ध्रु॒वा । अ॒सि॒ । ध॒रुणा᳚ । अस्तृ॑ता । वि॒श्वक॑र्म॒णेति॑ वि॒श्व - क॒र्म॒णा॒ । सुकृ॒तेति॒ सु - कृ॒ता॒ ॥ मा । त्वा॒ । स॒मु॒द्रः । उदिति॑ । व॒धी॒त् । मा । सु॒प॒र्ण इति॑ सु - प॒र्णः । अव्य॑थमाना । पृ॒थि॒वीम् । दृꣳ॒॒ह॒ ॥ प्र॒जाप॑ति॒रिति॑ प्र॒जा - प॒तिः॒ । त्वा॒ । सा॒द॒य॒तु॒ । पृ॒थि॒व्याः । पृ॒ष्ठे । व्यच॑स्वतीम् । प्रथ॑स्वतीम् । प्रथः॑ । अ॒सि॒ । पृ॒थि॒वी । अ॒सि॒ । भूः । अ॒सि॒ । भूमिः॑ । अ॒सि॒ । अदि॑तिः । अ॒सि॒ । वि॒श्वधा॑या॒ इति॑ वि॒श्व - धा॒याः॒ । विश्व॑स्य । भुव॑नस्य । ध॒र्त्री । पृ॒थि॒वीम् । य॒च्छ॒ । पृ॒थि॒वीम् । दृꣳ॒॒ह॒ । पृ॒थि॒वीम् । मा । हिꣳ॒॒सीः॒ । विश्व॑स्मै । प्रा॒णायेति॑ प्रा - अ॒नाय॑ । अ॒पा॒नायेत्य॑प - अ॒नाय॑ । व्या॒नायेति॑ वि - अ॒नाय॑ । उ॒दा॒नायेत्यु॑त् - अ॒नाय॑ । प्र॒ति॒ष्ठाया॒ इति॑ प्रति - स्थायै᳚ ।

च॒रित्रा॑य । अ॒ग्निः । त्वा॒ । अ॒भीति॑ । पा॒तु॒ । म॒ह्या । स्व॒स्त्या । छ॒र्दिषा᳚ । शन्त॑मे॒नेति॒ शं - त॒मे॒न॒ । तया᳚ । दे॒वत॑या । अ॒ङ्गि॒र॒स्वत् । ध्रु॒वा । सी॒द॒ ॥ काण्डा᳚त्काण्डा॒दिति॒ काण्डात् - का॒ण्डा॒त् । प्र॒रोह॒न्तीति॑ प्र - रोह॑न्ती । परु॑षःपरुष॒ इति॒ परु॑षः-प॒रु॒षः॒ । परि॑ ॥ ए॒वा । नः॒ । दू॒र्वे॒ । प्रेति॑ । त॒नु॒ । स॒हस्रे॑ण । श॒तेन॑ । च॒ ॥ या । श॒तेन॑ । प्र॒त॒नोषीति॑ प्र - त॒नोषि॑ । स॒हस्रे॑ण । वि॒रोह॒सीति॑ वि-रोह॑सि ॥ तस्याः᳚ । ते॒ । दे॒वि॒ । इ॒ष्ट॒के॒ । वि॒धेम॑ । ह॒विषा᳚ । व॒यम् ॥ अषा॑ढा । अ॒सि॒ । सह॑माना । सह॑स्व । अरा॑तीः । सह॑स्व । अ॒रा॒ती॒य॒तः । सह॑स्व । पृत॑नाः । सह॑स्व । पृ॒त॒न्य॒तः ॥ स॒हस्र॑वी॒र्येति॑ स॒हस्र॑ - वी॒र्या॒ ।

अ॒सि॒ । सा । मा॒ । जि॒न्व॒ ॥ मधु॑ । वाताः᳚ । ऋ॒ता॒य॒त इत्यृ॑त - य॒ते । मधु॑ । क्ष॒र॒न्ति॒ । सिन्ध॑वः ॥ माद्ध्वीः᳚ । नः॒ । स॒न्तु॒ । ओष॑धीः ॥ मधु॑ । नक्त᳚म् । उ॒त । उ॒षसि॑ । मधु॑म॒दिति॒ मधु॑ - म॒त् । पार्थि॑वम् । रजः॑ ॥ मधु॑ । द्यौः । अ॒स्तु॒ । नः॒ । पि॒ता ॥ मधु॑मा॒निति॒ मधु॑-मा॒न् । नः॒ । वन॒स्पतिः॑ । मधु॑मा॒निति॒ मधु॑ - मा॒न् । अ॒स्तु॒ । सूर्यः॑ ॥ माद्ध्वीः᳚ । गावः॑ । भ॒व॒न्तु॒ । नः॒ ॥ म॒ही । द्यौः । पृ॒थि॒वी । च॒ । नः॒ । इ॒मम् । य॒ज्ञ्म् । मि॒मि॒क्ष॒ता॒म् ॥ पि॒पृ॒ताम् । नः॒ । भरी॑मभि॒रिति॒ भरी॑म - भिः॒ ॥ तत् । विष्णोः᳚ । प॒र॒मम् ।

