मम॑ । अ॒ग्ने॒ । वर्चः॑ । वि॒ह॒वेष्विति॑ वि - ह॒वेषु॑ । अ॒स्तु॒ । व॒यम् । त्वा॒ । इन्धा॑नाः । त॒नुव᳚म् । पु॒षे॒म॒ ॥ मह्य᳚म् । न॒म॒न्ता॒म् । प्र॒दिश॒ इति॑ प्र - दिशः॑ । चत॑स्रः । त्वया᳚ । अद्ध्य॑क्षे॒णेत्यधि॑ - अ॒क्षे॒ण॒ । पृत॑नाः । ज॒ये॒म॒ ॥ मम॑ । दे॒वाः । वि॒ह॒व इति॑ वि - ह॒वे । स॒न्तु॒ । सर्वे᳚ । इन्द्रा॑वन्त॒ इतीन्द्र॑ - व॒न्तः॒ । म॒रुतः॑ । विष्णुः॑ । अ॒ग्निः ॥ मम॑ । अ॒न्तरि॑क्षम् । उ॒रु । गो॒पम् । अ॒स्तु॒ । मह्य᳚म् । वातः॑ । प॒व॒ता॒म् । कामे᳚ । अ॒स्मिन्न् ॥ मयि॑ । दे॒वाः । द्रवि॑णम् । एति॑ । य॒ज॒न्ता॒म् । मयि॑ । आ॒शीरित्या᳚ - शीः । अ॒स्तु॒ । मयि॑ । दे॒वहू॑ति॒रिति॑ दे॒व - हू॒तिः॒ ॥ दैव्या᳚ । होता॑रा । व॒नि॒ष॒न्त॒ ।

पूर्वे᳚ । अरि॑ष्टाः । स्या॒म॒ । त॒नुवा᳚ । सु॒वीरा॒ इति॑ सु - वीराः᳚ ॥ मह्य᳚म् । य॒ज॒न्तु॒ । मम॑ । यानि॑ । ह॒व्या । आकू॑ति॒रित्या - कू॒तिः॒ । स॒त्या । मन॑सः । मे॒ । अ॒स्तु॒ ॥ एनः॑ । मा । नीति॑ । गा॒म् । क॒त॒मत् । च॒न । अ॒हम् । विश्वे᳚ । दे॒वा॒सः॒ । अधीति॑ । वो॒च॒त॒ । मे॒ ॥ देवीः᳚ । ष॒डु॒र्वी॒रिति॑ षट् - उ॒र्वीः॒ । उ॒रु । नः॒ । कृ॒णो॒त॒ । विश्वे᳚ । दे॒वा॒सः॒ । इ॒ह । वी॒र॒य॒द्ध्व॒म् ॥ मा । हा॒स्म॒हि॒ । प्र॒जयेति॑ प्र - जया᳚ । मा । त॒नूभिः॑ । मा । र॒धा॒म॒ । द्वि॒ष॒ते । सो॒म॒ । रा॒ज॒न्न् ॥ अ॒ग्निः । म॒न्युम् । प्र॒ति॒नु॒दन्निति॑ प्रति - नु॒दन्न् । पु॒रस्ता᳚त् ।

अद॑ब्धः । गो॒पा इति॑ गो - पाः । परीति॑ । पा॒हि॒ । नः॒ । त्वम् ॥ प्र॒त्यञ्चः॑ । य॒न्तु॒ । नि॒गुत॒ इति॑ नि - गुतः॑ । पुनः॑ । ते । अ॒मा । ए॒षा॒म् । चि॒त्तम् । प्र॒बुधेति॑ प्र - बुधा᳚ । वीति॑ । ने॒श॒त् ॥ धा॒ता । धा॒तृ॒णाम् । भुव॑नस्य । यः । पतिः॑ । दे॒वम् । स॒वि॒तार᳚म् । अ॒भि॒मा॒ति॒षाह॒मित्य॑भिमाति - साह᳚म् ॥ इ॒मम् । य॒ज्ञ्म् । अ॒श्विना᳚ । उ॒भा । बृह॒स्पतिः॑ । दे॒वाः । पा॒न्तु॒ । यज॑मानम् । न्य॒र्थादिति॑ नि- अ॒र्थात् ॥ उ॒रु॒व्यचा॒ इत्यु॑रु-व्यचाः᳚ । नः॒ । म॒हि॒षः । शर्म॑ । यꣳ॒॒स॒त् । अ॒स्मिन्न् । हवे᳚ । पु॒रु॒हू॒त इति॑ पुरु - हू॒तः । पु॒रु॒क्षु ॥ सः । नः॒ । प्र॒जाय॒ इति॑ प्र - जायै᳚ । ह॒र्य॒श्वेति॑ हरि - अ॒श्व॒ । मृ॒ड॒य॒ । इन्द्र॑ । मा ।

नः॒ । री॒रि॒षः॒ । मा । परेति॑ । दाः॒ ॥ ये । नः॒ । स॒पत्नाः᳚ । अपेति॑ । ते । भ॒व॒न्तु॒ । इ॒न्द्रा॒ग्निभ्या॒मिती᳚न्द्रा॒ग्नि-भ्या॒म् । अवेति॑ । बा॒धा॒म॒हे॒ । तान् ॥ वस॑वः । रु॒द्राः । आ॒दि॒त्याः । उ॒प॒रि॒स्पृश॒मित्यु॑परि - स्पृश᳚म् । मा॒ । उ॒ग्रम् । चेत्ता॑रम् । अ॒धि॒रा॒जमित्य॑धि - रा॒जम् । अ॒क्र॒न्न् ॥ अ॒र्वाञ्च᳚म् । इन्द्र᳚म् । अ॒मुतः॑ । ह॒वा॒म॒हे॒ । यः । गो॒जिदिति॑ गो - जित् । ध॒न॒जिदिति॑ धन - जित् । अ॒श्व॒जिदित्य॑श्व - जित् । यः ॥ इ॒मम् । नः॒ । य॒ज्ञ्म् । वि॒ह॒व इति॑ वि - ह॒वे । जु॒ष॒स्व॒ । अ॒स्य । कु॒र्मः॒ । ह॒रि॒व॒ इति॑ हरि - वः॒ । मे॒दिन᳚म् । त्वा॒ ॥