व्या॒घ्रो॑ऽयम॒ग्नौ च॑रति॒ प्रवि॑ष्टः । ऋषी॑णां पु॒त्रो अ॑भिशस्ति॒पा अ॒यम् । न॒म॒स्का॒रेण॒ नम॑सा ते जुहोमि । मा दे॒वानां᳚ मिथु॒या क॑र्म भा॒गम् ॥ सावी॒र॒.हि दे॑व प्रस॒वाय॑ पित्रे । व॒र्ष्माण॑मस्मै वरि॒माण॑मस्मै । अथा॒स्मभ्यꣳ॑ सवितः स॒र्वता॑ता । दि॒वे दि॑व॒ आसु॑वा॒ भूरि॑प॒श्वः ॥ भू॒तो भू॒तेषु॑ चरति॒ प्रवि॑ष्टः । स भू॒ताना॒-मधि॑पतिर्-बभूव

तस्य॑ मृ॒त्यौ च॑रति राज॒सूय᳚म् । स राजा॑ रा॒ज्य-मनु॑मन्यतामि॒दम् ॥ येभिः॒ शिल्पैः᳚ पप्रथा॒नामदृꣳ॑हत् । येभि॒द्र्याम॒भ्यपिꣳ॑शत्-प्र॒जाप॑तिः । येभि॒र्वाचं॑ ॅवि॒श्वरू॑पाꣳ स॒मव्य॑यत् । तेने॒मम॑ग्न इ॒ह वर्च॑सा॒ सम॑ङ्ग्धि ॥ येभि॑रादि॒त्यस्तप॑ति॒ प्रके॒तुभिः॑ । येभिः॒ सूर्यो॑ ददृ॒शे चि॒त्रभा॑नुः । येभि॒र्वाचं॑ पुष्क॒लेभि॒रव्य॑यत् । तेने॒मम॑ग्न इ॒ह वर्च॑सा॒ सम॑ङ्ग्धि ।

आऽयं भा॑तु॒ शव॑सा॒ पञ्च॑ कृ॒ष्टीः । इन्द्र॑ इव ज्ये॒ष्ठो भ॑वतु प्र॒जावान्॑ । अ॒स्मा अ॑स्तु पुष्क॒लं चि॒त्रभा॑नु । आऽयं पृ॑णक्तु॒ रज॑सी उ॒पस्थ᳚म् ॥ यत्ते॒ शिल्पं॑ कश्यप रोच॒नाव॑त् । इ॒न्द्रि॒याव॑त्-पुष्क॒लं चि॒त्रभा॑नु । यस्मि॒न्थ् सूर्या॒ अर्पि॑ताः स॒प्त सा॒कम् । तस्मि॒न्-राजा॑न॒-मधि॒विश्र॑ये॒मम् ॥ द्यौर॑सि पृथि॒व्य॑सि ॥ व्या॒घ्रो वैया॒घ्रेऽधि॑

विश्र॑यस्व॒ दिशो॑ म॒हीः । विश॑स्त्वा॒ सर्वा॑ वाञ्छन्तु । मा त्वद्-रा॒ष्ट्रमधि॑भ्रशत् ॥ या दि॒व्या आपः॒ पय॑सा संबभू॒वुः । या अ॒न्तरि॑क्ष उ॒त पार्थि॑वी॒र्याः । ता सां᳚ त्वा॒ सर्वा॑साꣳ रु॒चा । अ॒भिषि॑ञ्चामि॒ वर्च॑सा । अ॒भि त्वा॒ वर्च॑सा सिचं दि॒व्येन॑ । पय॑सा स॒ह । यथाऽऽसा॑ राष्ट्र॒वर्द्ध॑नः

तथा᳚ त्वा सवि॒ता क॑रत् । इन्द्रं॒ ॅविश्वा॑ अवीवृधन्न् । स॒मु॒द्र व्य॑चसं॒ गिरः॑ । र॒थीत॑मꣳ रथी॒नाम् । वाजा॑नाꣳ॒॒ सत् प॑तिं॒ पति᳚म् । वस॑वस्त्वा पु॒रस्ता॑द॒भिषि॑ञ्चन्तु गाय॒त्रेण॒ छन्द॑सा । रु॒द्रास्त्वा॑ दक्षिण॒तो॑ऽभिषि॑ञ्चन्तु॒ त्रैष्टु॑भेन॒ छन्द॑सा । आ॒दि॒त्यास्त्वा॑ प॒श्चाद॒भिषि॑ञ्चन्तु॒ जाग॑तेन॒ छन्द॑सा । विश्वे᳚ त्वा दे॒वा उ॑त्तर॒तो॑ऽभिषि॑ञ्च॒न्-त्वानु॑ष्टुभेन॒ छन्द॑सा । बृह॒स्पति॑-स्त्वो॒परि॑ष्टा-द॒भिषि॑ञ्चतु॒ पाङ्क्ते॑न॒ छन्द॑सा ।

अ॒रु॒णं त्वा॒ वृक॑मु॒ग्रं ख॑जं क॒रम् । रोच॑मानं म॒रुता॒मग्रे॑ अ॒र्चिषः॑ । सूर्य॑वन्तं म॒घवा॑नं ॅविषास॒हिम् । इन्द्र॑मु॒क्थ्येषु॑ नाम॒हूत॑मꣳ हुवेम ॥ प्र बा॒हवा॑ सिसृतं जी॒वसे॑ नः । आ नो॒ गव्यू॑तिमुक्षतं घृ॒तेन॑ । आ नो॒ जने᳚ श्रवयतं ॅयुवाना । श्रु॒तं मे॑ मित्रावरुणा॒ हवे॒मा ॥ इन्द्र॑स्य ते वीर्य॒कृतः॑ । बा॒हू उ॒पाव॑हरामि ( ) ।