पञ्चशत् 1 #
अ॒पां त्वेम᳚न्थ् सादयाम्य॒पां त्वोद्म᳚न्थ् सादयाम्य॒पां त्वा॒ भस्म᳚न्थ् सादयाम्य॒पां त्वा॒ ज्योति॑षि सादयाम्य॒पां त्वाऽय॑ने सादयाम्यर्ण॒वे सद॑ने सीद समु॒द्रे सद॑ने सीद सलि॒ले सद॑ने सीदा॒पां क्षये॑ सीदा॒पाꣳ सधि॑षि सीदा॒पां त्वा॒ सद॑ने सादयाम्य॒पां त्वा॑ स॒धस्थे॑ सादयाम्य॒पां त्वा॒ पुरी॑षे सादयाम्य॒पां त्वा॒ योनौ॑ ( ) सादयाम्य॒पां त्वा॒ पाथ॑सि सादयामि गाय॒त्री छन्द॑-स्त्रि॒ष्टुप् छन्दो॒ जग॑ती॒ छन्दो॑ऽनु॒ष्टुप् छन्दः॑ प॒ङ्क्तिश्छन्दः॑ ॥
पदपाठः (Word-by-word)
अ॒पाम् । त्वा॒ । एमन्न्॑ । सा॒द॒या॒मि॒ । अ॒पाम् । त्वा॒ । ओद्मन्न्॑ । सा॒द॒या॒मि॒ । अ॒पाम् । त्वा॒ । भस्मन्न्॑ । सा॒द॒या॒मि॒ । अ॒पाम् । त्वा॒ । ज्योति॑षि । सा॒द॒या॒मि॒ । अ॒पाम् । त्वा॒ । अय॑ने । सा॒द॒या॒मि॒ । अ॒र्ण॒वे । सद॑ने । सी॒द॒ । स॒मु॒द्रे । सद॑ने । सी॒द॒ । स॒लि॒ले । सद॑ने । सी॒द॒ । अ॒पाम् । क्षये᳚ । सी॒द॒ । अ॒पाम् । सधि॑षि । सी॒द॒ । अ॒पाम् । त्वा॒ । सद॑ने । सा॒द॒या॒मि॒ । अ॒पाम् । त्वा॒ । स॒धस्थ॒ इति॑ स॒ध - स्थे॒ । सा॒द॒या॒मि॒ । अ॒पाम् । त्वा॒ । पुरी॑षे । सा॒द॒या॒मि॒ । अ॒पाम् । त्वा॒ । योनौ᳚ ( ) । सा॒द॒या॒मि॒ । अ॒पाम् । त्वा॒ । पाथ॑सि । सा॒द॒या॒मि॒ । गा॒य॒त्री । छन्दः॑ । त्रि॒ष्टुप् । छन्दः॑ । जग॑ती । छन्दः॑ । अ॒नु॒ष्टुबित्य॑नु - स्तुप् । छन्दः॑ । प॒ङ्क्तिः । छन्दः॑ ॥