पञ्चशत् 1 #
एक॑याऽस्तुवत प्र॒जा अ॑धीयन्त प्र॒जाप॑ति॒रधि॑पतिरासीत् ति॒सृभि॑रस्तुवत॒ ब्रह्मा॑सृज्यत॒ ब्रह्म॑ण॒स्पति॒-रधि॑पतिरासीत् प॒ञ्चभि॑रस्तुवत भू॒तान्य॑सृज्यन्त भू॒तानां॒ पति॒रधि॑पतिरासीथ् स॒प्तभि॑रस्तुवत सप्त॒र्॒.षयो॑ऽसृज्यन्त धा॒ता-धि॑पतिरासी-न्न॒वभि॑रस्तुवत पि॒तरो॑-ऽसृज्य॒न्ता-ऽ*दि॑ति॒रधि॑पत्न्यासी-देकाद॒शभि॑-रस्तुवत॒र्तवो॑ऽ सृज्यन्ता- ऽऽर्त॒वो-ऽधि॑पति-रासीत् त्रयोद॒शभि॑-रस्तुवत॒ मासा॑ असृज्यन्त संॅवथ्स॒रोऽधि॑पति- [ ]
पदपाठः (Word-by-word)
एक॑या । अ॒स्तु॒व॒त॒ । प्र॒जा इति॑ प्र - जाः । अ॒धी॒य॒न्त॒ । प्र॒जाप॑ति॒रिति॑ प्र॒जा - प॒तिः॒ । अधि॑पति॒रित्यधि॑ - प॒तिः॒ । आ॒सी॒त् । ति॒सृभि॒रिति॑ ति॒सृ - भिः॒ । अ॒स्तु॒व॒त॒ । ब्रह्म॑ । अ॒सृ॒ज्य॒त॒ । ब्रह्म॑णः । पतिः॑ । अधि॑पति॒रित्यधि॑-प॒तिः॒ । आ॒सी॒त् । प॒ञ्चभि॒रिति॑ प॒ञ्च-भिः॒ । अ॒स्तु॒व॒त॒ । भू॒तानि॑ । अ॒सृ॒ज्य॒न्त॒ । भू॒ताना᳚म् । पतिः॑ । अधि॑पति॒रित्यधि॑ - प॒तिः॒ । आ॒सी॒त् । स॒प्तभि॒रिति॑ स॒प्त - भिः॒ । अ॒स्तु॒व॒त॒ । स॒प्त॒र्॒.षय॒ इति॑ सप्त - ऋ॒षयः॑ । अ॒सृ॒ज्य॒न्त॒ । धा॒ता । अधि॑पति॒रित्यधि॑ - प॒तिः॒ । आ॒सी॒त् । न॒वभि॒रिति॑ न॒व - भिः॒ । अ॒स्तु॒व॒त॒ । पि॒तरः॑ । अ॒सृ॒ज्य॒न्त॒ । अदि॑तिः । अधि॑प॒त्नीत्यधि॑-प॒त्नी॒ । आ॒सी॒त् । ए॒का॒द॒शभि॒रित्ये॑काद॒श - भिः॒ । अ॒स्तु॒व॒त॒ । ऋ॒तवः॑ । अ॒सृ॒ज्य॒न्त॒ । आ॒र्त॒वः । अधि॑पति॒रित्यधि॑ - प॒तिः॒ । आ॒सी॒त् । त्र॒यो॒द॒शभि॒रिति॑ त्रयोद॒श - भिः॒ । अ॒स्तु॒व॒त॒ । मासाः᳚ । अ॒सृ॒ज्य॒न्त॒ । सं॒ॅव॒थ्स॒र इति॑ सं - व॒थ्स॒रः । अधि॑पति॒रित्यधि॑ - प॒तिः॒ ।