सर्वा॒न्॒. वा ए॒षो᳚ऽग्नौ कामा॒न् प्रवे॑शयति । यो᳚-ऽग्नीन॑न्वा॒धाय॑ व्र॒तमु॒पैति॑ । स यदनि॑ष्ट्वा प्रया॒यात् । अका॑मप्रीता एनं॒ कामा॒ नानु॒ प्रया॑युः । अ॒ते॒जा अ॑वी॒र्यः॑ स्यात् । स जु॑हुयात् । तुभ्यं॒ ता अ॑ङ्गिरस्तम । विश्वाः᳚ सुक्षि॒तयः॒ पृथ॑क् । अग्ने॒ कामा॑य येमिर॒ इति॑ । कामा॑ने॒वास्मि॑न् दधाति

काम॑प्रीता एनं॒ कामा॒ अनु॒प्रया᳚न्ति । ते॒ज॒स्वी वी॒र्या॑वान् भवति ॥सन्त॑ति॒र्वा ए॒षा य॒ज्ञ्स्य॑ । यो᳚-ऽग्नीन॑न्वा॒धाय॑ व्र॒तमु॒पैति॑ । स यदु॒द्वाय॑ति । विच्छि॑त्ति-रे॒वास्य॒ सा ॥ तं प्राञ्च॑मु॒द्धृत्य॑ । मन॒सोप॑तिष्ठेत । मनो॒ वै प्र॒जाप॑तिः । प्रा॒जा॒प॒त्यो य॒ज्ञ्ः

मन॑सै॒व य॒ज्ञ्ꣳ सन्त॑नोति । भूरित्या॑ह । भू॒तो वै प्र॒जाप॑तिः । भूति॑मे॒वोपै॑ति ॥ वि वा ए॒ष इ॑न्द्रि॒येण॑ वी॒र्ये॑णर्द्ध्यते । यस्या-हि॑ताग्ने-र॒ग्निर॑प॒क्षाय॑ति । याव॒च्छम्य॑या प्र॒विद्ध्ये᳚त् । यदि॒ ताव॑दप॒क्षाये᳚त् । तꣳ संभ॑रेत् । इ॒दं त॒ एकं॑ प॒र उ॑त॒ एकं᳚

तृ॒तीये॑न॒ ज्योति॑षा॒ सम्ॅवि॑शस्व । स॒म्ॅवेश॑नस्त॒नुवै॒ चारु॑रेधि । प्रि॒ये दे॒वानां᳚ पर॒मे ज॒नित्र॒ इति॑ । ब्रह्म॑णै॒वैनꣳ॒॒ संभ॑रति । सैव ततः॒ प्राय॑श्चित्तिः । यदि॑ परस्त॒-राम॑प॒क्षाये᳚त् । अ॒नु॒ प्र॒यायाव॑स्येत् । सो ए॒व ततः॒ प्राय॑श्चित्तिः ॥ ओष॑धी॒र्वा ए॒तस्य॑ प॒शून् पयः॒ प्रवि॑शति । यस्य॑ ह॒विषे॑ व॒थ्सा अ॒पाकृ॑ता॒ धय॑न्ति

तान्. यद्दु॒ह्यात् । या॒तया᳚म्ना ह॒विषा॑ यजेत । यन्न दु॒ह्यात् । य॒ज्ञ्॒प॒रु-र॒न्तरि॑यात् । वा॒य॒व्यां᳚ ॅयवा॒गूं निर्व॑पेत् । वा॒युर्वै पय॑सः प्रदापयि॒ता । स ए॒वास्मै॒ पयः॒ प्रदा॑पयति । पयो॒ वा ओष॑धयः । पयः॒ पयः॑ । पय॑सै॒वास्मै॒ पयोऽव॑रुन्धे

अथोत्त॑रस्मै ह॒विषे॑ व॒थ्सान॒पा कु॑र्यात् । सैव ततः॒ प्राय॑श्चित्तिः ॥ अ॒न्य॒त॒रान्. वा ए॒ष दे॒वान् भा॑ग॒धेये॑न॒ व्य॑र्द्धयति । ये यज॑मानस्य सा॒यं गृ॒हमा॒-गच्छ॑न्ति । यस्य॑ सायं दु॒ग्धꣳ ह॒विरार्ति॑-मा॒र्च्छति॑ । इन्द्रा॑य व्री॒हीन्नि॒-रुप्यो-प॑वसेत् । पयो॒ वा ओष॑धयः । पय॑ ए॒वारभ्य॑ गृही॒त्वो-प॑वसति । यत्प्रा॒तः स्यात् । तच्छृ॒तं कु॑र्यात्

अथेत॑र ऐ॒न्द्रः पु॑रो॒डाशः॑ स्यात् । इ॒न्द्रि॒ये ए॒वास्मै॑ स॒मीची॑ दधाति । पयो॒ वा ओष॑धयः । पयः॒ पयः॑ । पय॑सै॒वास्मै॒ पयोऽव॑रुन्धे । अथोत्त॑रस्मै ह॒विषे॑ व॒थ्सान॒पा कु॑र्यात् । सैव ततः॒ प्राय॑श्चित्तिः ॥ उ॒भया॒न्॒. वा ए॒ष दे॒वान् भा॑ग॒धेये॑न॒ व्य॑र्द्धयति । ये यज॑मानस्य सा॒यं च॑ प्रा॒तश्च॑ गृ॒हमा॒-गच्छ॑न्ति । यस्यो॒भयꣳ॑ ह॒विरार्त्ति॑-मा॒र्च्छति॑

ऐ॒न्द्रं पञ्च॑शराव-मोद॒नं निर्व॑पेत् । अ॒ग्निं दे॒वता॑नां प्रथ॒मं ॅय॑जेत् । अ॒ग्निमु॑खा ए॒व दे॒वताः᳚ प्रीणाति । अ॒ग्निं ॅवा अन्व॒न्या दे॒वताः᳚ । इन्द्र॒मन्व॒न्याः । ता ए॒वोभयीः᳚ प्रीणाति । पयो॒ वा ओष॑धयः । पयः॒ पयः॑ । पय॑सै॒वास्मै॒ पयोऽव॑रुन्धे । अथोत्त॑रस्मै ह॒विषे॑ व॒थ्सान॒पा कु॑र्यात्

सैव ततः॒ प्राय॑श्चित्तिः ॥ अ॒र्द्धो वा ए॒तस्य॑ य॒ज्ञ्स्य॑ मीयते । यस्य॒ व्रत्येऽह॒न् पत्न्य॑ना-लम्भु॒का भव॑ति । ताम॑प॒रुद्ध्य॑ यजेत । सर्वे॑णै॒व य॒ज्ञेन॑ यजते । तामि॒ष्ट्वो-प॑ह्वयेत । अमू॒हम॑स्मि । सा त्वं । द्यौर॒हं । पृ॒थि॒वी त्वं ( ) । सामा॒हं । ऋक्त्वं । तावेहि॒ संभ॑वाव । स॒ह रेतो॑ दधावहै । पुꣳ॒॒से पु॒त्राय॒ वेत्त॑वै । रा॒यस्पोषा॑य सुप्रजा॒स्त्वाय॑ सु॒वीर्या॒येति॑ । अ॒र्द्ध ए॒वैना॒मु-प॑ह्वयते । सैव ततः॒ प्राय॑श्चित्तिः ।