प्राची᳚ । दि॒शाम् । व॒स॒न्तः । ऋ॒तू॒नाम् । अ॒ग्निः । दे॒वता᳚ । ब्रह्म॑ । द्रवि॑णम् । त्रि॒वृदिति॑ त्रि - वृत् । स्तोमः॑ । सः । उ॒ । प॒ञ्च॒द॒शव॑र्तनि॒रिति॑ पञ्चद॒श - व॒र्त॒निः॒ । त्र्यवि॒रिति॑ त्रि - अविः॑ । वयः॑ । कृ॒तम् । अया॑नाम् । पु॒रो॒वा॒त इति॑ पुरः - वा॒तः । वातः॑ । सान॑गः । ऋषिः॑ । द॒क्षि॒णा । दि॒शाम् । ग्री॒ष्मः । ऋ॒तू॒नाम् । इन्द्रः॑ । दे॒वता᳚ । क्ष॒त्रम् । द्रवि॑णम् । प॒ञ्च॒द॒श इति॑ पञ्च - द॒शः । स्तोमः॑ । सः । उ॒ । स॒प्त॒द॒शव॑र्तनि॒रिति॑ सप्तद॒श - व॒र्त॒निः॒ । दि॒त्य॒वाडिति॑ दित्य - वाट् । वयः॑ । त्रेता᳚ । अया॑नाम् । द॒क्षि॒णा॒द्वा॒त इति॑ दक्षिणात् - वा॒तः । वातः॑ । स॒ना॒तन॒ इति॑ सना - तनः॑ । ऋषिः॑ । प्र॒तीची᳚ । दि॒शाम् । व॒र्॒.षाः । ऋ॒तू॒नाम् । विश्वे᳚ । दे॒वाः । दे॒वता᳚ । विट् ।

द्रवि॑णम् । स॒प्त॒द॒श इति॑ सप्त-द॒शः । स्तोमः॑ । सः । उ॒ । ए॒क॒विꣳ॒॒शव॑र्तनि॒रित्ये॑कविꣳ॒॒श - व॒र्त॒निः॒ । त्रि॒व॒थ्स इति॑ त्रि-व॒थ्सः । वयः॑ । द्वा॒प॒रः । अया॑नाम् । प॒श्चा॒द्वा॒त इति॑ पश्चात्-वा॒तः । वातः॑ । अ॒ह॒भूनः॑ । ऋषिः॑ । उदी॑ची । दि॒शाम् । श॒रत् । ऋ॒तू॒नाम् । मि॒त्रावरु॑णा॒विति॑ मि॒त्रा - वरु॑णौ । दे॒वता᳚ । पु॒ष्टम् । द्रवि॑णम् । ए॒क॒विꣳ॒॒श इत्ये॑क - विꣳ॒॒शः । स्तोमः॑ । सः । उ॒ । त्रि॒ण॒वव॑र्तनि॒रिति॑ त्रिण॒व - व॒र्त॒निः॒ । तु॒र्य॒वाडिति॑ तुर्य - वाट् । वयः॑ । आ॒स्क॒न्द इत्या᳚ - स्क॒न्दः । अया॑नाम् । उ॒त्त॒रा॒द्वा॒त इत्यु॑त्तरात् - वा॒तः । वातः॑ । प्र॒त्नः । ऋषिः॑ । ऊ॒द्‌र्ध्वा । दि॒शाम् । हे॒म॒न्त॒शि॒शि॒राविति॑ हेमन्त - शि॒शि॒रौ । ऋ॒तू॒नाम् । बृह॒स्पतिः॑ । दे॒वता᳚ । वर्चः॑ । द्रवि॑णम् । त्रि॒ण॒व इति त्रि॑ - न॒वः । स्तोमः॑ । सः । उ॒ । त्र॒य॒स्त्रिꣳ॒॒शव॑र्तनि॒रिति॑ त्रयस्त्रिꣳ॒॒श - व॒र्त॒निः॒ । प॒ष्ठ॒वादिति॑ पष्ठ - वात् । वयः॑ ( ) । अ॒भि॒भूरित्य॑भि - भूः । अया॑नाम् । वि॒ष्व॒ग्वा॒त इति॑ विष्वक् - वा॒तः । वातः॑ । सु॒प॒र्ण इति॑ सु - प॒र्णः । ऋषिः॑ । पि॒तरः॑ । पि॒ता॒म॒हाः । परे᳚ । अव॑रे । ते । नः॒ । पा॒न्तु॒ । ते । नः॒ । अ॒व॒न्तु॒ । अ॒स्मिन्न् । ब्रह्मन्न्॑ । अ॒स्मिन्न् । क्ष॒त्रे । अ॒स्याम् । आ॒शिषीत्या᳚ - शिषि॑ । अ॒स्याम् । पु॒रो॒धाया॒मिति॑ पुरः - धाया᳚म् । अ॒स्मिन्न् । कर्मन्न्॑ । अ॒स्याम् । दे॒वहू᳚त्या॒मिति॑ दे॒व-हू॒त्या॒म् ॥