सा॒वि॒त्रम् जु॑होति॒ प्रसू᳚त्यै । च॒तु॒र्गृ॒ही॒तेन॑ जुहोति । चतु॑ष्पादः प॒शवः॑ । प॒शूने॒वाव॑रुन्धे । चत॑स्रो॒ दिशः॑ । दि॒क्ष्वे॑व प्रति॑तिष्ठति । छन्दाꣳ॑सि दे॒वेभ्योऽपा᳚क्रामन्न् । न वो॑ऽभा॒गानि॑ ह॒व्यं ॅव॑क्ष्याम॒ इति॑ । तेभ्य॑ ए॒त-च्च॑तुर्गृही॒त-म॑धारयन्न् । पु॒रो॒नु॒वा॒क्या॑यै या॒ज्या॑यै

दे॒वता॑यै वषट्का॒राय॑ । यच्च॑तुर्गृही॒तम् जु॒होति॑ । छन्दाꣳ॑स्ये॒व तत् प्री॑णाति । तान्य॑स्य प्री॒तानि॑ दे॒वेभ्यो॑ ह॒व्यं ॅव॑हन्ति । ब्र॒ह्म॒वा॒दिनो॑ वदन्ति । हो॒त॒व्य॑म् दीक्षि॒तस्य॑ गृ॒हा(3) इ न हो॑त॒व्या(3) मिति॑ । ह॒विर्वै दी᳚क्षि॒तः । यज्जु॑हु॒यात् । ह॒विष्कृ॑तं॒ ॅयज॑मानम॒ग्नौ प्रद॑द्ध्यात् । यन्न जु॑हु॒यात्

य॒ज्ञ्॒प॒रुर॒न्तरि॑यात् । यजु॑रे॒व व॑देत् । न ह॒विष्कृ॑तं॒ ॅयज॑मानम॒ग्नौ प्र॒दधा॑ति । न य॑ज्ञ्प॒रुर॒न्तरे॑ति । गा॒य॒त्री छन्दाꣳ॒॒स्यत्य॑मन्यत । तस्यै॑ वषट्का॒रो᳚ऽभ्यय्य॒ शिरो᳚ऽच्छिनत् । तस्यै᳚ द्वे॒धा रसः॒ परा॑ऽपतत् । पृ॒थि॒वीम॒र्द्धः प्रावि॑शत् । प॒शून॒र्द्धः । यः पृ॑थि॒वीम् प्रावि॑शत्

स ख॑दि॒रो॑ऽभवत् । यः प॒शून् । सो॑ऽजाम् । यत्खा॑दि॒र्यभ्रि॒र् भव॑ति । छन्द॑सामे॒व रसे॑न य॒ज्ञ्स्य॒ शिरः॒ सम्भ॑रति । यदौदु॑म्बरी । ऊर्ग्वा उ॑दु॒म्बरः॑ । ऊ॒र्जैव य॒ज्ञ्स्य॒ शिरः॒ सम्भ॑रति । यद्-वै॑ण॒वी । तेजो॒ वै वेणुः॑

तेज॑सै॒व य॒ज्ञ्स्य॒ शिरः॒ सम्भ॑रति । यद्-वैक॑ङ्कती । भा ए॒वाव॑रुन्धे । दे॒वस्य॑ त्वा सवि॒तुः प्र॑स॒व इत्यभ्रि॒माद॑त्ते॒ प्रसू᳚त्यै । अ॒श्विनो᳚र्-बा॒हुभ्या॒मित्या॑ह । अ॒श्विनौ॒ हि दे॒वाना॑मद्ध्व॒र्यू आस्ता᳚म् । पू॒ष्णो हस्ता᳚भ्या॒मित्याह॒ यत्यै᳚ । वज्र॑ इव॒ वा ए॒षा । यदभ्रिः॑ । अभ्रि॑रसि॒ नारि॑र॒सीत्या॑ह॒ शान्त्यै᳚

अ॒द्ध्व॒र॒कृद्-दे॒वेभ्य॒ इत्या॑ह । य॒ज्ञो वा अ॑द्ध्व॒रः । य॒ज्ञ्॒कृद्-दे॒वेभ्य॒ इति॒ वावैतदा॑ह । उत्ति॑ष्ठ ब्रह्मणस्पत॒ इत्या॑ह । ब्रह्म॑णै॒व य॒ज्ञ्स्य॒ शिरोऽच्छै॑ति । प्रैतु॒ ब्रह्म॑ण॒स्पति॒रित्या॑ह । प्रेत्यै॒व य॒ज्ञ्स्य॒ शिरोऽच्छै॑ति । प्र दे॒व्ये॑तु सू॒नृतेत्या॑ह । य॒ज्ञो वै सू॒नृता᳚ । अच्छा॑ वी॒रन्नर्य॑म् प॒ङ्क्तिरा॑धस॒मित्या॑ह

पाङ्क्तो॒ हि य॒ज्ञ्ः । दे॒वा य॒ज्ञ्न्न॑यन्तु न॒ इत्या॑ह । दे॒वाने॒व य॑ज्ञ्॒नियः॑ कुरुते । देवी᳚ द्यावापृथिवी॒ अनु॑ मे मꣳसाथा॒मित्या॑ह । आ॒भ्यामे॒वानु॑मतो य॒ज्ञ्स्य॒ शिरः॒ सम्भ॑रति । ऋ॒द्ध्यास॑म॒द्य म॒खस्य॒ शिर॒ इत्या॑ह । य॒ज्ञो वै म॒खः । ऋ॒द्ध्यास॑म॒द्य य॒ज्ञ्स्य॒ शिर॒ इति॒ वावैतदा॑ह । म॒खाय॑ त्वा म॒खस्य॑ त्वा शी॒र्ष्ण इत्या॑ह । नि॒र्दिश्यै॒वैन॑द्धरति

