स स॑मु॒द्र उ॑त्तर॒तः प्राज्व॑लद्-भूम्य॒न्तेन॑ । ए॒ष वाव स स॑मु॒द्रः । यच्चात्वा॑लः । ए॒ष उ॑ वे॒व स भू᳚म्य॒न्तः । यद्वे᳚द्य॒न्तः । तदे॒तत्-त्रि॑श॒लं त्रि॑पूरु॒षम् । तस्मा॒त्-तं त्रि॑वित॒स्तं ख॑नन्ति ॥ स सु॑वर्णरज॒ताभ्यां᳚ कु॒शीभ्यां॒ परि॑गृहीत आसीत् । तं ॅयद॒स्या अद्ध्य॒जन॑यन्न् । तस्मा॑दादि॒त्यः

अथ॒ यथ् सु॑वर्णरज॒ताभ्यां᳚ कु॒शीभ्यां॒ परि॑गृहीत॒ आसी᳚त् । साऽस्य॑ कौशि॒कता᳚ ॥ तं त्रि॒वृता॒ऽभि प्रास्तु॑वत । तं त्रि॒वृता ऽऽद॑दत । तं त्रि॒वृता ऽऽह॑रन्न् । याव॑ती त्रि॒वृतो॒ मात्रा᳚ ॥ तं प॑ञ्चद॒शेना॒भि प्रास्तु॑वत । तं प॑ञ्चद॒शेनाद॑दत । तं प॑ञ्चद॒शेनाह॑रन्न् । याव॑ती पञ्चद॒शस्य॒ मात्रा᳚

तꣳ स॑प्तद॒शेना॒भि प्रास्तु॑वत । तꣳ स॑प्तद॒शेनाद॑दत । तꣳ स॑प्तद॒शेनाह॑रन्न् । याव॑ती सप्तद॒शस्य॒ मात्रा᳚ । तस्य॑ सप्तद॒शेन॑ ह्रि॒यमा॑णस्य॒ तेजो॒ हरो॑ऽपतत् । तमे॑कविꣳ॒॒ शेना॒भि प्रास्तु॑वत । तमे॑कविꣳ॒॒शेनाद॑दत । तमे॑कविꣳ॒॒शेनाह॑रन्न् । याव॑त्येकविꣳ॒॒शस्य॒ मात्रा᳚ ॥ ते यत्-त्रि॒वृता᳚ स्तु॒वते᳚

त्रि॒वृतै॒व तद्-यज॑मान॒माद॑दते । तं त्रि॒वृतै॒व ह॑रन्ति । याव॑ती त्रि॒वृतो॒ मात्रा᳚ । अ॒ग्निर्वै त्रि॒वृत् । याव॒द्वा अ॒ग्नेर्दह॑तो धू॒म उ॒देत्यानु॒व्येति॑ । ताव॑ती त्रि॒वृतो॒ मात्रा᳚ । अ॒ग्नेरे॒वैनं॒ तत् । मात्राꣳ॒॒ सायु॑ज्यꣳ सलो॒कतां᳚ गमयन्ति ॥ अथ॒ यत्प॑ञ्चद॒शेन॑ स्तु॒वते᳚ । प॒ञ्च॒द॒शेनै॒व तद्-यज॑मान॒-माद॑दते

तं प॑ञ्चद॒शेनै॒व ह॑रन्ति । याव॑ती पञ्चद॒शस्य॒ मात्रा᳚ । च॒न्द्रमा॒ वै प॑ञ्चद॒शः । ए॒ष हि प॑ञ्चद॒श्याम॑पक्षी॒यते᳚ । प॒ञ्च॒दश्या-मा॑पू॒र्यते᳚ । च॒न्द्रम॑स ए॒वैनं॒ तत् । मात्राꣳ॒॒ सायु॑ज्यꣳ सलो॒कतां᳚ गमयन्ति । अथ॒ यथ्स॑प्तद॒शेन॑ स्तु॒वते᳚ । स॒प्त॒द॒शेनै॒व तद्-यज॑मान॒माद॑दते । तꣳ स॑प्तद॒शेनै॒व ह॑रन्ति

याव॑ती सप्तद॒शस्य॒ मात्रा᳚ । प्र॒जाप॑ति॒र्वै स॑प्तद॒शः । प्र॒जाप॑तेरे॒वैनं॒ तत् । मात्राꣳ॒॒ सायु॑ज्यꣳ सलो॒कतां᳚ गमयन्ति । अथ॒ यदे॑कविꣳ॒॒शेन॑ स्तु॒वते᳚ । ए॒क॒विꣳ॒॒शेनै॒व तद्-यज॑मान॒-माद॑दते । तमे॑कविꣳ॒॒शेनै॒व ह॑रन्ति । याव॑त्येकविꣳ॒॒शस्य॒ मात्रा᳚ । अ॒सौ वा आ॑दि॒त्य ए॑कविꣳ॒॒शः । आ॒दि॒त्यस्यै॒वैनं॒ तत्

मात्राꣳ॒॒ सायु॑ज्यꣳ सलो॒कतां᳚ गमयन्ति ॥ ते कु॒श्यौ᳚ । व्य॑घ्नन्न् । ते अ॑होरा॒त्रे अ॑भवताम् । अह॑रे॒व सु॒वर्णा॑ ऽभवत् । र॒ज॒ता रात्रिः॑ । स यदा॑दि॒त्य उ॒देति॑ । ए॒तामे॒व तथ्सु॒वर्णां᳚ कु॒शीमनु॒ समे॑ति । अथ॒ यद॑स्त॒मेति॑ । ए॒तामे॒व तद्-र॑ज॒तां कु॒शीमनु॒ सम्ॅवि॑शति ( ) ॥ प्र॒ह्रादो॑ ह॒ वै का॑याध॒वः । वि॒रोच॑नꣳ॒॒ स्वं पु॒त्रमुदा᳚स्यत् । स प्र॑द॒रो॑ऽभवत् । तस्मा᳚त् प्रद॒रादु॑द॒कं नाचा॑मेत् ।