प॒दम् । सदा᳚ । प॒श्य॒न्ति॒ । सू॒रयः॑ ॥ दि॒वि । इ॒व॒ । चक्षुः॑ । आत॑त॒मित्या-त॒त॒म् ॥ ध्रु॒वा । अ॒सि॒ । पृ॒थि॒वि॒ । सह॑स्व । पृ॒त॒न्य॒तः ॥ स्यू॒ता । दे॒वेभिः॑ । अ॒मृते॑न । एति॑ । अ॒गाः॒ ॥ याः । ते॒ । अ॒ग्ने॒ । सूर्ये᳚ । रुचः॑ । उ॒द्य॒त इत्यु॑त् - य॒तः । दिव᳚म् । आ॒त॒न्वन्तीत्या᳚ - त॒न्वन्ति॑ । र॒श्मिभि॒रिति॑ र॒श्मि - भिः॒ ॥ ताभिः॑ । सर्वा॑भः । रु॒चे । जना॑य । नः॒ । कृ॒धि॒ ॥ याः । वः॒ । दे॒वाः॒ । सूर्ये᳚ । रुचः॑ । गोषु॑ । अश्वे॑षु । याः । रुचः॑ ॥ इन्द्रा᳚ग्नी॒ इतीन्द्र॑ - अ॒ग्नी॒ । ताभिः॑ । सर्वा॑भः । रुच᳚म् । नः॒ । ध॒त्त॒ । बृ॒ह॒स्प॒ते॒ ॥ वि॒राडिति॑ वि - राट् ।

ज्योतिः॑ । अ॒धा॒र॒य॒त् । स॒म्राडिति॑ सम्-राट् । ज्योतिः॑ । अ॒धा॒र॒य॒त् । स्व॒राडिति॑ स्व - राट् । ज्योतिः॑ । अ॒धा॒र॒य॒त् ॥ अग्ने᳚ । यु॒क्ष्व । हि । ये । तव॑ । अश्वा॑सः । दे॒व॒ । सा॒धवः॑ ॥ अर᳚म् । वह॑न्ति । आ॒शवः॑ ॥ यु॒क्ष्व । हि । दे॒व॒हूत॑मा॒निति॑ देव - हूत॑मान् । अश्वान्॑ । अ॒ग्ने॒ । र॒थीः । इ॒व॒ ॥ नीति॑ । होता᳚ । पू॒र्व्यः । स॒दः॒ ॥ द्र॒फ्सः । च॒स्क॒न्द॒ । पृ॒थि॒वीम् । अन्विति॑ । द्याम् । इ॒मम् । च॒ । योनि᳚म् । अन्विति॑ । यः । च॒ । पूर्वः॑ ॥ तृ॒तीय᳚म् । योनि᳚म् । अन्विति॑ । स॒ञ्चर॑न्त॒मिति॑ सं - चर॑न्तम् । द्र॒फ्सम् । जु॒हो॒मि॒ । अन्विति॑ । स॒प्त ।

होत्राः᳚ ॥ अभू᳚त् । इ॒दम् । विश्व॑स्य । भुव॑नस्य । वाजि॑नम् । अ॒ग्नेः । वै॒श्वा॒न॒रस्य॑ । च॒ ॥ अ॒ग्निः । ज्योति॑षा । ज्योति॑ष्मान् । रु॒क्मः । वर्च॑सा । वर्च॑स्वान् ॥ ऋ॒चे । त्वा॒ । रु॒चे । त्वा॒ । समिति॑ । इत् । स्र॒व॒न्ति॒ । स॒रितः॑ । न । धेनाः᳚ ॥ अ॒न्तः । हृ॒दा । मन॑सा । पू॒यमा॑नाः ॥ घृ॒तस्य॑ । धाराः᳚ । अ॒भीति॑ । चा॒क॒शी॒मि॒ ॥ हि॒र॒ण्ययः॑ । वे॒त॒सः । मद्ध्ये᳚ । आ॒सा॒म् ॥ तस्मिन्न्॑ । सु॒प॒र्ण इति॑ सु - प॒र्णः । म॒धु॒कृदिति॑ मधु - कृत् । कु॒ला॒यी । भजन्न्॑ । आ॒स्ते॒ । मधु॑ । दे॒वता᳚भ्यः ॥ तस्य॑ । आ॒स॒ते॒ । हर॑यः । स॒प्त । तीरे᳚ ( ) । स्व॒धामिति॑ स्व-धाम् । दुहा॑नाः । अ॒मृत॑स्य । धारा᳚म् ॥