पञ्चशत् 1 #
अ॒ग्नेर्म॑न्वे प्रथ॒मस्य॒ प्रचे॑तसो॒ यं पाञ्च॑जन्यं ब॒हवः॑ समि॒न्धते᳚ । विश्व॑स्यां ॅवि॒शि प्र॑विविशि॒वाꣳ स॑मीमहे॒ स नो॑ मुञ्च॒त्वꣳ ह॑सः ॥ यस्ये॒दं प्रा॒णन्नि॑मि॒षद् यदेज॑ति॒ यस्य॑ जा॒तं जन॑मानं च॒ केव॑लं । स्तौम्य॒ग्निं ना॑थि॒तो जो॑हवीमि॒ स नो॑ मुञ्च॒त्वꣳ ह॑सः ॥ इन्द्र॑स्य मन्ये प्रथ॒मस्य॒ प्रचे॑तसो वृत्र॒घ्नः स्तोमा॒ उप॒ मामु॒पागुः॑ । यो दा॒शुषः॑ सु॒कृतो॒ हव॒मुप॒ गन्ता॒ - [ ]
पदपाठः (Word-by-word)
अ॒ग्नेः । म॒न्वे॒ । प्र॒थ॒मस्य॑ । प्रचे॑तस॒ इति॒ प्र - चे॒त॒सः॒ । यम् । पाञ्च॑जन्य॒मिति॒ पाञ्च॑ - ज॒न्य॒म् । ब॒हवः॑ । स॒मि॒न्धत॒ इति॑ सम् - इ॒न्धते᳚ ॥ विश्व॑स्याम् । वि॒शि । प्र॒वि॒वि॒शि॒वाꣳस॒मिति॑ प्र - वि॒वि॒शि॒वाꣳस᳚म् । ई॒म॒हे॒ । सः । नः॒ । मु॒ञ्च॒तु॒ । अꣳह॑सः ॥ यस्य॑ । इ॒दम् । प्रा॒णदिति॑ प्र - अ॒नत् । नि॒मि॒षदिति॑ नि - मि॒षत् । यत् । एज॑ति । यस्य॑ । जा॒तम् । जन॑मानम् । च॒ । केव॑लम् ॥ स्तौमि॑ । अ॒ग्निम् । ना॒थि॒तः । जो॒ह॒वी॒मि॒ । सः । नः॒ । मु॒ञ्च॒तु॒ । अꣳह॑सः ॥ इन्द्र॑स्य । म॒न्ये॒ । प्र॒थ॒मस्य॑ । प्रचे॑तस॒ इति॒ प्र - चे॒त॒सः॒ । वृ॒त्र॒घ्न इति॑ वृत्र-घ्नः । स्तोमाः᳚ । उपेति॑ । माम् । उ॒पागु॒रित्यु॑प - आगुः॑ ॥ यः । दा॒शुषः॑ । सु॒कृत॒ इति॑ सु - कृतः॑ । हव᳚म् । उपेति॑ । गन्ता᳚ ।