अ॒यम् । पु॒रः । भुवः॑ । तस्य॑ । प्रा॒ण इति॑ प्र - अ॒नः । भौ॒वा॒य॒नः । व॒स॒न्तः । प्रा॒णा॒य॒नः । गा॒य॒त्री । वा॒स॒न्ती । गा॒य॒त्रि॒यै । गा॒य॒त्रम् । गा॒य॒त्रात् । उ॒पाꣳ॒॒शुरित्यु॑प - अꣳ॒॒शुः । उ॒पाꣳ॒॒शोरित्यु॑प-अꣳ॒॒शोः । त्रि॒वृदिति॑ त्रि - वृत् । त्रि॒वृत॒ इति॑ त्रि - वृतः॑ । र॒थ॒न्त॒रमिति॑ रथं - त॒रम् । र॒थ॒न्त॒रादिति॑ रथं - त॒रात् । वसि॑ष्ठः । ऋषिः॑ । प्र॒जाप॑तिगृहीत॒येति॑ प्र॒जाप॑ति - गृ॒ही॒त॒या॒ । त्वया᳚ । प्रा॒णमिति॑ प्र - अ॒नम् । गृ॒ह्णा॒मि॒ । प्र॒जाभ्य॒ इति॑ प्र - जाभ्यः॑ । अ॒यम् । द॒क्षि॒णा । वि॒श्वक॒र्मेति॑ वि॒श्व - क॒र्मा॒ । तस्य॑ । मनः॑ । वै॒श्व॒क॒र्म॒णमिति॑ वैश्व - क॒र्म॒णम् । ग्री॒ष्मः । मा॒न॒सः । त्रि॒ष्टुक् । ग्रै॒ष्मी । त्रि॒ष्टुभः॑ । ऐ॒डम् । ऐ॒डात् । अ॒न्त॒र्या॒म इत्य॑न्तः - या॒मः । अ॒न्त॒र्या॒मादित्य॑न्तः - या॒मात् । प॒ञ्च॒द॒श इति॑ पञ्च - द॒शः । प॒ञ्च॒द॒शादिति॑ पञ्च-द॒शात् । बृ॒हत् । बृ॒ह॒तः । भ॒रद्वा॑जः । ऋषिः॑ । प्र॒जाप॑तिगृहीत॒येति॑ प्र॒जाप॑ति - गृ॒ही॒त॒या॒ । त्वया᳚ । मनः॑ ।

गृ॒ह्णा॒मि॒ । प्र॒जाभ्य॒ इति॑ प्र - जाभ्यः॑ । अ॒यम् । प॒श्चात् । वि॒श्वव्य॑चा॒ इति॑ वि॒श्व - व्य॒चाः॒ । तस्य॑ । चक्षुः॑ । वै॒श्व॒व्य॒च॒समिति॑ वैश्व - व्य॒च॒सम् । व॒र्॒.षाणि॑ । चा॒क्षु॒षाणि॑ । जग॑ती । वा॒र्॒.षी । जग॑त्याः । ऋक्ष॑मम् । ऋक्ष॑मात् । शु॒क्रः । शु॒क्रात् । स॒प्त॒द॒श इति॑ सप्त - द॒शः । स॒प्त॒द॒शादिति॑ सप्त-द॒शात् । वै॒रू॒पम् । वै॒रू॒पात् । वि॒श्वामि॑त्र॒ इति॑ वि॒श्व - मि॒त्रः॒ । ऋषिः॑ । प्र॒जाप॑तिगृहीत॒येति॑ प्र॒जाप॑ति - गृ॒ही॒त॒या॒ । त्वया᳚ । चक्षुः॑ । गृ॒ह्णा॒मि॒ । प्र॒जाभ्य॒ इति॑ प्र - जाभ्यः॑ । इ॒दम् । उ॒त्त॒रादित्यु॑त् - त॒रात् । सुवः॑ । तस्य॑ । श्रोत्र᳚म् । सौ॒वम् । श॒रत् । श्रौ॒त्री । अ॒नु॒ष्टुबित्य॑नु - स्तुप् । शा॒र॒दी । अ॒नु॒ष्टुभ॒ इत्य॑नु - स्तुभः॑ । स्वा॒रम् । स्वा॒रात् । म॒न्थी । म॒न्थिनः॑ । ए॒क॒विꣳ॒॒श इत्ये॑क - विꣳ॒॒शः । ए॒क॒विꣳ॒॒शादित्ये॑क - विꣳ॒॒शात् । वै॒रा॒जम् । वै॒रा॒जात् । ज॒मद॑ग्निः । ऋषिः॑ । प्र॒जाप॑तिगृहीत॒येति॑ प्र॒जाप॑ति - गृ॒ही॒त॒या॒ ।

त्वया᳚ । श्रोत्र᳚म् । गृ॒ह्णा॒मि॒ । प्र॒जाभ्य॒ इति॑ प्र-जाभ्यः॑ । इ॒यम् । उ॒परि॑ । म॒तिः । तस्यै᳚ । वाक् । मा॒ती । हे॒म॒न्तः । वा॒च्या॒य॒नः । प॒ङ्क्तिः । है॒म॒न्ती । प॒ङ्क्त्यै । नि॒धन॑व॒दिति॑ नि॒धन॑ - व॒त् । नि॒धन॑वत॒ इति॑ नि॒धन॑ - व॒तः॒ । आ॒ग्र॒य॒णः । आ॒ग्र॒य॒णात् । त्रि॒ण॒व॒त्र॒य॒स्त्रिꣳ॒॒शाविति॑ त्रिणव - त्र॒य॒स्त्रिꣳ॒॒शौ । त्रि॒ण॒व॒त्र॒य॒स्त्रिꣳ॒॒शाभ्या॒मिति॑ त्रिणव - त्र॒य॒स्त्रिꣳ॒॒शाभ्या᳚म् । शा॒क्व॒र॒रै॒व॒ते इति॑ शाक्वर - रै॒व॒ते । शा॒क्व॒र॒रै॒व॒ताभ्या॒मिति॑ शाक्वर - रै॒व॒ताभ्या᳚म् । वि॒श्वक॒र्मेति॑ वि॒श्व - क॒र्मा॒ । ऋषिः॑ । प्र॒जाप॑तिगृहीत॒येति॑ प्र॒जाप॑ति - गृ॒ही॒त॒या॒ । त्वया᳚ । वाच᳚म् । गृ॒ह्णा॒मि॒ । प्र॒जाभ्य॒ इति॑ प्र - जाभ्यः॑ ॥