यद्दे॑वा देव॒हेड॑नं । देवा॑सश्चकृ॒मा व॒यं । आदि॑त्या॒-स्तस्मा᳚न्मा मुञ्चत । ऋ॒तस्य॒र्तेन॒ मामु॒त ॥ देवा॑ जीवनका॒म्या यत् । वा॒चाऽनृ॑तमूदि॒म । अ॒ग्निर्मा॒ तस्मा॒देन॑सः । गार्.ह॑पत्यः॒ प्रमु॑ञ्चतु । दु॒रि॒ता यानि॑ चकृ॒म । क॒रोतु॒ माम॑ने॒ नसं᳚ ।

ऋ॒तेन॑ द्यावापृथिवी । ऋ॒तेन॒ त्वꣳ स॑रस्वति । ऋ॒तान्मा॑ मुञ्च॒ताꣳह॑सः । यद॒न्य कृ॑तमारि॒म ॥ स॒जा॒त॒शꣳ॒॒सादु॒त वा॑ जामिशꣳ॒॒सात् । ज्याय॑सः॒ शꣳसा॑दु॒त वा॒ कनी॑यसः । अना᳚ज्ञातं दे॒वकृ॑तं॒ ॅयदेनः॑ । तस्मा॒त्त्वम॒स्मा-ञ्जा॑तवेदो मुमुग्धि ॥ यद्वा॒चा यन्मन॑सा । बा॒हुभ्या॑-मू॒रुभ्या॑-मष्ठी॒वद्भ्यां᳚

शि॒श्ञै र्यदनृ॑तं चकृ॒मा व॒यं । अ॒ग्निर्मा॒ तस्मा॒देन॑सः ॥ यद्धस्ता᳚भ्यां च॒कर॒ किल्बि॑षाणि । अ॒क्षाणां᳚ ॅव॒ग्नुमु॑प॒ जिघ्न॑मानः । दू॒रे॒प॒श्या च॑ राष्ट्र॒भृच्च॑ । तान्य॑फ्स॒रसा॒-वनु॑दत्ता-मृ॒णानि॑ ॥ अदी᳚व्यन्नृ॒णं ॅयद॒हं च॒कार॑ । यद्वाऽदा᳚स्यन्थ् संज॒गारा॒ जने᳚भ्यः । अ॒ग्निर्मा॒ तस्मा॒देन॑सः ॥ यन्मयि॑ मा॒ता गर्भे॑ स॒ति

एन॑श्च॒कार॒ यत्पि॒ता । अ॒ग्निर्मा॒ तस्मा॒देन॑सः ॥ यदा॑ पि॒पेष॑ मा॒तरं॑ पि॒तरं᳚ । पु॒त्रः प्रमु॑दितो॒ धयन्न्॑ । अहिꣳ॑सितौ पि॒तरौ॒ मया॒ तत् । तद॑ग्ने अनृ॒णो भ॑वामि ॥ यद॒न्तरि॑क्षं पृथि॒वीमु॒त द्यां । यन्मा॒तरं॑ पि॒तरं॑ ॅवा जिहिꣳसि॒म । अ॒ग्निर्मा॒ तस्मा॒देन॑सः ॥ यदा॒शसा॑ नि॒शसा॒ यत्प॑रा॒शसा᳚

यदेन॑श्च कृ॒मा नूत॑नं॒ ॅयत्पु॑रा॒णं । अ॒ग्निर्मा॒ तस्मा॒देन॑सः ॥ अति॑क्रामामि दुरि॒तं ॅयदेनः॑ । जहा॑मि रि॒प्रं प॑र॒मे स॒धस्थे᳚ । यत्र॒ यन्ति॑ सु॒कृतो॒ नापि॑ दु॒ष्कृतः॑ । तमारो॑हामि सु॒कृतां॒ नु लो॒कं ॥ त्रि॒ते दे॒वा अ॑मृजतै॒-तदेनः॑ । त्रि॒त ए॒तन्म॑नु॒ष्ये॑षु मामृजे । ततो॑ मा॒ यदि॒ किंचि॑दान॒शे । अ॒ग्निर्मा॒ तस्मा॒देन॑सः

गार्.ह॑पत्यः॒ प्रमु॑ञ्चतु । दु॒रि॒ता यानि॑ चकृ॒म । क॒रोतु॒ माम॑ने॒नसं᳚ ॥ दि॒वि जा॒ता अ॒फ्सु जा॒ताः । या जा॒ता ओष॑धीभ्यः । अथो॒ या अ॑ग्नि॒जा आपः॑ । ता नः॑ शुन्धन्तु॒ शुन्ध॑नीः ॥ यदापो॒ नक्तं॑ दुरि॒तं चरा॑म । यद्वा॒ दिवा॒ नूत॑नं॒ ॅयत्पु॑रा॒णं । हिर॑ण्य-वर्णा॒स्तत॒ उत्पु॑नीत नः ( ) ॥ “इ॒मं मे॑ वरुण॒{15}” “तत्त्वा॑ यामि{16}” । “त्वं नो॑ अग्ने॒{17}” “स त्वं नो॑ अग्ने{18}” । “त्वम॑ग्ने अ॒याऽसि॑{19}” ।