परि॑स्तृणीत॒ परि॑धत्ता॒ग्निं । परि॑हितो॒-ऽग्नि र्यज॑मानं भुनक्तु । अ॒पाꣳ रस॒ ओष॑धीनाꣳ सु॒वर्णः॑ । नि॒ष्का इ॒मे यज॑मानस्य सन्तु काम॒दुघाः᳚ । अ॒मुत्रा॒मुष्मि॑न् ॅलो॒के ॥ भूप॑ते॒ भुव॑नपते । म॒ह॒तो भू॒तस्य॑ पते । ब्र॒ह्माणं॑ त्वा वृणीमहे ॥ अ॒हं भूप॑तिर॒हं भुव॑नपतिः । अ॒हं म॑ह॒तो भू॒तस्य॒ पतिः॑

दे॒वेन॑ सवि॒त्रा प्रसू॑त॒ आर्त्वि॑ज्यं करिष्यामि । देव॑ सवितरे॒तं त्वा॑ वृणते । बृह॒स्पतिं॒ दैव्यं॑ ब्र॒ह्माणं᳚ । तद॒हं मन॑से॒ प्रब्र॑वीमि । मनो॑ गायत्रि॒यै । गा॒य॒त्री त्रि॒ष्टुभे᳚ । त्रि॒ष्टुब् जग॑त्यै । जग॑त्यनु॒ष्टुभे᳚ । अ॒नु॒ष्टुक् प॒ङ्क्त्यै । प॒ङ्क्तिः प्र॒जाप॑तये

प्र॒जाप॑ति॒ र्विश्वे᳚भ्यो दे॒वेभ्यः॑ । विश्वे॑ दे॒वा बृह॒स्पत॑ये । बृह॒स्पति॒र् ब्रह्म॑णे । ब्रह्म॒ भूर्भुवः॒ सुवः॑ । बृह॒स्पति॑ र्दे॒वानां᳚ ब्र॒ह्मा । अ॒हं म॑नु॒ष्या॑णां । बृह॑स्पते य॒ज्ञ्ं गो॑पाय ॥ इ॒दं तस्मै॑ ह॒र्म्यं क॑रोमि । यो वो॑ देवा॒श्चर॑ति ब्रह्म॒चर्यं᳚ । मे॒धा॒वी दि॒क्षु मन॑सा तप॒स्वी

अ॒न्तर्दू॒तश्च॑रति॒ मानु॑षीषु ॥ चतुः॑ शिखण्डा युव॒तिः सु॒पेशाः᳚ । घृ॒तप्र॑तीका॒ भुव॑नस्य॒ मद्ध्ये᳚ । म॒र्मृ॒ज्यमा॑ना मह॒ते सौभ॑गाय । मह्यं॑ धुक्ष्व॒ यज॑मानाय॒ कामान्॑ ॥ भूमि॑ र्भू॒त्वा म॑हि॒मानं॑ पुपोष । ततो॑ दे॒वी व॑र्द्धयते॒ पयाꣳ॑सि । य॒ज्ञिया॑ य॒ज्ञ्ं ॅविच॒यन्ति॒ शंच॑ । ओष॑धी॒राप॑ इ॒ह शक्व॑रीश्च ॥ यो मा॑ हृ॒दा मन॑सा॒ यश्च॑ वा॒चा

यो ब्रह्म॑णा॒ कर्म॑णा॒ द्वेष्टि॑ देवाः । यः श्रु॒तेन॒ हृद॑येनेष्ण॒ता च॑ । तस्ये᳚न्द्र॒ वज्रे॑ण॒ शिर॑श्छिनद्मि ॥ ऊर्णा॑मृदु॒ प्रथ॑मानꣳ स्यो॒नं । दे॒वेभ्यो॒ जुष्टꣳ॒॒ सद॑नाय ब॒र्॒.हिः । सु॒व॒र्गे लो॒के यज॑मानꣳ॒॒ हि धे॒हि । मां नाक॑स्य पृ॒ष्ठे प॑र॒मे व्यो॑मन्न् ॥ चतुः॑ शिखण्डा युव॒तिः सु॒पेशाः᳚ । घृ॒तप्र॑तीका व॒युना॑नि वस्ते । सा स्ती॒र्यमा॑णा मह॒ते सौभ॑गाय

सा मे॑ धुक्ष्व॒ यज॑मानाय॒ कामान्॑ । शि॒वा च॑ मे श॒ग्मा चै॑धि । स्यो॒ना च॑ मे सु॒षदा॑ चैधि । ऊर्ज॑स्वती च मे॒ पय॑स्वती चैधि । इष॒मूर्जं॑ मे पिन्वस्व । ब्रह्म॒ तेजो॑ मे पिन्वस्व । क्ष॒त्रमोजो॑ मे पिन्वस्व । विशं॒ पुष्टिं॑ मे पिन्वस्व । आयु॑र॒न्नाद्यं॑ मे पिन्वस्व । प्र॒जां प॒शून् मे॑ पिन्वस्व ।

