अदि॑त्यै॒ त्रयो॑ रोहितै॒ता इ॑न्द्रा॒ण्यै त्रयः॑ कृष्णै॒ताः कु॒ह्वै᳚ त्रयो॑ऽरुणै॒तास्ति॒स्रो धे॒नवो॑ रा॒कायै॒ त्रयो॑ऽन॒ड्वाहः॑ सिनीवा॒ल्या आ᳚ग्नावैष्ण॒वा रोहि॑तललामास्तूप॒राः ॥
पदपाठः (Word-by-word)
अदि॑त्यै । त्रयः॑ । रो॒हि॒तै॒ता इति॑ रोहित - ए॒ताः । इ॒न्द्रा॒ण्यै । त्रयः॑ । कृ॒ष्णै॒ता इति॑ कृष्ण - ए॒ताः । कु॒ह्वै᳚ । त्रयः॑ । अ॒रु॒णै॒ता इत्य॑रुण - ए॒ताः । ति॒स्रः । धे॒नवः॑ । रा॒कायै᳚ । त्रयः॑ । अ॒न॒ड्वाहः॑ । सि॒नी॒वा॒ल्यै । आ॒ग्ना॒वै॒ष्ण॒वा इत्या᳚ग्ना - वै॒ष्ण॒वाः । रोहि॑तललामा॒ इति॒ रोहि॑त - ल॒ला॒माः॒ । तू॒प॒राः ॥
भट्टभास्करभाष्यम् (Bhatta Bhaskara Commentary)
1 अदित्यै त्रयो रोहितैताः ॥ रोहिताश्च ते एताश्चेति रोहितैताः । 'वर्णो वर्णेन' इति समासः । 'अनेतः' इति प्रतिषेधात् पूर्वपदप्रकृतिस्वराभाव उक्तः । इन्द्राण्यै त्रयः कृष्णैताः । तावेव स्वरसमासौ । कुह्वै त्रयोऽरुणैताः गताः । तिस्त्रो धेनवो राकायै धेनवः प्रत्यग्रप्रसवा गावः । त्रयोऽनड्वाहः सिनीवाल्यै । अनो वहन्तीत्यनड्वाहः अनोवहनसमर्थाः । पृषोदरादिः । लोहितललामाः त्रयस्तूपराः आग्नावैष्णवाः गताः ॥
इति पञ्चमे षष्ठे अष्टादशोनुवाकः ॥