बृह॒स्पति॑रकामयत ब्रह्मवर्च॒सी स्या॒मिति॒ स ए॒त-म॑ष्टरा॒त्र-म॑पश्य॒त् तमाऽह॑र॒त् तेना॑यजत॒ ततो॒ वै स ब्र॑ह्मवर्च॒स्य॑भव॒द्य ए॒वं ॅवि॒द्वान॑ष्टरा॒त्रेण॒ यज॑ते ब्रह्मवर्च॒स्ये॑व भ॑वत्यष्टरा॒त्रो भ॑वत्य॒ष्टाक्ष॑रा गाय॒त्री गा॑य॒त्री ब्र॑ह्मवर्च॒सं गा॑यत्रि॒यैव ब्र॑ह्मवर्च॒समव॑ रुन्धेऽष्टरा॒त्रो भ॑वति॒ चत॑स्रो॒ वै दिश॒श्चत॑स्रो ऽवान्तरदि॒शा दि॒ग्भ्य ए॒व ब्र॑ह्मवर्च॒समव॑ रुन्धे- [ ]
पदपाठः (Word-by-word)
बृह॒स्पतिः॑ । अ॒का॒म॒य॒त॒ । ब्र॒ह्म॒व॒र्च॒सीति॑ ब्रह्म - व॒र्च॒सी । स्या॒म् । इति॑ । सः । ए॒तम् । अ॒ष्ट॒रा॒त्रमित्य॑ष्ट-रा॒त्रम् । अ॒प॒श्य॒त् । तम् । एति॑ । अ॒ह॒र॒त् । तेन॑ । अ॒य॒ज॒त॒ । ततः॑ । वै । सः । ब्र॒ह्म॒व॒र्च॒सीति॑ ब्रह्म-व॒र्च॒सी । अ॒भ॒व॒त् । यः । ए॒वम् । वि॒द्वान् । अ॒ष्ट॒रा॒त्रेणेत्य॑ष्ट - रा॒त्रेण॑ । यज॑ते । ब्र॒ह्म॒व॒र्च॒सीति॑ ब्रह्म - व॒र्च॒सी । ए॒व । भ॒व॒ति॒ । अ॒ष्ट॒रा॒त्र इत्य॑ष्ट - रा॒त्रः । भ॒व॒ति॒ । अ॒ष्टाक्ष॒रेत्य॒ष्टा - अ॒क्ष॒रा॒ । गा॒य॒त्री । गा॒य॒त्री । ब्र॒ह्म॒व॒र्च॒समिति॑ ब्रह्म - व॒र्च॒सम् । गा॒य॒त्रि॒या । ए॒व । ब्र॒ह्म॒व॒र्च॒समिति॑ ब्रह्म - व॒र्च॒सम् । अवेति॑ । रु॒न्धे॒ । अ॒ष्ट॒रा॒त्र इत्य॑ष्ट-रा॒त्रः । भ॒व॒ति॒ । चत॑स्रः । वै । दिशः॑ । चत॑स्रः । अ॒वा॒न्त॒र॒दि॒शा इत्य॑वान्तर-दि॒शाः । दि॒ग्भ्य इति॑ दिक् - भ्यः । ए॒व । ब्र॒ह्म॒व॒र्च॒समिति॑ ब्रह्म - व॒र्च॒सम् । अवेति॑ । रु॒न्धे॒ ।
भट्टभास्करभाष्यम् (Bhatta Bhaskara Commentary)
1 अथाष्टरात्र एकस्तद्विदधाति - बृहस्पतिरित्यादि ॥ गतम् । अष्टत्वान्वयात् अष्टाक्षरगायत्र्यात्मकब्रह्मवर्चसलाभः । पुनरप्यष्टत्वान्वयात् । अष्टभ्यो दिग्भ्यो ब्रह्मवर्चसलाभः ॥
2 त्रिवृदित्यादि ॥ गतम् । त्रिवृदादयस्त्रयस्त्रिंशान्ताः षट्, पञ्चविंशोग्निष्टोमो महाव्रतवान् सप्तमः' विश्वजित्सर्वपृष्ठोतिरात्रोष्टममहः ॥
इति सप्तमे द्वितीये तृतीयोनुवाकः ॥