अ॒स्मिन्. य॒ज्ञ् उप॒ भूय॒ इन्नु मे᳚ । अवि॑क्षोभाय परि॒धीन्द॑धामि । ध॒र्ता ध॒रुणो॒ धरी॑यान् । अ॒ग्नि र्द्वेषाꣳ॑सि॒ निरि॒तो नु॑दातै ॥ विच्छि॑नद्मि॒ विधृ॑तीभ्याꣳ स॒पत्नान्॑ । जा॒तान् भ्रातृ॑व्या॒न॒. ये च॑ जनि॒ष्यमा॑णाः । वि॒शो य॒न्त्राभ्यां॒ ॅविध॑माम्येनान् । अ॒हꣳस्वाना॑-मुत्त॒मो॑ऽसानि देवाः । वि॒शो य॒न्त्रे नु॒दमा॑ने॒ अरा॑तिं । विश्वं॑ पा॒प्मान॒मम॑तिं दुर्मरा॒युं ।

सीद॑न्ती दे॒वी सु॑कृ॒तस्य॑ लो॒के । धृती᳚ स्थो॒ विधृ॑ती॒ स्वधृ॑ती । प्रा॒णान्मयि॑ धारयतं । प्र॒जां मयि॑ धारयतं । प॒शून्मयि॑ धारयतं ॥ अ॒यं प्र॑स्त॒र उ॒भय॑स्य ध॒र्ता । ध॒र्ता प्र॑या॒जाना॑-मु॒तानू॑या॒जानां᳚ । स दा॑धार स॒मिधो॑ वि॒श्वरू॑पाः । तस्मि॒न्थ् स्रुचो॒ अद्ध्यासा॑दयामि ॥ आरो॑ह प॒थो जु॑हु देव॒यानान्॑

यत्रर्.ष॑यः प्रथम॒जा ये पु॑रा॒णाः । हिर॑ण्यपक्षाऽजि॒रा संभृ॑ताङ्गा । वहा॑सि मा सु॒कृतां॒ ॅयत्र॑ लो॒काः ॥ अवा॒हं बा॑ध उप॒भृता॑ स॒पत्नान्॑ । जा॒तान् भ्रातृ॑व्या॒न्॒. ये च॑ जनि॒ष्यमा॑णाः । दोहै॑ य॒ज्ञ्ꣳ सु॒दुघा॑मिव धे॒नुं । अ॒हमुत्त॑रो भूयासं । अध॑रे॒ मथ्स॒पत्नाः᳚ ॥ यो मा॑ वा॒चा मन॑सा दुर्मरा॒युः । हृ॒दा-ऽरा॑ती॒या-द॑भि॒दास॑-दग्ने

इ॒दम॑स्य चि॒त्तमध॑रं ध्रु॒वायाः᳚ । अ॒हमुत्त॑रो भूयासं । अध॑रे॒ मथ्स॒पत्नाः᳚ ॥ ऋ॒ष॒भो॑ऽसि शाक्व॒रः । घृ॒ताची॑नाꣳ सू॒नुः । प्रि॒येण॒ नाम्ना᳚ प्रि॒ये सद॑सि सीद ॥ स्यो॒नो मे॑ सीद सु॒षदः॑ पृथि॒व्यां । प्रथ॑यि प्र॒जया॑ प॒शुभिः॑ सुव॒र्गे लो॒के । दि॒वि सी॑द पृथि॒व्या-म॒न्तरि॑क्षे । अ॒हमुत्त॑रो भूयासं

अध॑रे॒ मथ्स॒पत्नाः᳚ ॥ इ॒यꣳ स्था॒ली घृ॒तस्य॑ पू॒र्णा । अच्छि॑न्नपयाः श॒तधा॑र॒ उथ्सः॑ । मा॒रु॒तेन॒ शर्म॑णा॒ दैव्ये॑न ॥ य॒ज्ञो॑ऽसि स॒र्वतः॑ श्रि॒तः । स॒र्वतो॒ मां भू॒तं भ॑वि॒ष्य-च्छ्र॑यतां । श॒तं मे॑ सन्त्वा॒शिषः॑ । स॒हस्रं॑ मे सन्तु सू॒नृताः᳚ । इरा॑वतीः पशु॒मतीः᳚ । प्र॒जाप॑तिरसि स॒र्वतः॑ श्रि॒तः

