स॒वि॒ता भू॒त्वा प्र॑थ॒मेऽह॒न् प्रवृ॑ज्यते । तेन॒ कामाꣳ॑ एति । यद्-द्वि॒तीयेऽह॑न्-प्रवृ॒ज्यते᳚ । अ॒ग्निर्-भू॒त्वा दे॒वाने॑ति । यत्-तृ॒तीयेऽह॑न्-प्रवृ॒ज्यते᳚ । वा॒युर्-भू॒त्वा प्रा॒णाने॑ति । यच्च॑तु॒र्थेऽह॑न्-प्रवृ॒ज्यते᳚ । आ॒दि॒त्यो भू॒त्वा र॒श्मीने॑ति । यत् प॑ञ्च॒मेऽह॑न्-प्रवृ॒ज्यते᳚ । च॒न्द्रमा॑ भू॒त्वा नक्ष॑त्राण्येति

यथ्-ष॒ष्ठेऽह॑न्-प्रवृ॒ज्यते᳚ । ऋ॒तुर्-भू॒त्वा स॑म्ॅवथ्स॒रमे॑ति । यथ्-स॑प्त॒मेऽह॑न्-प्रवृ॒ज्यते᳚ । धा॒ता भू॒त्वा शक्व॑रीमेति । यद॑ष्ट॒मेऽह॑न्-प्रवृ॒ज्यते᳚ । बृह॒स्पति॑र्-भू॒त्वा गा॑य॒त्रीमे॑ति । यन्-न॑व॒मेऽह॑न्-प्रवृ॒ज्यते᳚ । मि॒त्रो भू॒त्वा त्रि॒वृत॑ इ॒मान् ॅलो॒काने॑ति । यद्-द॑श॒मेऽह॑न्-प्रवृ॒ज्यते᳚ । वरु॑णो भू॒त्वा वि॒राज॑मेति

यदे॑काद॒शेऽह॑न्-प्रवृ॒ज्यते᳚ । इन्द्रो॑ भू॒त्वा त्रि॒ष्टुभ॑मेति । यद्-द्वा॑द॒शेऽह॑न्-प्रवृ॒ज्यते᳚ । सोमो॑ भू॒त्वा सु॒त्यामे॑ति । यत्-पु॒रस्ता॑दुप॒सदा᳚म् प्रवृ॒ज्यते᳚ । तस्मा॑दि॒तः परा॑ङ॒मूं ॅलो॒काꣳस्तप॑न्नेति । यदु॒परि॑ष्टा-दुप॒सदा᳚म् प्रवृ॒ज्यते᳚ । तस्मा॑द॒मुतो॒ऽर्वाङि॒मां ॅलो॒काꣳस्तप॑न्नेति । य ए॒वं ॅवेद॑ । ऐव त॑पति ( ) ।