दे॒वा वै यद्-य॒ज्ञे ऽकु॑र्वत । तदसु॑रा अकुर्वत । तेऽसु॑रा ऊ॒र्द्ध्वं पृ॒ष्ठेभ्यो॒ नाप॑श्यन्न् । ते केशा॒नग्रे॑ऽवपन्त । अथ॒ श्मश्रू॑णि । अथो॑पप॒क्षौ । तत॒स्तेऽवा᳚ञ्च आयन्न् । परा॑ऽभवन्न् । यस्यै॒वं ॅवप॑न्ति । अवा॑ङेति

अथो॒ परै॒व भ॑वति । अथ॑ दे॒वा ऊ॒र्द्ध्वं पृ॒ष्ठेभ्यो॑ऽपश्यन्न् । त उ॑पप॒क्षावग्रे॑ऽवपन्त । अथ॒ श्मश्रू॑णि । अथ॒ केशान्॑ । तत॒स्ते॑ऽभवन्न् । सु॒व॒र्गं ॅलो॒कमा॑यन्न् । यस्यै॒वं ॅवप॑न्ति । भव॑त्या॒त्मना᳚ । अथो॑ सुव॒र्गं ॅलो॒कमे॑ति ।

अथै॒तन्-मनु॑र्-व॒प्त्रे मि॑थु॒न-म॑पश्यत् । स श्मश्रू॒ण्यग्रे॑ऽवपत । अथो॑पप॒क्षौ । अथ॒ केशान्॑ । ततो॒ वै स प्राजा॑यत प्र॒जया॑ प॒शुभिः॑ । यस्यै॒वं ॅवप॑न्ति । प्र प्र॒जया॑ प॒शुभि॑र्-मिथु॒नैर् जा॑यते ॥ दे॒वा॒सु॒राः सम्ॅय॑त्ता आसन्न् । ते स॑म्ॅवथ्स॒रे व्याय॑च्छन्त । तान् दे॒वाश्चा॑तुर्-मा॒स्यैरे॒वाभि प्रायु॑ञ्जत

वै॒श्व॒दे॒वेन॑ च॒तुरो॑ मा॒सो॑ऽवृञ्ज॒तेन्द्र॑राजानः । ताञ्छी॒र्॒.षन्नि चाव॑र्तयन्त॒ परि॑ च । व॒रु॒ण॒ प्र॒घा॒सै-श्च॒तुरो॑ मा॒सो॑ऽवृञ्जत॒ वरु॑णराजानः । ताञ्छी॒र्॒.षन्नि चाव॑र्तयन्त॒ परि॑ च । सा॒क॒मे॒धैश्च॒तुरो॑ मा॒सो॑ऽवृञ्जत॒ सोम॑राजानः । ताञ्छी॒र॒.षन्नि चाव॑र्तयन्त॒ परि॑ च । या स॑म्ॅवथ्स॒र उ॑पजी॒वा ऽऽसी᳚त् । तामे॑षा-मवृञ्जत । ततो॑ दे॒वा अभ॑वन्न् । पराऽसु॑राः

य ए॒वं ॅवि॒द्वाꣳ-श्चा॑तुर्मा॒स्यैर्-यज॑ते । भ्रातृ॑व्यस्यै॒व मा॒सो वृ॒क्त्वा । शी॒र्॒.षन्नि च॑ व॒र्तय॑ते॒ परि॑ च । यैषा स॑म्ॅवथ्स॒र उ॑पजी॒वा । वृ॒ङ्क्ते तां भ्रातृ॑व्यस्य । क्षु॒धा ऽस्य॒ भ्रातृ॑व्यः॒ परा॑ भवति ॥ लो॒हि॒ता॒य॒सेन॒ निव॑र्तयते । यद्वा इ॒माम॒ग्निर्. ऋ॒तावाग॑ते निव॒र्तय॑ति । ए॒तदे॒वैनाꣳ॑ रू॒पं कृ॒त्वा निव॑र्तयति । सा ततः॒ श्वः श्वो॒ भूय॑सी॒ भव॑न्त्येति

प्रजा॑यते । य ए॒वं ॅवि॒द्वाॅल्लो॑हिताय॒सेन॑ निव॒र्तय॑ते । ए॒तदे॒व रू॒पं कृ॒त्वा निव॑र्तयते । स ततः॒ श्वः श्वो॒ भूया॒न्-भव॑न्नेति । प्रैव जा॑यते ॥ त्रे॒ण्या श॑ल॒ल्या निव॑र्तयेत । त्रीणि॑ त्रीणि॒ वै दे॒वाना॑मृ॒द्धानि॑ । त्रीणि॒ छन्दाꣳ॑सि । त्रीणि॒ सव॑नानि । त्रय॑ इ॒मे लो॒काः

ऋ॒द्ध्यामे॒व तद्-वी॒र्य॑ ए॒षु लो॒केषु॒ प्रति॑ तिष्ठति ॥ यच्चा॑तुर्मास्यया॒-ज्या᳚त्मनो॒ नाव॒द्येत् । दे॒वेभ्य॒ आवृ॑श्च्येत । च॒तृ॒षु च॑तृषु॒ मासे॑षु॒ निव॑र्तयेत । प॒रोक्ष॑मे॒व तद्-दे॒वेभ्य॑ आ॒त्मनोऽव॑द्य॒त्यना᳚ व्रस्काय ॥ दे॒वानां॒ ॅवा ए॒ष आनी॑तः । यश्चा॑तुर्मास्यया॒जी । य ए॒वं ॅवि॒द्वान्नि च॑ व॒र्तय॑ते॒ परि॑ च । दे॒वता॑ ए॒वाप्ये॑ति । नास्य॑ रु॒द्रः प्र॒जां प॒शू-न॒भिम॑न्यते ( ) ।