स॒र्वतो॒ मां भू॒तं भ॑वि॒ष्य-च्छ्र॑यतां । श॒तं मे॑ सन्त्वा॒शिषः॑ । स॒हस्रं॑ मे सन्तु सू॒नृताः᳚ । इरा॑वतीः पशु॒मतीः᳚ ॥ इ॒दमि॑न्द्रि॒य-म॒मृतं॑ ॅवी॒र्यं᳚ । अ॒नेनेन्द्रा॑य प॒शवो॑-ऽचिकिथ्सन्न् । तेन॑ देवा अव॒तोप॒ मां । इ॒हेष॒मूर्जं॒ ॅयशः॒ सह॒ ओजः॑ सनेयं । शृ॒तं मयि॑ श्रयतां ॥ यत् पृ॑थि॒वी-मच॑र॒त्तत्-प्रवि॑ष्टं

येनासि॑ञ्च॒द् बल॒मिन्द्रे᳚ प्र॒जाप॑तिः । इ॒दं तच्छु॒क्रं मधु॑ वा॒जिनी॑वत् । येनो॒-परि॑ष्टा॒दधि॑नोन्-महे॒न्द्रं । दधि॒ मां धि॑नोतु ॥ अ॒यं ॅवे॒दः पृ॑थि॒वी-मन्व॑विन्दत् ।गुहा॑ स॒तीं गह॑ने॒ गह्व॑रेषु । स वि॑न्दतु॒ यज॑मानाय लो॒कं । अच्छि॑द्रं ॅय॒ज्ञ्ं भूरि॑कर्मा करोतु ॥ अ॒यं ॅय॒ज्ञ्ः सम॑सदद्ध॒विष्मान्॑ । ऋ॒चा साम्ना॒ यजु॑षा दे॒वता॑भिः

तेन॑ लो॒कान्थ् सूर्य॑वतो जयेम । इन्द्र॑स्य स॒ख्य-म॑मृत॒त्व-म॑श्यां ॥ यो नः॒ कनी॑य इ॒ह का॒मया॑तै । अ॒स्मिन्. य॒ज्ञे यज॑मानाय॒ मह्यं᳚ । अप॒ तमि॑न्द्रा॒ग्नी भुव॑नान्नुदेतां । अ॒हं प्र॒जां ॅवी॒रव॑तीं ॅविदेय ॥ अग्ने॑ वाजजित् । वाजं॑ त्वा सरि॒ष्यन्तं᳚ । वाजं॑ जे॒ष्यन्तं᳚ । वा॒जिनं॑ ॅवाज॒जितं᳚

वा॒ज॒जि॒त्यायै॒ संमा᳚र्ज्मि । अ॒ग्निम॑न्ना॒-दम॒न्नाद्या॑य ॥ उप॑हूतो॒ द्यौः पि॒ता । उप॒ मां द्यौः पि॒ता ह्व॑यतां । अ॒ग्नि-राग्नी᳚द्ध्रात् । आयु॑षे॒ वर्च॑से । जी॒वात्वै पुण्या॑य । उप॑हूता पृथि॒वी मा॒ता । उप॒ मां मा॒ता पृ॑थि॒वी ह्व॑यतां । अ॒ग्नि-राग्नी᳚द्ध्रात्

आयु॑षे॒ वर्च॑से । जी॒वात्वै पुण्या॑य ॥ मनो॒ ज्योति॑ र्जुषता॒माज्यं᳚ । विच्छि॑न्नं ॅय॒ज्ञ्ꣳ समि॒मं द॑धातु । बृह॒स्पति॑-स्तनुतामि॒मं नः॑ । विश्वे॑ दे॒वा इ॒ह मा॑दयन्तां ॥ यं ते॑ अग्न आवृ॒श्चामि॑ । अ॒हं ॅवा᳚ क्षिपि॒तश्चरन्न्॑ । प्र॒जां च॒ तस्य॒ मूलं॑ च ।नी॒चैर्दे॑वा॒ निवृ॑श्चत

अग्ने॒ यो नो॑ऽभि॒दास॑ति । स॒मा॒नो यश्च॒ निष्ट्यः॑ । इ॒द्ध्मस्ये॑व प्र॒क्षाय॑तः । मा तस्योच्छे॑षि॒ किंच॒न । यो मां द्वेष्टि॑ जातवेदः । यं चा॒हं द्वेष्मि॒ यश्च॒ मां । सर्वाꣳ॒॒स्तान॑ग्ने॒ संद॑ह । याꣳश्चा॒हं द्वेष्मि॒ ये च॒ मां ॥ अग्ने॑ वाजजित् । वाजं॑ त्वा ससृ॒वाꣳसं᳚

