यजुर्वेद

वै । रा॒ज॒सूय॒स्येति॑ राज - सूय॑स्य । रू॒पम् । यः । ए॒वम् । वि॒द्वान् । अ॒ग्निम् । चि॒नु॒ते । उ॒भौ । ए॒व । लो॒कौ । अ॒भीति॑ । ज॒य॒ति॒ । यः । च॒ । रा॒ज॒सूये॒नेति॑ राज - सूये॑न । ई॒जा॒नस्य॑ । यः । च॒ । अ॒ग्नि॒चित॒ इत्य॑ग्नि - चितः॑ । इन्द्र॑स्य । सु॒षु॒वा॒णस्य॑ । द॒श॒धेति॑ दश - धा । इ॒न्द्रि॒यम् । वी॒र्य᳚म् । परेति॑ । अ॒प॒त॒त् । तत् । दे॒वाः । सौ॒त्रा॒म॒ण्या । समिति॑ । अ॒भ॒र॒न्न् । सू॒यते᳚ । वै । ए॒षः । यः । अ॒ग्निम् । चि॒नु॒ते । अ॒ग्निम् । चि॒त्वा । सौ॒त्रा॒म॒ण्या । य॒जे॒त॒ । इ॒न्द्रि॒यम् । ए॒व । वी॒र्य᳚म् । स॒भृंत्येति॑ सं - भृत्य॑ । आ॒त्मन्न् । ध॒त्ते॒ ॥