अ॒ग्निम् । यु॒न॒ज्मि॒ । शव॑सा । घृ॒तेन॑ । दि॒व्यम् । सु॒प॒र्णमिति॑ सु - प॒र्णम् । वय॑सा । बृ॒हन्त᳚म् ॥ तेन॑ । व॒यम् । प॒ते॒म॒ । ब्र॒द्ध्नस्य॑ । वि॒ष्टप᳚म् । सुवः॑ । रुहा॑णाः । अधीति॑ । नाके᳚ । उ॒त्त॒म इत्यु॑त् - त॒मे ॥ इ॒मौ । ते॒ । प॒क्षौ । अ॒जरौ᳚ । प॒त॒त्रिणः॑ । याभ्या᳚म् । रक्षाꣳ॑सि । अ॒प॒हꣳसीत्य॑प - हꣳसि॑ । अ॒ग्ने॒ ॥ ताभ्या᳚म् । प॒ते॒म॒ । सु॒कृता॒मिति॑ सु - कृता᳚म् । उ॒ । लो॒कम् । यत्र॑ । ऋष॑यः । प्र॒थ॒म॒जा इति॑ प्रथम - जाः । ये । पु॒रा॒णाः ॥ चित् । अ॒सि॒ । स॒मु॒द्रयो॑नि॒रिति॑ समु॒द्र - यो॒निः॒ । इन्दुः॑ । दक्षः॑ । श्ये॒नः । ऋ॒तावेत्यृ॒त - वा॒ ॥ हिर॑ण्यपक्ष॒ इति॒ हिर॑ण्य - प॒क्षः॒ । श॒कु॒नः । भु॒र॒ण्युः । म॒हान् । स॒धस्थ॒ इति॑ स॒ध - स्थे॒ । ध्रु॒वः ।

एति॑ । निष॑त्त॒ इति॒ नि - स॒त्तः॒ ॥ नमः॑ । ते॒ । अ॒स्तु॒ । मा । मा॒ । हिꣳ॒॒सीः॒ । विश्व॑स्य । मू॒द्‌र्धन्न् । अधीति॑ । ति॒ष्ठ॒सि॒ । श्रि॒तः ॥ स॒मु॒द्रे । ते॒ । हृद॑यम् । अ॒न्तः । आयुः॑ । द्यावा॑पृथि॒वी इति॒ द्यावा᳚ - पृ॒थि॒वी । भुव॑नेषु । अर्पि॑ते॒ इति॑ ॥ उ॒द्नः । द॒त्त॒ । उ॒द॒धिमित्यु॑द - धिम् । भि॒न्त॒ । दि॒वः । प॒र्जन्या᳚त् । अ॒न्तरि॑क्षात् । पृ॒थि॒व्याः । ततः॑ । नः॒ । वृष्ट्या᳚ । अ॒व॒त॒ ॥ दि॒वः । मू॒द्‌र्धा । अ॒सि॒ । पृ॒थि॒व्याः । नाभिः॑ । ऊर्क् । अ॒पाम् । ओष॑धीनाम् ॥ वि॒श्वायु॒रिति॑ वि॒श्व - आ॒युः॒ । शर्म॑ । स॒प्रथा॒ इति॑ स - प्रथाः᳚ । नमः॑ । प॒थे ॥ येन॑ । ऋष॑यः । तप॑सा । स॒त्रम् ।