वाजं॑ जिगि॒वाꣳसं᳚ । वा॒जिनं॑ ॅवाज॒जितं᳚ । वा॒ज॒जि॒त्यायै॒ संमा᳚र्ज्मि । अ॒ग्नि-म॑न्ना॒द-म॒न्नाद्या॑य ॥ वेदि॑ र्ब॒र॒.हिः शृ॒तꣳ ह॒विः ।इ॒द्ध्मः प॑रि॒धयः॒ स्रुचः॑ । आज्यं॑ ॅय॒ज्ञ् ऋचो॒ यजुः॑ । या॒ज्या᳚श्च वषट्का॒राः । सं मे॒ संन॑तयो नमन्तां । इ॒द्ध्म॒सं॒-नह॑ने हु॒ते ।

दि॒वः खीलोऽव॑ततः । पृ॒थि॒व्या अद्ध्युत्थि॑तः । तेना॑ स॒हस्र॑काण्डेन । द्वि॒षन्तꣳ॑ शोचयामसि । द्वि॒षन्मे॑ ब॒हु शो॑चतु । ओष॑धे॒ मो अ॒हꣳ शु॑चं ॥ यज्ञ्॒ नम॑स्ते यज्ञ् । नमो॒ नम॑श्च ते यज्ञ् । शि॒वेन॑ मे॒ संति॑ष्ठस्व । स्यो॒नेन॑ मे॒ संति॑ष्ठस्व

सु॒भू॒तेन॑ मे॒ संति॑ष्ठस्व । ब्र॒ह्म॒व॒र्च॒सेन॑ मे॒ संति॑ष्ठस्व । य॒ज्ञ्स्यर्द्धि॒मनु॒ संति॑ष्ठस्व । उप॑ ते यज्ञ्॒ नमः॑ । उप॑ ते॒ नमः॑ । उप॑ ते॒ नमः॑ ॥ त्रिष्फ॒ली क्रि॒यमा॑णानां । यो न्य॒ङ्गो अ॑व॒शिष्य॑ते । रक्ष॑सां भाग॒धेयं᳚ । आप॒स्तत् प्रव॑हतादि॒तः ।

उ॒लूख॑ले॒ मुस॑ले॒ यच्च॒ शूर्पे᳚ । आ॒शि॒श्लेष॑ दृ॒षदि॒ यत्क॒पाले᳚ । अ॒व॒प्रुषो॑ वि॒प्रुषः॒ सम्ॅय॑जामि । विश्वे॑ दे॒वा ह॒विरि॒दं जु॑षन्तां । य॒ज्ञे या वि॒प्रुषः॒ सन्ति॑ ब॒ह्वीः । अ॒ग्नौ ताः सर्वाः॒ स्वि॑ष्टाः॒ सुहु॑ता जुहोमि ॥ उ॒द्यन्न॒द्य मि॑त्रमहः । स॒पत्ना᳚न्मे अनीनशः । दिवै॑नान्. वि॒द्युता॑ जहि । नि॒म्रोच॒न्नध॑रान् कृधि ।

उ॒द्यन्न॒द्य वि नो॑ भज । पि॒ता पु॒त्रेभ्यो॒ यथा᳚ । दी॒र्घा॒यु॒त्वस्य॑ हेशिषे । तस्य॑ नो देहि सूर्य ॥ उ॒द्यन्न॒द्य मि॑त्रमहः । आ॒रोह॒न्नुत्त॑रां॒ दिवं᳚ । हृ॒द्रो॒गं मम॑ सूर्य । ह॒रि॒माणं॑ च नाशय ॥ शुके॑षु मे हरि॒माणं᳚ । रो॒प॒णाका॑सु दद्ध्मसि

अथो॑ हारिद्र॒वेषु॑ मे । ह॒रि॒माणं॒ निद॑द्ध्मसि ॥ उद॑गाद॒य-मा॑दि॒त्यः । विश्वे॑न॒ सह॑सा स॒ह । द्वि॒षन्तं॒ मम॑ र॒न्धयन्न्॑ । मो अ॒हं द्वि॑ष॒तो र॑धं ॥ यो नः॒ शपा॒दश॑पतः । यश्च॑ नः॒ शप॑तः॒ शपा᳚त् । उ॒षाश्च॒ तस्मै॑ नि॒म्रुक्च॑ । सर्वं॑ पा॒पꣳ समू॑हतां ( ) ।

यो नः॑ स॒पत्नो॒ यो रणः॑ । मर्तो॑ऽभि॒दास॑ति देवाः। इ॒द्ध्मस्ये॑व प्र॒क्षाय॑तः । मा तस्योच्छे॑षि॒ किञ्च॒न ॥ अव॑सृष्टः॒ परा॑पत । श॒रो ब्रह्म॑सꣳशितः । गच्छा॒ऽमित्रा॒न् प्रवि॑श । मैषां॒ कंच॒नोच्छि॑षः ।