यास्तृ॒तीयाः॒ पात्रा॑णि॒ ताभि॒र्निर्णे॑निक्ते॒ याश्च॑तु॒र्थीरपि॒ ताभि॑रा॒त्मान॑मन्तर॒तः शु॑न्धते॒ यो वा अ॑स्य प॒शुमत्ति॑ माꣳ॒॒सꣳ सो᳚ऽत्ति॒ यः पु॑रो॒डाशं॑ म॒स्तिष्कꣳ॒॒ स यः प॑रिवा॒पं पुरी॑षꣳ॒॒ स य आज्यं॑ म॒ज्जानꣳ॒॒ स यः सोमꣳ॒॒ स्वेदꣳ॒॒ सोऽपि॑ ह॒ वा अ॑स्य शीर्.ष॒ण्या॑ नि॒ष्पदः॒ प्रति॑ गृह्णाति॒ यो द्वा॑दशा॒हे प्र॑तिगृ॒ह्णाति॒ तस्मा᳚द् द्वादशा॒हेन॒ ( ) न याज्यं॑ पा॒प्मनो॒ व्यावृ॑त्त्यै ॥
पदपाठः (Word-by-word)
याः । तृ॒तीयाः᳚ । पात्रा॑णि । ताभिः॑ । निरिति॑ । ने॒नि॒क्ते॒ । याः । च॒तु॒र्थीः । अपीति॑ । ताभिः॑ । आ॒त्मान᳚म् । अ॒न्त॒र॒तः । शु॒न्ध॒ते॒ । यः । वै । अ॒स्य॒ । प॒शुम् । अत्ति॑ । माꣳ॒॒सम् । सः । अ॒त्ति॒ । यः । पु॒रो॒डाश᳚म् । म॒स्तिष्क᳚म् । सः । यः । प॒रि॒वा॒पमिति॑ परि - वा॒पम् । पुरी॑षम् । सः । यः । आज्य᳚म् । म॒ज्जान᳚म् । सः । यः । सोम᳚म् । स्वेद᳚म् । सः । अपीति॑ । ह॒ । वै । अ॒स्य॒ । शी॒र्.॒ष॒ण्याः᳚ । नि॒ष्पद॒ इति॑ निः - पदः॑ । प्रतीति॑ । गृ॒ह्णा॒ति॒ । यः । द्वा॒द॒शा॒ह इति॑ द्वादश-अ॒हे । प्र॒ति॒गृ॒ह्णातीति॑ प्रति - गृ॒ह्णाति॑ । तस्मा᳚त् । द्वा॒द॒शा॒हेनेति॑ द्वादश - अ॒हेन॑ ( ) । न । याज्य᳚म् । पा॒प्मनः॑ । व्यावृ॑त्त्या॒ इति॑ वि - आवृ॑त्त्यै ॥