय जायते॒ यत् प॒र्जन्यः॑ पृथि॒वीꣳ रेत॒साऽव॑ति ॥ यथा॑ य॒माय॑ हा॒र्म्य-मव॑प॒न् पञ्च॑मान॒वाः । ए॒वम् ॅव॑पामि हा॒र्म्यम् ॅयथाऽसा॑म जीवलो॒के भूर॑यः ॥ चितः॑ स्थ परि॒चित॑ ऊर्द्ध्व॒चितः॑ श्रयद्ध्वम् पि॒तरो॑ दे॒वता᳚ । प्र॒जाप॑तिर्वः सादयतु॒ तया॑ दे॒वत॑या ॥ "आ प्या॑यस्व॒{41}" "सम् ते᳚{42}" ।