इन्न्वा उप॑स्तीर्ण-मि॒च्छन्ति॒ किमु॑ दे॒वा येषां॒ नवा॑वसान॒-मुपा᳚स्मि॒ञ्छ्वो य॒क्ष्यमा॑णे दे॒वता॑ वसन्ति॒ य ए॒वं ॅवि॒द्वान॒ग्नि-मु॑पस्तृ॒णाति॒ यज॑मानेन ग्रा॒म्याश्च॑ प॒शवो॑ऽव॒रुद्ध्या॑ आर॒ण्याश्चेत्या॑हु॒र् यद् ग्रा॒म्यानु॑प॒वस॑ति॒ तेन॑ ग्रा॒म्यानव॑ रुन्धे॒ यदा॑र॒ण्यस्या॒श्ञ॑ति॒ तेना॑र॒ण्यान्. यदना᳚श्वानुप॒वसे᳚त् पितृदेव॒त्यः॑ स्यादार॒ण्यस्या᳚-श्ञातीन्द्रि॒यं - [ ]
पदपाठः (Word-by-word)
इत् । नु । वा । उप॑स्तीर्ण॒मियुप॑ - स्ती॒र्ण॒म् । इ॒च्छन्ति॑ । किम् । उ॒ । दे॒वाः । येषा᳚म् । नवा॑वसान॒मिति॒ नव॑ - अ॒व॒सा॒न॒म् । उपेति॑ । अ॒स्मि॒न्न् । श्वः । य॒क्ष्यमा॑णे । दे॒वताः᳚ । व॒स॒न्ति॒ । यः । ए॒वम् । वि॒द्वान् । अ॒ग्निम् । उ॒प॒स्तृ॒णातीत्यु॑प - स्तृ॒णाति॑ । यज॑मानेन । ग्रा॒म्याः । च॒ । प॒शवः॑ । अ॒व॒रुद्ध्या॒ इत्य॑व-रुद्ध्याः᳚ । आ॒र॒ण्याः । च॒ । इति॑ । आ॒हुः॒ । यत् । ग्रा॒म्यान् । उ॒प॒वस॒तीत्यु॑प - वस॑ति । तेन॑ । ग्रा॒म्यान् । अवेति॑ । रु॒न्धे॒ । यत् । आ॒र॒ण्यस्य॑ । अ॒श्नाति॑ । तेन॑ । आ॒र॒ण्यान् । यत् । अना᳚श्वान् । उ॒प॒वसे॒दित्यु॑प - वसे᳚त् । पि॒तृ॒दे॒व॒त्य॑ इति॑ पितृ - दे॒व॒त्यः॑ । स्या॒त् । आ॒र॒ण्यस्य॑ । अ॒श्ना॒ति॒ । इ॒न्द्रि॒यम् ।