जु॒षस्व॑ स॒प्रथ॑स्तमम् । वचो॑ दे॒वफ्स॑रस्तमम् । ह॒व्या जुह्वा॑न आ॒सनि॑ ॥ इ॒मं नो॑ य॒ज्ञ्म॒मृते॑षु धेहि । इ॒मा ह॒व्या जा॑तवेदो जुषस्व । स्तो॒काना॑मग्ने॒ मेद॑सो घृ॒तस्य॑ । होतः॒ प्राशा॑न प्रथ॒मो नि॒षद्य॑ ॥ घृ॒तव॑न्तः पावक ते । स्तो॒काःश्चो॑तन्ति॒ मेद॑सः । स्वध॑र्मं दे॒ववी॑तये

श्रेष्ठं॑ नो धेहि॒ वार्य᳚म् ॥ तुभ्यꣳ॑ स्तो॒का घृ॑त॒श्चुतः॑ । अग्ने॒ विप्रा॑य सन्त्य । ऋषिः॒ श्रेष्ठः॒ समि॑द्ध्यसे । य॒ज्ञ्स्य॑ प्रावि॒ता भ॑व ॥ तुभ्यꣳ॑ श्चोतन्त्यद्ध्रिगो शचीवः । स्तो॒कासो॑ अग्ने॒ मेद॑सो घृ॒तस्य॑ । क॒वि॒श॒स्तो बृ॑ह॒ता भा॒नुनाऽऽगाः᳚ । ह॒व्या जु॑षस्व मेधिर ॥ ओजि॑ष्ठं ते मद्ध्य॒तो मेद॒ उद्भृ॑तम् ( ) । प्रते॑ व॒यं द॑दामहे । श्चोत॑न्ति ते वसो स्तो॒का अधि॑ त्व॒चि । प्रति॒ तान्दे॑व॒शो वि॑हि ।