ऽन्नाद्य॑-मा॒त्मन् ध॑त्ते॒ दब्धि॑र॒स्यद॑ब्धो भूयासम॒मुं द॑भेय॒मित्या॑है॒तया॒ वै दब्द्ध्या॑ दे॒वा असु॑रानदभ्नुव॒न्तयै॒व भ्रातृ॑व्यं दभ्नोत्य॒ग्नीषोम॑योर॒हं दे॑वय॒ज्यया॑ वृत्र॒हा भू॑यास॒मित्या॑हा॒ऽग्नीषोमा᳚भ्यां॒ ॅवा इन्द्रो॑ वृ॒त्रम॑ह॒न्ताभ्या॑मे॒व भ्रातृ॑व्यꣳ स्तृणुत इन्द्राग्नि॒योर॒हं दे॑वय॒ज्यये᳚न्द्रिया॒व्य॑न्ना॒दो भू॑यास॒मित्या॑हेन्द्रिया॒व्ये॑वान्ना॒दो भ॑व॒तीन्द्र॑स्या॒ - [ ]
पदपाठः (Word-by-word)
अ॒न्नाद्य॒मित्य॑न्न - अद्य᳚म् । आ॒त्मन्न् । ध॒त्ते॒ । दब्धिः॑ । अ॒सि॒ । अद॑ब्धः । भू॒या॒स॒म् । अ॒मुम् । द॒भे॒य॒म् । इति॑ । आ॒ह॒ । ए॒तया᳚ । वै । दब्ध्या᳚ । दे॒वाः । असु॑रान् । अ॒द॒भ्नु॒व॒॒न्न् । तया᳚ । ए॒व । भ्रातृ॑व्यम् । द॒भ्नो॒ति॒ । अ॒ग्नीषोम॑यो॒रित्य॒ग्नी - सोम॑योः । अ॒हम् । दे॒व॒य॒ज्ययेति॑ देव - य॒ज्यया᳚ । वृ॒त्र॒हेति॑ वृत्र - हा । भू॒या॒स॒म् । इति॑ । आ॒ह॒ । अ॒ग्नीषोमा᳚भ्या॒मित्य॒ग्नी - सोमा᳚भ्याम् । वै । इन्द्रः॑ । वृ॒त्रम् । अ॒ह॒न्न् । ताभ्या᳚म् । ए॒व । भ्रातृ॑व्यम् । स्तृ॒णु॒ते॒ । इ॒न्द्रा॒ग्नि॒योरिती᳚न्द्र - अ॒ग्नि॒योः । अ॒हम् । दे॒व॒य॒ज्ययेति॑ देव - य॒ज्यया᳚ । इ॒न्द्रि॒या॒वी । अ॒न्ना॒द इत्य॑न्न - अ॒दः । भू॒या॒स॒म् । इति॑ । आ॒ह॒ । इ॒न्द्रि॒या॒वी । ए॒व । अ॒न्ना॒द इत्य॑न्न - अ॒दः । भ॒व॒ति॒ । इन्द्र॑स्य ।