मु॒दय॑नं॒ ॅवेद॒ प्रति॑ष्ठिते॒नारि॑ष्टेन य॒ज्ञेन॑ सꣳ॒॒स्थां ग॑च्छ॒त्याश्रा॑व॒यास्तु॒ श्रौष॒ड्यज॒ ये यजा॑महे वषट्का॒र ए॒तद्वै य॒ज्ञ्स्य॒ प्राय॑णमे॒षा प्र॑ति॒ष्ठैतदु॒दय॑नं॒ ॅय ए॒वं ॅवेद॒ प्रति॑ष्ठिते॒नाऽरि॑ष्टेन य॒ज्ञेन॑ सꣳ॒॒स्थां ग॑च्छति॒ यो वै सू॒नृता॑यै॒ दोहं॒ ॅवेद॑ दु॒ह ए॒वैनां᳚ ॅय॒ज्ञो वै सू॒नृता ऽऽ श्रा॑व॒येत्यैवैना॑-मह्व॒दस्तु॒ - [ ]
पदपाठः (Word-by-word)
उ॒दय॑न॒मित्यु॑त् - अय॑नम् । वेद॑ । प्रति॑ष्ठिते॒नेति॒ प्रति॑ - स्थि॒ते॒न॒ । अरि॑ष्टेन । य॒ज्ञेन॑ । सꣳ॒॒स्थामिति॑ सं - स्थाम् । ग॒च्छ॒ति॒ । एति॑ । श्रा॒व॒य॒ । अस्तु॑ । श्रौष॑ट् । यज॑ । ये । यजा॑महे । व॒ष॒ट्का॒र इति॑ वषट् - का॒रः । ए॒तत् । वै । य॒ज्ञ्स्य॑ । प्राय॑ण॒मिति॑ प्र - अय॑नम् । ए॒षा । प्र॒ति॒ष्ठेति॑ प्रति - स्था । ए॒तत् । उ॒दय॑न॒मित्यु॑त् - अय॑नम् । यः । ए॒वम् । वेद॑ । प्रति॑ष्ठिते॒नेति॒ प्रति॑-स्थि॒ते॒न॒ । अरि॑ष्टेन । य॒ज्ञेन॑ । सꣳ॒॒स्थामिति॑ सं - स्थाम् । ग॒च्छ॒ति॒ । यः । वै । सू॒नृता॑यै । दोह᳚म् । वेद॑ । दु॒हे । ए॒व । ए॒ना॒म् । य॒ज्ञ्ः । वै । सू॒नृता᳚ । एति॑ । श्रा॒व॒य॒ । इति॑ । एति॑ । ए॒व । ए॒ना॒म् । अ॒ह्व॒त् । अस्तु॑ ।