त्रिर्.ह॑रति । त्रय॑ इ॒मे लो॒काः । ए॒भ्य ए॒व लो॒केभ्यो॑ य॒ज्ञ्स्य॒ शिरः॒ सम्भ॑रति । तू॒ष्णीम् च॑तु॒र्थꣳ ह॑रति । अप॑रिमितादे॒व य॒ज्ञ्स्य॒ शिरः॒ सम्भ॑रति । मृ॒त्ख॒नादग्रे॑ हरति । तस्मा᳚न् मृत्ख॒नः क॑रु॒ण्य॑तमः । इय॒त्यग्र॑ आसी॒रित्या॑ह । अ॒स्यामे॒वाछ॑म्बट्कारं ॅय॒ज्ञ्स्य॒ शिरः॒ सम्भ॑रति । ऊर्ज॒म् ॅवा ए॒तꣳ रस॑म् पृथि॒व्या उ॑प॒दीका॒ उद्दि॑हन्ति

यद्-व॒ल्मीक᳚म् । यद्-व॑ल्मीकव॒पा स॑म्भा॒रो भव॑ति । ऊर्ज॑मे॒व रस॑म् पृथि॒व्या अव॑रुन्धे । अथो॒ श्रोत्र॑मे॒व । श्रोत्रꣳ॒॒ ह्ये॑तत् पृ॑थि॒व्याः । यद्-व॒ल्मीकः॑ । अब॑धिरो भवति । य ए॒वं ॅवेद॑ । इन्द्रो॑ वृ॒त्राय॒ वज्र॒मुद॑यच्छत् । स यत्र॑यत्र प॒राक्र॑मत

तन्नाद्ध्रि॑यत । स पू॑तीकस्त॒म्बे परा᳚क्रमत । सो᳚ऽद्ध्रियत । सो᳚ऽब्रवीत् । ऊ॒तिं ॅवै मे॑ धा॒ इति॑ । तदू॒तीका॑ना-मूतीक॒त्वम् । यदू॒तीका॒ भव॑न्ति । य॒ज्ञायै॒वोतिम् द॑धति । अ॒ग्नि॒जा अ॑सि प्र॒जाप॑ते॒ रेत॒ इत्या॑ह । य ए॒व रसः॑ प॒शून् प्रावि॑शत्

तमे॒वाव॑रुन्धे । पञ्चै॒ते स॑म्भा॒रा भ॑वन्ति । पाङ्क्तो॑ य॒ज्ञ्ः । यावा॑ने॒व य॒ज्ञ्ः । तस्य॒ शिरः॒ सम्भ॑रति । यद्ग्रा॒म्याणा᳚म् पशू॒नाञ्चर्म॑णा स॒म्भरे᳚त् । ग्रा॒म्यान् प॒शूञ्छु॒चाऽर्प॑येत् । कृ॒ष्णा॒जि॒नेन॒ सम्भ॑रति । आ॒र॒ण्याने॒व प॒शूञ्छु॒चाऽर्प॑यति । तस्मा᳚थ्-स॒माव॑त्-पशू॒नाम् प्र॒जाय॑मानानाम्

आ॒र॒ण्याः प॒शवः॒ कनी॑याꣳसः । शु॒चा ह्यृ॑ताः । लो॒म॒तः सम्भ॑रति । अतो॒ ह्य॑स्य॒ मेद्ध्य᳚म् । प॒रि॒गृह्या य॑न्ति । रक्ष॑सा॒मप॑हत्यै । ब॒हवो॑ हरन्ति । अप॑चितिमे॒वास्मि॑न् दधति । उद्ध॑ते॒ सिक॑तोपोप्ते॒ परि॑श्रिते॒ निद॑धति॒ शान्त्यै᳚ । मद॑न्तीभि॒रुप॑ सृजति

तेज॑ ए॒वास्मि॑न् दधाति । मधु॑ त्वा मधु॒ला क॑रो॒त्वित्या॑ह । ब्रह्म॑णै॒वास्मि॒न् -तेजो॑ दधाति । यद्ग्रा॒म्याणा॒म् पात्रा॑णाम् क॒पालैः᳚ सꣳसृ॒जेत् । ग्रा॒म्याणि॒ पात्रा॑णि शु॒चाऽर्प॑येत् । अ॒र्म॒क॒पा॒लैः सꣳसृ॑जति । ए॒तानि॒ वा अ॑नुपजीवनी॒यानि॑ । तान्ये॒व शु॒चाऽर्प॑यति । शर्क॑राभिः॒ सꣳसृ॑जति॒ धृत्यै᳚ । अथो॑ श॒न्त्वाय॑ ( ) । अ॒ज॒लो॒मैः सꣳसृ॑जति । ए॒षा वा अ॒ग्नेः प्रि॒या त॒नूः । यद॒जा । प्रि॒ययै॒वैन॑म् त॒नुवा॒ सꣳसृ॑जति । अथो॒ तेज॑सा । कृ॒ष्णा॒जि॒नस्य॒ लोम॑भिः॒ सꣳसृ॑जति । य॒ज्ञो वै कृ॑ष्णाजि॒नम् । य॒ज्ञेनै॒व य॒ज्ञ्ꣳ सꣳसृ॑जति ।