क्ष॒त्रमनु॒ सहो॑ यज॒त्रेन्द्र॑ दे॒वेभि॒रनु॑ ते नृ॒षह्ये᳚ ॥ आयस्मि᳚न्थ् स॒प्तवा॑स॒वा स्तिष्ठ॑न्ति स्वा॒रुहो॑ यथा । ऋषि॑र्.ह दीर्घ॒श्रुत्त॑म॒ इन्द्र॑स्य घ॒र्मो अति॑थिः ॥ आ॒मासु॑ प॒क्वमैर॑य॒ आ सूर्यꣳ॑ रोहयो दि॒वि । घ॒र्मं न सामं॑ तपता सुवृ॒क्तिभि॒र् जुष्टं॒ गिर्व॑णसे॒ गिरः॑ ॥ इन्द्र॒मिद् गा॒थिनो॑ बृ॒हदिन्द्र॑-म॒र्केभि॑-र॒र्किणः॑ । इन्द्रं॒ ॅवाणी॑रनूषत ॥ गाय॑न्ति त्वा गाय॒त्रिणो- [ ]
पदपाठः (Word-by-word)
क्ष॒त्रम् । अन्विति॑ । सहः॑ । य॒ज॒त्र॒ । इन्द्र॑ । दे॒वेभिः॑ । अन्विति॑ । ते॒ । नृ॒षह्य॒ इति॑ नृ-सह्ये᳚ ॥ एति॑ । यस्मिन्न्॑ । स॒प्त । वा॒स॒वाः । तिष्ठ॑न्ति । स्वा॒रुह॒ इति॑ स्व - रुहः॑ । य॒था॒ ॥ ऋषिः॑ । ह॒ । दी॒र्घ॒श्रुत्त॑म॒ इति॑ दीर्घ॒श्रुत् - त॒मः॒ । इन्द्र॑स्य । घ॒र्मः । अति॑थिः ॥ आ॒मासु॑ । प॒क्वम् । ऐर॑यः । एति॑ । सूर्य᳚म् । रो॒ह॒यः॒ । दि॒वि ॥ घ॒र्मम् । न । सामन्न्॑ । त॒प॒त॒ । सु॒वृ॒क्तिभि॒रिति॑ सुवृ॒क्ति - भिः॒ । जुष्ट᳚म् । गिर्व॑णसे । गिरः॑ ॥ इन्द्र᳚म् । इत् । गा॒थिनः॑ । बृ॒हत् । इन्द्र᳚म् । अ॒र्केभिः॑ । अ॒र्किणः॑ ॥ इन्द्र᳚म् । वाणीः᳚ । अ॒नू॒ष॒त॒ ॥ गाय॑न्ति । त्वा॒ । गा॒य॒त्रिणः॑ ।