व्र॒तमेका॑ रक्षति देवयू॒नां ॥ च॒तु॒ष्टो॒मो अ॑भव॒द्या तु॒रीया॑ य॒ज्ञ्स्य॑ प॒क्षावृ॑षयो॒ भव॑न्ती । गा॒य॒त्रीं त्रि॒ष्टुभं॒ ज॑गतीमनु॒ष्टुभं॑ बृ॒हद॒र्कं ॅयु॑ञ्जा॒नाः सुव॒राऽभ॑रन्नि॒दं ॥ प॒ञ्चभि॑र्द्धा॒ता वि द॑धावि॒दं ॅयत् तासाꣳ॒॒ स्वसॄ॑रजनय॒त् पञ्च॑पञ्च । तासा॑मु यन्ति प्रय॒वेण॒ पञ्च॒ नाना॑ रू॒पाणि॒ क्रत॑वो॒ वसा॑नाः ॥ त्रिꣳ॒॒शथ् स्वसा॑र॒ उप॑यन्ति निष्कृ॒तꣳ स॑मा॒नं के॒तुं प्र॑तिमु॒ञ्चमा॑नाः ।
पदपाठः (Word-by-word)
व्र॒तम् । एका᳚ । र॒क्ष॒ति॒ । दे॒व॒यू॒नामिति॑ देव - यू॒नाम् ॥ च॒तु॒ष्टो॒म इति॑ चतुः-स्तो॒मः । अ॒भ॒व॒त् । या । तु॒रीया᳚ । य॒ज्ञ्स्य॑ । प॒क्षौ । ऋ॒ष॒यः॒ । भव॑न्ती ॥ गा॒य॒त्रीम् । त्रि॒ष्टुभ᳚म् । जग॑तीम् । अ॒नु॒ष्टुभ॒मित्य॑नु-स्तुभ᳚म् । बृ॒हत् । अ॒र्कम् । यु॒ञ्जा॒नाः । सुवः॑ । एति॑ । अ॒भ॒र॒न्न् । इ॒दम् ॥ प॒ञ्चभि॒रिति॑ प॒ञ्च - भिः॒ । धा॒ता । वीति॑ । द॒धौ॒ । इ॒दम् । यत् । तासा᳚म् । स्वसॄः᳚ । अ॒ज॒न॒य॒त् । पञ्च॑प॒ञ्चेति॒ पञ्च॑ - प॒ञ्च॒ ॥ तासा᳚म् । उ॒ । य॒न्ति॒ । प्र॒य॒वेणेति॑ प्र - य॒वेन॑ । पञ्च॑ । नाना᳚ । रू॒पाणि॑ । क्रत॑वः । वसा॑नाः ॥ त्रिꣳ॒॒शत् । स्वसा॑रः । उपेति॑ । य॒न्ति॒ । नि॒ष्कृ॒तमिति॑ निः - कृ॒तम् । स॒मा॒नम् । के॒तुम् । प्र॒ति॒मु॒ञ्चमा॑ना॒ इति॑ प्रति - मु॒ञ्चमा॑नाः ॥