आस॑त । इन्धा॑नाः । अ॒ग्निम् । सुवः॑ । आ॒भर॑न्त॒ इत्या᳚ - भर॑न्तः ॥ तस्मिन्न्॑ । अ॒हम् । नीति॑ । द॒धे॒ । नाके᳚ । अ॒ग्निम् । ए॒तम् । यम् । आ॒हुः । मन॑वः । स्ती॒र्णब॑र्.हिष॒मिति॑ स्ती॒र्ण - ब॒र्॒.हि॒ष॒म् ॥ तम् । पत्नी॑भिः । अन्विति॑ । ग॒च्छे॒म॒ । दे॒वाः॒ । पु॒त्रैः । भ्रातृ॑भि॒रिति॒ भ्रातृ॑ - भिः॒ । उ॒त । वा॒ । हिर॑ण्यैः ॥ नाक᳚म् । गृ॒ह्णा॒नाः । सु॒कृ॒तस्येति॑ सु - कृ॒तस्य॑ । लो॒के । तृ॒तीये᳚ । पृ॒ष्ठे । अधीति॑ । रो॒च॒ने । दि॒वः ॥ एति॑ । व॒चः । मद्ध्य᳚म् । अ॒रु॒ह॒त् । भु॒र॒ण्युः । अ॒यम् । अ॒ग्निः । सत्प॑ति॒रिति॒ सत् - प॒तिः॒ । चेकि॑तानः ॥ पृ॒ष्ठे । पृ॒थि॒व्याः । निहि॑त॒ इति॒ नि - हि॒तः॒ । दवि॑द्युतत् । अ॒ध॒स्प॒दमित्य॑धः - प॒दम् । कृ॒णु॒ते॒ ।

ये । पृ॒त॒न्यवः॑ ॥ अ॒यम् । अ॒ग्निः । वी॒रत॑म॒ इति॑ वी॒र - त॒मः॒ । व॒यो॒धा इति॑ वयः - धाः । स॒ह॒स्रियः॑ । दी॒प्य॒ता॒म् । अप्र॑युच्छ॒न्नित्यप्र॑ - यु॒च्छ॒न्न् ॥ वि॒भ्राज॑मान॒ इति॑ वि - भ्राज॑मानः । स॒रि॒रस्य॑ । मद्ध्ये᳚ । उप॑ । प्रेति॑ । या॒त॒ । दि॒व्यानि॑ । धाम॑ ॥ सम् । प्रेति॑ । च्य॒व॒द्ध्व॒म् । अन्विति॑ । सम् । प्रेति॑ । या॒त॒ । अग्ने᳚ । प॒थः । दे॒व॒याना॒निति॑ दे॒व - यानान्॑ । कृ॒णु॒द्ध्व॒म् ॥ अ॒स्मिन्न् । स॒धस्थ॒ इति॑ स॒ध - स्थे॒ । अधीति॑ । उत्त॑रस्मि॒न्नित्युत्-त॒र॒स्मि॒न्न् । विश्वे᳚ । दे॒वाः॒ । यज॑मानः । च॒ । सी॒द॒त॒ ॥ येन॑ । स॒हस्र᳚म् । वह॑सि । येन॑ । अ॒ग्ने॒ । स॒र्व॒वे॒द॒समिति॑ सर्व - वे॒द॒सम् ॥ तेन॑ । इ॒मम् । य॒ज्ञ्म् । नः॒ । व॒ह॒ । दे॒व॒यान॒ इति॑ देव - यानः॑ । यः ।

उ॒त्त॒म इत्यु॑त्-त॒मः ॥ उदिति॑ । बु॒द्ध्य॒स्व॒ । अ॒ग्ने॒ । प्रतीति॑ । जा॒गृ॒हि॒ । ए॒न॒म् । इ॒ष्टा॒पू॒र्ते इती᳚ष्टा - पू॒र्ते । समिति॑ । सृ॒जे॒था॒म् । अ॒यम् । च॒ ॥ पुनः॑ । कृ॒ण्वन्न् । त्वा॒ । पि॒तर᳚म् । युवा॑नम् । अ॒न्वाताꣳ॑सी॒दित्य॑नु-आताꣳ॑सीत् । त्वयि॑ । तन्तु᳚म् । ए॒तम् ॥ अ॒यम् । ते॒ । योनिः॑ । ऋ॒त्वियः॑ । यतः॑ । जा॒तः । अरो॑चथाः ॥ तम् । जा॒नन्न् । अ॒ग्ने॒ । एति॑ । रो॒ह॒ । अथ॑ । नः॒ । व॒द्‌र्ध॒य॒ । र॒यिम् ॥