-स्मै॑ स॒वान् प्र य॑च्छन्ति॒ त ए॑नꣳ सुवन्ते स॒वो᳚ऽग्निर्व॑रुणस॒वो रा॑ज॒सूयं॑ ब्रह्मस॒वश्चित्यो॑ दे॒वस्य॑ त्वा सवि॒तुः प्र॑स॒व इत्या॑ह सवि॒तृप्र॑सूत ए॒वैनं॒ ब्रह्म॑णा दे॒वता॑भिर॒भि षि॑ञ्च॒त्यन्न॑-स्यान्नस्या॒भि षि॑ञ्च॒त्यन्न॑-स्यान्न॒स्या-व॑रुद्ध्यै पु॒रस्ता᳚त् प्र॒त्यञ्च॑म॒भि षि॑ञ्चति पु॒रस्ता॒द्धि प्र॑ती॒ची-न॒मन्न॑म॒द्यते॑ शीर्.ष॒तो॑ऽभि षि॑ञ्चति शीर्.ष॒तो ह्यन्न॑म॒द्यत॒ आ मुखा॑द॒न्वव॑स्रावयति - [ ]
पदपाठः (Word-by-word)
अ॒स्मै॒ । स॒वान् । प्रेति॑ । य॒च्छ॒न्ति॒ । ते । ए॒न॒म् । सु॒व॒न्ते॒ । स॒वः । अ॒ग्निः । व॒रु॒ण॒स॒व इति॑ वरुण - स॒वः । रा॒ज॒सूय॒मिति॑ राज - सूय᳚म् । ब्र॒ह्म॒स॒व इति॑ ब्रह्म-स॒वः । चित्यः॑ । दे॒वस्य॑ । त्वा॒ । स॒वि॒तुः । प्र॒स॒व इति॑ प्र - स॒वे । इति॑ । आ॒ह॒ । स॒वि॒तृप्र॑सूत॒ इति॑ सवि॒तृ-प्र॒सू॒तः॒ । ए॒व । ए॒न॒म् । ब्रह्म॑णा । दे॒वता॑भिः । अ॒भीति॑ । सि॒ञ्च॒ति॒ । अन्न॑स्यान्न॒स्येत्यन्न॑स्य - अ॒न्न॒स्य॒ । अ॒भीति॑ । सि॒ञ्च॒ति॒ । अन्न॑स्यान्न॒स्येत्यन्न॑स्य - अ॒न्न॒स्य॒ । अव॑रुद्ध्या॒ इत्यव॑ - रु॒द्ध्यै॒ । पु॒रस्ता᳚त् । प्र॒त्यञ्च᳚म् । अ॒भीति॑ । सि॒ञ्च॒ति॒ । पु॒रस्ता᳚त् । हि । प्र॒ती॒चीन᳚म् । अन्न᳚म् । अ॒द्यते᳚ । शी॒र्.॒ष॒तः । अ॒भीति॑ । सि॒ञ्च॒ति॒ । शी॒र्.॒ष॒तः । हि । अन्न᳚म् । अ॒द्यते᳚ । एति॑ । मुखा᳚त् । अ॒न्वव॑स्रावय॒तीत्य॑नु - अव॑स्रावयति ।