प्र॒जाप॑तिः प॒शून॑सृजत । ते᳚ऽस्माथ् सृ॒ष्टाः परा᳚ञ्च आयन्न् । तान॑ग्निष्टो॒मेन॒ नाप्नो᳚त् । तानु॒क्थ्ये॑न॒ नाप्नो᳚त् । तान्थ् षो॑ड॒शिना॒ नाप्नो᳚त् । तान्रात्रि॑या॒ नाप्नो᳚त् । तान्थ् स॒न्धिना॒ नाप्नो᳚त् । सो᳚ऽग्निम॑ब्रवीत् । इ॒मान्म॑ ई॒फ्सेति॑ । तान॒ग्निस्त्रि॒वृता॒ स्तोमे॑न॒ नाप्नो᳚त्

स इन्द्र॑मब्रवीत् । इ॒मान्म॑ ई॒फ्सेति॑ । तानिन्द्रः॑ पञ्चद॒शेन॒ स्तोमे॑न॒ नाप्नो᳚त् । स विश्वा᳚न् दे॒वा-न॑ब्रवीत् । इ॒मान्म॑ ईफ्स॒तेति॑ । तान्. विश्वे॑ दे॒वाः स॑प्तद॒शेन॒ स्तोमे॑न॒ नाप्नु॑वन्न् । स विष्णु॑मब्रवीत् । इ॒मान्म॑ ई॒फ्सेति॑ । तान्. विष्णु॑रेकविꣳ॒॒शेन॒ स्तोमे॑नाप्नोत् । वा॒र॒व॒न्तीये॑नावारयत ( )

इ॒दं ॅविष्णु॒र् विच॑क्रम॒ इति॒ व्य॑क्रमत ॥ यस्मा᳚त् प॒शवः॒ प्र प्रेव॒ भ्रꣳशे॑रन्न् । स ए॒तेन॑ यजेत ॥ यदाप्नो᳚त् । तद॒प्तोर्याम॑स्याप्तोर्याम॒त्वम् ॥ ए॒तेन॒ वै दे॒वा जैत्वा॑नि जि॒त्वा । यं काम॒-मका॑मयन्त॒ तमा᳚प्नुवन्न् । यं कामं॑ का॒मय॑ते । तमे॒तेना᳚प्नोति ।